နေဗျဳဒဝ်၊ ဂျူလာၚ် ၂၄
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဝွံ သီုကဆံၚ်ဂအုပ်ဒပ်ပၞာန်ဗၟာဂှ် စနူအခိၚ်သီအဝဵုကၟိန်ဍုၚ် နကဵုလွဟ်တုဲ ဒဵုကဵုအခိၚ်လၟုဟ် ကေတ်လဝ်ကဆံၚ်ဌာနန္တရသၠုၚ်အိုတ်ဂှ် စဵုကဵုပန်ဒၞါဲရ။
သီုကဵုကဆံၚ်သမ္မတယာယဳ မလှဲပြံၚ်ကေတ်လဝ် တဴတဴလဴလဴဏံဂှ်ကီု၊ သီုကဵုကဆံၚ်ဥက္ကဌ ကံၚ်ဇြဳပၞာန် သီအဝဵုတုဲ ဒက်ပ္တန်လဝ်တံဂှ်ကီု ကဆံၚ်သ္ကိုပ်ဝန်ဇၞော်ကၟိန်ဍုၚ်ဂှ်လေဝ် က္ဍိုပ်သ္ကိုပ်ပၞာန် ဒှ်သဘဴခါန်ကၞက်ပ္တိုန်လဝ် ကေတ်တ်ရ။
ပ္ဍဲကဵုတၠအဝဵုပၞာန် ပ္ဍဲဝၚ်ဍုၚ်ဗၟာဏံဂှ်တှ်ေ သ္ကိုပ်ပၞာန်ဇၞော် မေန်အံၚ်လှာၚ်မွဲတၠဓဝ်ဟေၚ် ကဆံၚ်ဌာနန္တရၜိုတ်နွံ ပပ္တံနူကဵုဂအုပ်ဒပ်၊ သ္ကိုပ်ဝန်ဇၞော် စဵုကဵုသမ္မတယာယဳ သီုဖအိုတ်ဂှ် ကေမ်ဇျှာပ်လဝ်ရ။
အကာဲအရာဏံဝွံ ဒဒှ်ရက္ဍိုပ်သ္ကိုပ်ပၞာန် လ္တူညးလဵုမွဲမှ ဓဝ်ဟွံပတှ်ေဟွံမွဲဂှ် ထ္ၜးဒၟံၚ်ရောၚ် ဥူနေဖုၚ်လာတ် ညးမၞုံအခေါၚ်ဟီုဂး ရုၚ်သ္ကိုပ်ဝန်ဇၞော် အလဵုအသဳညဳသၟဟ်ဂကူ NUG ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကဆံၚ်သၠုၚ်ၚ် ၜိုတ်နွံဂှ် ညးမွဲဓဝ် ဒှ်သဘဴကေတ်လဝ်ဖအိုတ်ရ။ ညအ်ဂှ်မုထ္ၜးဒၟံၚ်ရောဟီုတှ်ေ ပါဲနူညးတုဲ မၞိဟ်လဵုမွဲမှ ဓဝ်ပတှ်ေဟွံမွဲပုဟ်ဟီုဂှ် ဓဝ်ဖေက်နွံဒၟံၚ်ပ္ဍဲညး၊ ပရေၚ်ထ္ကးပြး အပ္ဍဲညးတံ၊ ထ္ၜးပျးဒၟံၚ် အရာတံဏံသီုဖအိုတ်ရောၚ်ဂှ် ညာတ်ကေတ်ရ” သာ်ဝွံ သ္ဂးရ။
သွပ်လ္ပအ်က္ဍိုပ်သ္ကိုပ်ပၞာန် သ္ဂောံဒှ်သမ္မတဂှ်ဝွံ အခိၚ်သမ္မတယာယဳ ဥူမျေတ်ဇြိုယ် နူကံၚ်ဇြဳပၞာန် ခါန်ကၞက်ပ္တိုန်လဝ်ဂှ် ပရေၚ်ထတ်ယုက်ဟွံခိုဟ်ဒှ်ကၠုၚ်ဂှ် ထ္ၜးဟိုတ်ကဵုပရေၚ်ဂီုကၠီုကာစဵုဒၞါတုဲ ဒှ်ကၠုၚ်သွက်ဂွံထ္မံက်ရုပ်ရဴ နတဲရ။
