မတ်မလီု၊ ဂျောန် ၂၅
Facebook နူကံၚ်ဇြဳပၞာန်တံ မကၟာတ်လဝ်ဂှ် ဂွံသုၚ်စောဲဂွံဂှ် Virtual Private Network မကော်ဂး VPN ဒုၚ်အကြာတုဲ ဒးသုၚ်စောဲဒၟံၚ်ဂှ်ဝွံ ဟိုတ်နူ VPN ဏံတုဲ ပ္ဍဲဍုၚ်မတ်မလီု တွဵုရးဍုၚ်မန် ဒးဒုၚ်အာတ်ဒၟံၚ်လှုဲတံ နွံဒၟံၚ်ရောၚ် ညးလ္တူဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲဍုၚ်မတ်မလီု ကံၚ်ဇြဳပၞာန်ထိၚ်ဒက်လဝ်ဂှ် ဒၞါဲမၞိဟ်အာကၠုၚ်ဂၠိုၚ် ဒၞါဲသၞေဟ်ကၚ်စၟဳတ် ဒၞါဲလုပ်တိတ်ဍုၚ်တံဂှ် ဒပ်ပၞာန်၊ ဗၠာဲသၟိၚ်၊ သၞာဲဒဴတၞဟ်ဟ်တံကဵု ဗၠာဲသၟိၚ်ထိၚ်ယာန်တံ ပံၚ်တောဲတုဲ စွံအဓိကစၟဳတ်ဒၟံၚ် မိုဝ်ဗိုၚ်ဖုၚ် ညးသၟတ်တံရ။
ညးဒေသမတ်မလီုမွဲတၠဂှ် နကဵုဗီုပြၚ် စၟဳတ်ကွဳလိုန်ဓာတ်တံဂှ် ရံၚ်ကေတ်အယဲ ညးဒဳကၠုၚ်ကွဳလိုန်ဓာတ်တံဂှ်တုဲ စၟဳတ်ဖုၚ်တုဲ ရပ်ဒး VPN မွဲမ္ဂး အာတ်ဒၟံၚ်လှုဲ မွဲကိုဋ်ရောၚ် လဴထ္ၜးလဝ်ရ။
“လၟုဟ်ဂှ် လာၚ်ဇြေန်နွံပေၚ်ၚ်၊ ဓလဝ်လဝ်ခမံက်ကီုလေဝ် ဍေံတံဂှ် ရံၚ်အယဲတုဲ ကော်ဒၟံၚ်။ ကော်တုဲ ဖုၚ်ပါဟာ ကဵုဖုၚ်မွဲတဲ။ အာတ်ဖုၚ်သာ်ဏံတုဲ စၟဳတ်ဒၟံၚ်။ VPN ဂှ် ရပ်ဂွံမွဲတှ်ေ အာတ်မွဲကိုဋ်၊ ပ္ဍဲကဵုဖုၚ် သပ်ဝဴ VPN နွံမွဲမ္ဂး အာတ်မွဲကိုဋ်။ နွံၜါတှ်ေ အာတ်ၜါကိုဋ်။ လ္ၚဵုဂှ်လေဝ် မတေံဟွံဂွံ မဏံဟွံဂွံတုဲ စုတ်လဝ် VPN ပိပန်တံဂှ်တှ်ေ အာဟဂှ်ရ။ ပိတှ်ေ ပိကိုဋ်၊ ဒှ်ဒၟံၚ်သာ်ဏံ” သာ်ဝွံ သ္ဂးရ။
လ္ပာ်ညးဒးဒုၚ်စၟဳတ်တံဂှ် သပ်ဝဴ VPN စုတ်လဝ်ပ္ဍဲဖုၚ်ဇကုတံဂှ် ဒးဇိုတ်ပလီုထောံ ဂတမုက်ကောန်ဒပ်ကံၚ်ဇြဳပၞာန်တံဂှ်တုဲ သွက်ဒးကဵုလဝ်ဒဏ်သြန်တံဂှ် မုတၞးလိက်သ္ကုတ်မှ ဟွံဂွံပုဟ်ဂှ် ညးဒေသဂှ် ဆက်ဟီုရ။
ဇာဇၞိက်ပရေၚ်မၞိဟ် Facebook ပ္ဍဲဍုၚ်ဗၟာ သုၚ်စောဲဂၠိုၚ်အိုတ်ဂှ် စနူအခိၚ်သီအဝဵုတုဲ ကံၚ်ဇြဳပၞာန် ကဵုဇြဟတ်ဂရိုဟ် ကုကမ္ပဏဳ ဇာဇၞိက်အေန်တာနိတ်တံကဵု အဝ်ပရေတာ ပရေၚ်ဆက်စၠောံအပ္ဍဲဍုၚ်တံဂှ်တုဲ ကဵုကၟာတ်လဝ်ရ။
ကြဴနူဂှ်တုဲ ညးမံၚ်တန်တဴအပ္ဍဲဍုၚ်တံဝွံ သွက်ဂွံတီကေတ် တၚ်နၚ်ပရိုၚ်ဂမၠိုၚ်မာန် ဒုၚ် VPN အကြာတုဲ ဒးသုၚ်စောဲကၠုၚ်ဒၟံၚ် Facebook ဂှ် ပိသၞာံပြၚ်ကၠုၚ်ရ။
