မတ်မလီု၊ ဂျောန် ၂၈
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ဂယိုၚ်ပ္တိုန်လဝ်လမျီုဂှ်ကီု သီုကဵုအခက်အခုဲပရေၚ်စသုၚ်မံၚ်စံၚ်တံဂှ်တုဲ ညးအာစိုပ်ကၠောန်ကမၠောန် ဇရေၚ်ဍုၚ်သ္အာၚ်တံ ဒးဒုၚ်ကူသာန်သွံရာန်ဗၞိက်တံ သၠုၚ်တိုန်ကၠုၚ်ရောၚ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်သၟာကမၠောန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲကာလဒပ်ပၞာန်သီအဝဵု ပွိုၚ်ပိသၞာံပြၚ်ဏံ အခေါၚ်အရာကမၠောန်ကၟိတ် အောန်စှ်ေကၠုၚ်ကီု၊ ၚုဟ်ဗၞိက်ဖျာ သၠုၚ်တိုန်ကၠုၚ် ဂၠိုၚ်ကဵုဆကီု ဟိုတ်နူအခက်အခုဲပရေၚ်စသုၚ်မံၚ်စံၚ် ဂြောဝ်ဂတာတံတုဲ ညးတိတ်ဍုၚ်သ္အာၚ် ကၠောန်ကမၠောန်တံ သၠုၚ်တိုန်ကၠုၚ်ရ။
မွဲလ္ပာ်ဂှ်ပၠန် ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ဂယိုၚ်ပ္တိုန်လဝ်လမျီုဂှ်တုဲ ညးသၟတ်ဂမၠိုၚ်ဝွံ သွက်ဂွံပါဲဒလေတ် နူကဵုပွမဒးလုပ်ပၞာန်ဂှ် ဂ္စါန်အာကၠောန်ကမၠောန် ဇရေၚ်ဍုၚ်မကြပ်တံဂှ် နူကဵုဏံ ပရေၚ်ဒးဒုၚ်ကူသာန်သွံရာန်မၞိဟ်တံ သၠုၚ်တိုန်ကၠုၚ်ရ။
ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်သၟာကမၠောန်မွဲတၠဂှ် မ္ၚးနူကဵုသၞောဝ်ယိုက်ဂၠေၚ်လျိုၚ်ပၞာန်ဂှ် သြန်ဂိတုအပ္ဍဲဍုၚ်ဂှ်လေဝ် အောန်တုဲ နူကဵုအာစိုပ်ကၠောန်ကလောန် ဇရေၚ်ဍုၚ်သ္အာၚ်တံဂှ် ဒးဒုၚ်သွံစတံကဵု ဒးဒုၚ်ကူသာန်သွံရာန်မၞိဟ်တံ ဂၠိုၚ်ကၠုၚ်ရောၚ် ဟီုရ။
“တိတ်ဍုၚ်သ္အာၚ်တံဂှ်တှ်ေ ဂၠိုၚ်ကွေံကွေံ။ ဟိုတ်ဂွံဂၠိုၚ်ဂှ်တှ်ေ ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ တိတ်ကၠုၚ်တံ နွံတုဲ အဓိကဂှ်တှ်ေ ဟိုတ်နူၚုဟ်လိၚ်ကမၠောန်တံ အောန်တုဲ ကၠောန်ဒၟံၚ်ကလောန်ဖိုဟ် ကၠောဝ်ပုၚ်တံဂှ်တှ်ေ ဒှ်ကိစ္စဒးဆေၚ်မုက်လွာဲဂှ်တံဏောၚ်။ ကိစ္စကၠောဝ်ပုၚ်တံဂှ်တှ်ေ ဍာ်ဇမၠိၚ် ဒုၚ်ဒဝ်ဟွံမာန်ပုဟ်လေဝ်။ အေ ဂှ်တှ်ေ တိတ်ကၠုၚ် နကဵုဂၠံၚ်ဍာန်နာနာသာ်တုဲ မွဲလ္ပာ်ဂှ်လေဝ် ဒးဒုၚ်ကူသာန်သွံရာန်မၞိဟ်၊ ဒးဒုၚ်သွံစတံ အပ္ဍဲဍုၚ်ဂှ်လေဝ် ကိစ္စဒးဒုၚ်လီဠာန်တံဂှ်လေဝ် ဒှ်ဒၟံၚ်တၟာဂလိုၚ်ဏောၚ်” သာ်ဝွံ ဟီုရ။