အခိၚ်အာယုက်ကာလကာတၟေၚ် ကံၚ်ဇြဳပၞာန် ပပဵုပ္တိုန်လဝ် သှ်ေဒၟံၚ်ၜိုတ်မွဲသတ္တာဟပြၚ်ဓဝ်ဂှ် ဥူမျေတ်ဇြိုယ် ကေတ်လဝ်အခေါၚ်ဂဥုဲ ဟိုတ်နူပရေၚ်ထတ်ယုက်ဂှ် ကဵုလဝ်တာလျိုၚ် ကုက္ဍိုပ်သ္ကိုပ်ပၞာန် နဒဒှ်သမ္မတယာယဳရ။
ပ္ဍဲဂိတုဂျူလာၚ် ၂၂ အခိၚ်ဇိုၚ်သဝ်တ္ၚဲ အတိုၚ်တၚ်လလောၚ်တြး ကံၚ်ဇြဳပၞာန် လလောၚ်ပ္တိတ်လဝ်ဂှ်မ္ဂး ကိစ္စစပ်ကဵုကံၚ်ဇြဳဂီုကၠီု ကာစဵုဒၞါကောန်ဂကူတံဂှ် ဗီုနွံပၟိက် သွက်ဂွံဆက်ကၠောန်မာန်ဂးတုဲ ထ္ၜးလဝ်ဟိုတ်ရ။
ဆ္ဂး ရပ်စပ်ထ္မံက်ထ္ၜးဏာလဝ် ၝောံပိုဒ်၊ တၚ်စၞောန်ပျး ပါလုပ်ပ္ဍဲသၞောဝ်သ္ဇိုၚ်ဒက်ပ္တန် ၂၀၀၈ တံဂှ်ဟွံမွဲမွဲသာ် ဥူမျေတ်ဇြိုယ် လှဲပြံၚ်ကဵုလဝ်တာလျိုၚ်သမ္မတယာယဳ ကုက္ဍိုပ်သ္ကိုပ်ပၞာန်ရ။
ဥူကျဳမျေတ် ညးရေၚ်တၠုၚ်ဂဗုတ်ကၠတ်ထဝ်သၞောဝ်ဓဝ်ဝှ်ကြံၚ်ဂှ် ပ္ဍဲကဵုသၞောဝ်သ္ဇိုၚ်ဒက်ပ္တန်ဂှ် ဗီုလဵုဂွံခါန်ကၞက်ပ္တိုန် သမ္မတ ကေုာံ ဒုသမ္မတတံဂှ် စၞောန်ပျးလဝ်တုဲတုဲဂှ်ရ ကၠောန်သ္ပသာ်ဏံဂှ်ဝွံ ကဵုသၞောဝ်ဂှ်မွဲမှဟွံကိတ်ညဳတုဲ ဒှ်သဘဴအလဵုညး ခါန်ကၞက်လဝ်ကေတ်တ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဗီုလဵုဂွံခါန်ကၞက်ရောဟီုဂှ် စၞောန်ပျးလဝ်တုဲတုဲရ။ ကဵုတၚ်နၚ်တံဏံ မွဲမှဟွံကိတ်ညဳတုဲ ဒှ်ဒၟံၚ်သဘဴ ဇကုဇကုခါန်ကၞက်လဝ်ကေတ်တ်ရ။ စၟတ်တဲဥူမျေတ်ဇြိုယ်လေဝ် ဟွံညာတ်ပုဟ်။ ဍေံတံ ဟီုဂှ်ဟီုမံၚ်ရ။ ဆ္ဂး ပ္ဍဲကဵုလိက်နူရုၚ်သမ္မတ ကဵုလဝ်ပရိုၚ်ဂှ် စၟတ်တဲဥူမျေတ်ဇြိုယ်လေဝ် ဟွံဂွံဆဵုကေတ်ပုဟ်။ ညအ်ဂှ် မွဲမှဟွံကိတ်ညဳကဵု သၞောဝ်ပုဟ်။ ဟိုတ်နူဟွံကိတ်ညဳတုဲ ဒှ်အာသဘဴဟွံဒ္ဂေတ်ဗက် သၞောဝ်သ္ဇိုၚ် ၂၀၀၈ ဂှ်ရ” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ ရုၚ်သမ္မတယာယဳ ကြဴနူပလံၚ်နၚ်လိက် ကုရုၚ်ကံၚ်ဇြဳပၞာန် ဒဒှ်ရလှဲပြံၚ်ကဵုအာတာလျိုၚ်သမ္မတယာယဳ ကုက္ဍိုပ်သ္ကိုပ်ပၞာန်ဂှ်တုဲ နူကဵုဏံ ပ္ဍဲဂိတုဂျူလာၚ် ၂၂ အခိၚ်နူဂယး ၁၁ နာဍဳဝိုက်ဂှ် ထ္ပက်စၟတ်တဲ လှဲပြံၚ်ကေတ်လဝ် တာလျိုၚ်သမ္မတယာယဳဂှ်ရောၚ် လလောၚ်ပ္တိတ်လဝ်ရ။
ဆ္ဂး လိက်လှဲပြံၚ်ကဵုတာလျိုၚ် နကဵုစၟတ်တဲဥူမျေတ်ဇြိုယ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ် ဗွဲမလုပ်သၞောဝ်ဂှ် ဟွံမွဲရ။
ဥူမျေတ်ဇြိုယ်ဝွံ ဒၟါနူအကာဲအရာပရေၚ်ထတ်ယုက်တုဲ ကေတ်လဝ်အခေါၚ်ဂဥုဲ နူဂိတုဂျောန် ၁၈ စဵုကဵုဂိတုဂျူလာၚ် ၃၀ ဂှ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ် ပ္ဍဲဂိတုဂျူလာၚ် ၁၈ တေံရ။
ကြဴနူဂှ်တုဲ ပ္ဍဲဂိတုဂျူလာၚ် ၃၁ ဏံ အာယုက်ကာတၟေၚ် ကံၚ်ဇြဳပၞာန် အိုတ်ဏောၚ်ဂှ်ရ သွက်ကောံဓရီုကံၚ်ဇြဳဂီုကၠီု ကေုာံ ကာစဵုဒၞါပရေၚ်ဂကူဂှ် ဒးလှဲပြံၚ်ကေတ်လဝ် တာလျိုၚ်သမ္မတယာယဳသာ်ဏံရ။
ဟိုတ်ဂှ်ရ ပ္ဍဲကဵုကောံဓရီုကံၚ်ဇြဳဂီုကၠီု ကေုာံ ကာစဵုဒၞါကောန်ဂကူဂှ် သ္ကိုပ်ဗိုလ်ဇၞော် မေန်အံၚ်လှာၚ် ကေတ်လဝ်တာလျိုၚ်သမ္မတယာယဳဂှ် ဒှ်ကၠုၚ်ပူဂဵုအဝဵုသၠုၚ်အိုတ်တုဲ ဗီုနွံပၟိက် အခေါၚ်သ္ဂုတ်သွာတ်နွံမံၚ်ပေၚ်ၚ်ရ။
ဥူဖေတာန် သၟာပရေၚ်ဍုၚ်ကွာန်ဝှ်ကြံၚ်ဂှ် အဝဵုအခေါၚ်ဖန်ဖက်တံဝွံ ဟိုတ်နူစိုပ်အာ ပ္ဍဲတဲက္ဍိုပ်သ္ကိုပ်ပၞာန်ယျဂှ်ရ ဂတဏံ ဂွံအာသာ်လဵုရောဟီုဂှ် တန်တဴဒၟံၚ်လ္တူညးရောၚ် ထံက်ထ္ၜးလဝ်ရ။