ဆ္ဂး ကံၚ်ဇြဳပၞာန်ဂှ် ညးဍုၚ်ကွာန်အပ္ဍဲဍုၚ်တံ ညံၚ်ဆက်ရပ်စပ် Facebook ဟွံဂွံဂှ် စနူဂိတုမေ ၃၀ တုဲ ပံက် Secure Web Gateway SWG နကဵုအရီုဗၚ်နဲကွတ်ပညာကြုက်တုဲ ကၟာတ်လဒဵုကၠုၚ်လဝ် VPN ရ။
ပ္ဍဲအရာကၟာတ်လဒဵုသာ်ဏံဂှ် မ္ၚးနူကဵုသပ်ဝဴ VPN သုၚ်စောဲဒၟံၚ်မးမးတံဂှ် VPN ကဵုၚုဟ်တုဲ ဒးရာန်သုၚ်စောဲဒၟံၚ်သီုဖအိုတ်တံဂှ်လေဝ် ကံၚ်ဇြဳပၞာန် ကၟာတ်လဒဵုကၠုၚ် အဆက်က်ရ။
ဆ္ဂး လ္ပာ်ကံၚ်ဇြဳပၞာန် ၜိုန်ရကၟာတ်လဒဵုဒၟံၚ် VPN တံကီုလေဝ် ဒဵုကဵုအခိၚ်လၟုဟ် ပ္ဍဲကဵုဍုၚ်ဗၟာ ဆက်ရပ်စပ်ဒၟံၚ် VPN တံ ဂွံဒၟံၚ်ဏီဂှ်ရ စနူဂိတုဂျောန်မံက်တေံတုဲ စၟဳတ်ကၠုၚ်ဒၟံၚ် ညးမရပ်စပ်ဒၟံၚ် သပ်ဝဴ VPN ပ္ဍဲမိုဝ်ဗိုၚ်ဖုၚ်တံဂှ်ရ။
ညးဒေသမတ်မလီုမွဲတၠပၠန်ဂှ် ညးသၟတ်တတ်အာကၠုၚ်ဒၟံၚ် ပ္ဍဲကဵုအခိၚ်ကောန်ဒပ်ကံၚ်ဇြဳပၞာန်တံစၟဳတ်ဂှ် စွံအဓိကတုဲ အဟိန်စၟဳတ်ဖုၚ် ဂွံဆဵုကေတ် VPN မ္ဂး အာတ်ဒၟံၚ်လှုဲတံရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အဓိကဂှ်တှ်ေ ပ္ဍဲအခိၚ်ဍေံတံစၟဳတ်ဂှ် ဍာံဍာံဂှ် VPN ဂှ် ဟွံစၟဳတ်လေဝ်ဂွံဂှ် စွံထောံအဓိက ကုညးသၟတ်တံရ။ ပ္ဍဲကဵုဖုၚ်ညးသၟတ်တံဂှ် ဓမ္မတာမ္ဂး အရာဒှ်သံသယမွဲမွဲ ဂွံဆဵုမ္ဂး ဍေံတံစၟဳတ်ဏောၚ်။ ယဝ်ဆဵု VPN ဏံတှ်ေ ဍေံတံ မိက်ဂွံအာတ်လှုဲရ၊ ဒှ်အာသဘဴ အာတ်လှုဲရဏောၚ်” သာ်ဝွံ သ္ဂးရ။
နကဵုကံၚ်ဇြဳပၞာန် နူအခိၚ်သီအဝဵု စဵုကဵုအခိၚ်လၟုဟ် သွက်ဂွံကၟာတ်ပရိုၚ် နူမဳဒဳယျာပရေၚ်မၞိဟ်တံကဵု ပ္ဍဲအရာတြးဝါဒတံဂှ် ကျဗြံကၠုၚ်ဒၟံၚ် အဆက်က်တုဲ ဂွံကၟာတ်လဒဵု Facebook ပေၚ်ၚ်မာန်ဂှ် ဂ္စါန်ထပိုတ်ကၠုၚ် ပရေၚ်ရပ်စပ် VPN တံရ။
ဟိုတ်ဂှ်ရ နူကဵုဌာနဝန်ဇၞော် ဟွံကဵုအခေါၚ်မွဲသာ် ယဝ်ရရပ်စပ်ဒး နဲကွတ်ပညာ VPN ဟွံသေၚ်မ္ဂး နဲကွတ်ပညာ လအာတုပ်မွဲမွဲသာ်တံဂှ်မ္ဂး ဒဏ်ထံၚ်နူမွဲသၞာံ စဵုကဵုပိသၞာံ ဒှ်ဒှ် ဒဏ်သြန် သၟဝ် ၅၀ ကိုဋ်ဒှ်ဒှ်၊ သီုၜါသာ်ဏံ ဂွံဖျေံစၟတ်မာန်ဂှ် ကံၚ်ဇြဳပၞာန် ပလေဝ်ပလေတ်ဒၟံၚ် သွက်ဂွံသ္ပဒတန် မူအပြောံ သၞောဝ်ဂီုကၠီုသာ်ဗာရ။
ပရိုၚ်−သြၚ်လောန်တိုၚ်(မ်)
ဗီု−CJ