မြဝတဳ၊ သေပ်တေမ်ဗာ (၁၇)
ပ္ဍဲကဵုသၞေဟ်ကၚ်စၟဳစၟတ် ကံၚ်ဇြဳပၞာန် မွဲဒမြိပ်ဂၠံၚ်ဇၞော်အာယှ မြဝတဳ−ကအ်ကြိက်၊ တွဵုရးကရေၚ်ဂှ် ဒပ်ကံၚ်ဇြဳပၞာန် လိၚ်ကောန်အရာပ်တံတုဲ ဗက်အာတ်သြန်တံ ကၠောန်ကၠုၚ်နကဵုဗီုပြၚ်တၟိရဂှ် သၟာဗၞိက်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်ရ။
ဗွဲကြဴဒပ်ပၞာန်သီအဝဵုတုဲ ဒပ်ကံၚ်ဇြဳပၞာန်ဝွံ မွဲဒမြိပ်ဂၠံၚ်ဇၞော်အာယှဂှ် ပံက်သၠဲပ္တိုန်ကၠုၚ် သၞေဟ်ကၚ်စၟဳစၟတ်တံတုဲ ပ္ဍဲကဵုသၞေဟ်ကၚ်စၟဳစၟတ်တံဏံလေဝ် လ္တူကွဳစက်ဖ္ဍိုက်ဗၞိက်တံကဵု ကွဳစက်ဖ္ဍိုက်မၞိဟ်အာတရဴတံဂှ် ဗက်အာတ်ကၠုၚ်သၠုဲတံ ကၠောန်ကၠုၚ်အဆက်က်ရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ ထ္ၜးဟိုတ်ပရေၚ်ဂီုကၠီုတုဲ ကွဳစက်ဖ္ဍိုက်ဗၞိက် မပါလုပ် သီုကွဳစက်ဖ္ဍိုက်မၞိဟ်အာတရဴ မအာကၠုၚ်ဒၟံၚ် မွဲဒမြိပ်ဂၠံၚ်ဇၞော်အာယှဂှ်တုဲ ပွမဂၠိုၚ်ဂၠါဲစၟဳစၟတ်တံဂှ် ဗီုကြိုက်စိုတ် ကၠောန်ၜိုတ်ဒၟံၚ်ရ။
အခါလၟုဟ် ဒပ်ကံၚ်ဇြဳပၞာန်ဝွံ ပ္ဍဲသၞေဟ်ကၚ်စၟဳစၟတ်တံဂှ် အလဵုဍေံတံ ပွမအာတ်သြန်တံဂှ် ဟွံကၠောန်ရတုဲ လိၚ်ကောန်အရာပ်တံတုဲ ကဵုအာတ်ကၠုၚ်သြန်တံရဂှ် သၟာဗၞိက်ပယျဵုမွဲတၠ ဟီုရ။
“နူဗဒါဲဂၠံၚ် ဗ္ဒိုပ်တေံဂှ် ၜိုတ်လဵုဍိုဟ်တှ်ေဟီုမ္ဂး လိၚ်ကောန်အရာပ်တံတုဲ ကဵုကံက်လှုဲတံ နကဵုပံၚ်မဳဂၠေံဂၠေံ ကၟာဲထာၚ်ကၟာဲတုဲ ဗက်ကံက်ကွဳစက်ဗၞိက်တံ အေဗီုတံဏံ၊ ကွဳစက်လှုဲအောန်ဂှ်တှ်ေ တိုန်လ္တူကွဳစက်ကာဂှ်တုဲ သီုစၟဳစၟတ်ဒၟံၚ်ဏီ၊ အေတံဏံဂှ် ကောန်ပၞာန်တံ ဟွံသေၚ်ပုဟ်၊ ကောန်ပၞာန်တံဂှ် ဂ္ဇအ်ပ္ဍဲဗ္ဒိုပ်ၜိုဟ်ဟ်သြိုဟ်ဟ်တုဲ လိၚ်လဝ်ကောန်အရာပ်တံ ကဵုဂိတုတုဲ စကာဒၟံၚ်အိုတ်ရ၊ ဣဏံဂှ် ဗီုပြၚ်တၟိ ဍေံတံ မထပ်ကံက်ကၠုၚ်လ္တူဗလးဒဵုရေၚ် ဂၠံၚ်မြဝတဳဂှ်ရ” သာ်ဝွံ ညး ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဂှ် ပ္ဍဲဂၠံၚ်ဇၞော်အာယှမြဝတဳဂှ် ပံက်သၠဲပ္တိုန်သၞေဟ်ကၚ်စၟဳစၟတ်တံတုဲ မ္ၚးနူဗက်ကံက်လှုဲဂှ် သီုကဵုဂၠိုက်ဂၠါဲစၟဳစၟတ်ကၟာတ်ဆိုအ်ဗဒၟံၚ်တံတုဲ တရဴလအ်လတံ မၞုံဒၟံၚ်ရ။
ဒပ်ကံၚ်ဇြဳပၞာန်ဝွံ ပ္ဍဲအရာဗက်အာတ်သြန်တံဂှ် တန်တဴကဵုကွဳစက်တုဲ မွဲဖ္ဍိုက်မ္ဂး နူ (၁၀၀၀) ဒ္ကေဝ် စဵုကဵု (၁၀၀၀၀) ဒ္ကေဝ် ပွမကံက်ဒၟံၚ်တံ ကၠောန်ၜိုတ်ဒၟံၚ်တုဲ ကွဳစက်တၚ်နၚ် ဟွံဍိုက်ပေၚ်တံဂှ်မ္ဂး အာတ်ဒၟံၚ်သြန် ဂၠိုၚ်ကဵုကိုဋ်ရ။
အပ္ဍဲဂိတုအဝ်ဂါတ် တုဲကၠုၚ်တေံဂှ် ပရေၚ်သၠာဲဂတးဗၞိက်ပယျဵု မြဝတဳ−သေံဝွံ ဟိုတ်နူကံၚ်ဇြဳပၞာန် သၞောတ်ဗ္ၜတ်ထိၚ်ဒက်လဝ် သြန်ဍုၚ်သ္အာၚ်တံတုဲ သြန်ၝာတ်သေံ သၠုၚ်တိုန်ကၠုၚ် ကဵုဆဂှ်ရ ပွမသၠာဲဂတးဗၞိက် က္တဵုဒှ်အာ ကြပ်ဒးဒေါအ်ဒေၚ်ရ။
ကၟိန်ဍုၚ်ဗၟာဝွံ နူပယျဵုမြဝတဳမွဲကဆံၚ် ပလံၚ်ဗစိုပ်ဒၟံၚ် အပ္ဍဲဍုၚ်သေံတေံ မပ္တံ သတ်ဂန် မပါလုပ် ကပေါတ်တိတ်နူ ပရေၚ်တဵုလွဳတံတုဲ ဍုၚ်သေံဂှ် ပၠောပ်ပ္တိုန်ဒၟံၚ် လ္ပာ်ဍုၚ်ဗၟာ ဗၞိက်စသ္ဇိုၚ်၊ ဂဥုဲဇဗ၊ ဗၞိက်ပယျေဝ်၊ ကပေါတ်ဗၞိက်အရပ်စပ်မၞိဟ် ကေုာံ ကပေါတ်ဗၞိက်အပြောံ မသ္ဂောံရပ်စပ်ပရေၚ်သိုၚ်ခၞံတံ မဒှ်ရ။
ပရိုၚ်−သြၚ်လောန်တိုၚ်(မ်)