ဂွံတိတ်ဍုၚ်သ္အာၚ် ဗွဲမလုပ်သၞောဝ်ဂှ်လေဝ် ဟိုတ်နူတၚ်လလောၚ်တြး ကံၚ်ဇြဳပၞာန် မလလောၚ်ပ္တိတ်လဝ်ဂှ်ကီု၊ မ္ၚးနူကဵုတၚ်သၞောတ်ဗ္ၜတ်တံဂှ် ဟိုတ်နူအခိၚ်လအ်လတံ နွံဒၟံၚ်ဂှ်ရ ကၠတ်တိတ်ကၠုၚ်ဂၠိုၚ်တုဲ ဒးဒုၚ်ကူသာန်သွံရာန်ကၠုၚ်မၞိဟ်သာ်ဏံတံ ဒှ်ကၠုၚ်ရောၚ်ဂှ် ညးဆက်ဟီုရ။
ညးမရီုဗၚ်ရေၚ်တၠုၚ်ဒၟံၚ် ပရေၚ်ညးဒးဒုၚ်သွံရာန်မၞိဟ်မွဲတၠဂှ်လေဝ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် မဂယိုၚ်ပ္တိုန်လဝ်လမျီုဂှ်တုဲ တိတ်ကၠုၚ်ဍုၚ်သ္အာၚ် ဟွံလုပ်သၞောဝ်တံဂှ်တုဲ ပရေၚ်ဒးဒုၚ်ကူသာန်သွံရာန်မၞိဟ်တံ ဂၠိုၚ်ကၠုၚ်ကွေံကွေံတုဲ ပ္ဍဲကဵုကျာဖျတံဂှ်လေဝ် ဒးဒုၚ်သွံရာန်မၞိဟ်တံ နွံဒၟံၚ်ရောၚ် ဟီုရ။
“ပြဟ်ဟ်ဏံဂှ်တှ်ေ ဟိုတ်နူသၞောဝ်ယိုက်ဂၠေၚ်လျိုၚ်ပၞာန် မလလောၚ်ပ္တိတ်လဝ် လက္ကရဴအိုတ်ဂှ်တုဲ ပရေၚ်သွံရာန်မၞိဟ်တံ ဂၠိုၚ်ကၠုၚ်ကွေံကွေံရ။ အခိၚ်ညးသၟတ်တံ တိတ်ကၠုၚ်ဒၟံၚ်လ္ပာ်မ္ၚးဏံ နကဵုနဲကဲနာနာသာ်ဂှ် ဟိုတ်နူတိတ်ကၠုၚ် ဂၠံၚ်ဟွံလုပ်သၞောဝ်တံဂှ်တုဲ ပရေၚ်သွံရာန်မၞိဟ်တံ က္တဵုဒှ်ရ။ လၟုဟ်ဂှ် ကိစ္စကျာဖျဂှ်လေဝ် လှဲလးကၠုၚ်ဒၟံၚ် သိုက်က်ယျ။ ပွန်အဓိကဂှ်လေဝ် စွံကၠုၚ်လ္တူညးသၟတ် နူကဵုဒေသတိဍာ်ဟွံညိၚ်ဝတ်တံဂှ် ဂွံဆဵုကေတ်ရ။ လ္ပာ်ဏံဂှ်လေဝ် ဟွံမိက်လုပ်ပၞာန်တုဲ ဂဗကဵုရဲလီဠာန် နူကမၠောန်ကျာဖျတံဂှ်တုဲတှ်ေ ပရေၚ်သွံရာန်မၞိဟ်တံ က္တဵုဒှ်အာရ” သာ်ဝွံ သ္ဂးရ။
သ္အာၚ်နူဂှ်ပၠန် ညးဒးဒုၚ်သွံရာန်မၞိဟ်ဗွဲမဂၠိုၚ်ဝွံ ဒးဒုၚ်သွံစ ပ္ဍဲကမၠောန်ကျာဖျတံကဵု ကမၠောန်ဟွံလုပ်သၞောဝ်တံ နွံတုဲ ဒးဒုၚ်ရေက်ကးပ္တိတ်ပရဲ ပ္ဍဲသြန်ဂိတုတံဂှ်ကီု၊ ဒးဒုၚ်ဍဵုဍိုက်ပျဲပျာံတံ ဒှ်တမ် နွံဒၟံၚ်ရောၚ် ညးဆက်ဟီုရ။
ညးဒးဒုၚ်သွံရာန်မၞိဟ်ဗွဲမဂၠိုၚ်ဂှ်ဝွံ အကြာအာယုက် ၁၈ ကဵု အာယုက် ၄၅ သၞာံတံဂှ် ဒးဒုၚ်သွံရာန်ဒၟံၚ်မၞိဟ် ဂွံဆဵုကေတ်တုဲ နူကဵုဒေသတိဍာ်ဟွံညိၚ်ဝတ် ပေါဲဗ္တိုက်က္တဵုဒှ်ဒၟံၚ်တံဂှ် ဒးဒုၚ်ကူသာန်သွံရာန်ဒၟံၚ်မၞိဟ်ဂၠိုၚ်အိုတ်ရောၚ် ဂွံတီကေတ်ရ။
အတိုၚ်လိက်ဒုၚ်စဳရေၚ် ပရေၚ်သွံရာန်မၞိဟ်ဍုၚ်နာနာ ဌာနကာဍုၚ်သ္အာၚ်အမေရိကာန်ဂှ်မ္ဂး ဆက်စၟတ်လဝ် ဍုၚ်ဗၟာ ပ္ဍဲကဵုကဆံၚ်ဒးဒုၚ်ကူသာန်သွံရာန်မၞိဟ် Tier 3 ဂှ်ရောၚ် ပ္ဍဲဂိတုဂျောန် ၂၄ တုဲကၠုၚ်တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)