“အဝဵုအခေါၚ်ဖန်ဖက်ညးဂှ်တှ်ေ သီုပန်သာ်ဂှ် စိုပ်အာတဲညးယျ။ ဒှ်အာတၠအဝဵုဇေတ်တ်ယျဂှ် ဟီုဂွံရ။ အေ ဂှ်တှ်ေ အာဂတနူဏံ ပဋိပက္ခဒှ်ဒၟံၚ်လၟုဟ်ဏံဂှ် သောၚ်ကလးအာ နကဵုပရေၚ်ပၞာန်ဟာ ဟွံသေၚ်မ္ဂး အာကဵုပရေၚ်ဍုၚ်ကွာန်ဟာ။ ကၠာတေံဂှ် ဒးပ္တိုန်ထ္ၜးဒၟံၚ် ကောံဓရီုဂီုကၠီုစဵုဒၞါဂှ်ဏီဏောၚ်။ လၟုဟ်ဂှ်တှ်ေ ကောံဓရီုဂီုကၠီုစဵုဒၞါဂှ်လေဝ် သွက်ဒပ်ပၞာန်ဂှ် ဂၠိုၚ်ဒၟံၚ်ဏီဏောၚ်” သာ်ဝွံ သ္ဂးရ။
အခိၚ်လၟုဟ် ကံၚ်ဇြဳပၞာန်ဝွံ ပ္ဍဲကဵုပွိုၚ်ဍုၚ် နူကဵုရးသေံသ္ကုတ်သၟဝ်ကျာ၊ ရခေၚ် ကေုာံ ရးမာန္တလေဝ်တံဂှ် ဒးဆေၚ်ဒၟံၚ်မုက်ကဵု ပၞာန်ထ္ပက် သီဗ္ဒိုပ်သီဍုၚ် ဒပ်ပံၚ်ကောံပၠန်ဂတး ကေုာံ ဂကောံရပ်လွဟ်ကောန်ဍုၚ်အရၚ် ဖျေံသ္ဇိုၚ်အပ္ဍဲဒေသတံရ။
ညးခါတ်အကာဲပရေၚ်ဍုၚ်ကွာန်တံဂှ်တှ်ေ နကဵုကံၚ်ဇြဳပၞာန် သွက်ဂွံဂွံစေဝ်လ္တူ ပ္ဍဲကဵုပရေၚ်ပၞာန်တံဂှ် ဒှ်သဘဴသ္ဂောံဗ္တိုက်အာနွံဂှ်ရ ထပ်ပပဵုပ္တိုန်အာ အာယုက်ကာလကာတၟေၚ် ၆ ဂိတုမာန်ဒၟံၚ်ဂှ် သ္ၚဳဂၠိပ်လဝ်ရ။
စနူကဵုဍုၚ်ဇိုၚ်ဝုတ်ဒိုဟ်တံ ဒးလှေံလှန်ဒၟံၚ် နကဵုက္ဍိုပ်သ္ကိုပ်ပၞာန် ညံၚ်ဂွိုအ်ကၠောန်သ္ပဆဆဵုတံဂှ် နွံတုဲ သ္ကိုပ်ဗိုလ်ပၞာန်တံဂှ်လေဝ် သွက်ဂွံကၠောန်သ္ပအပြံၚ်အလှာဲဂှ် ဖ္တိုက်ဖ္အောဝ်ကီုလေဝ် ဟွံဒုၚ်တဲမွဲသာ် ကၞောတ်တဲ ကၠောန်အာပြဝဒိုဟ်ဓီုတံဂှ်ရောၚ် ဥူနေဖုၚ်လာတ် သ္ပလဝ်တၚ်စၟတ်ရ။
ညးခါတ်အကာဲပရေၚ်ဍုၚ်ကွာန်တံဂှ်လေဝ် နကဵုက္ဍိုပ်သ္ကိုပ်ပၞာန် ကေတ်လဝ်ကဆံၚ်ဌာနန္တရသၠုၚ်အိုတ် စဵုကဵုပန်ဒၞါဲဂှ်ဝွံ ဒှ်သဘဴလလောၚ်တြးကၠေံ သောၚ်ကလးအာပြသၞာပရေၚ်ဍုၚ်ကွာန်လၟုဟ်ဏံ နကဵုပရေၚ်ပၞာန်ရဏောၚ်ဂှ်တုဲ ဍုၚ်ကွာန်ဂှ် ဒးဆေၚ်အာမုက် ကုဘဲပၞာန်အပ္ဍဲဍုၚ် လ္တူဂၠးတိဏံ ပရေံအိုတ်ဂှ်ရောၚ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CINCDS