ရေဝ်၊ ဂျူလာၚ် ၂၅
ကရောၚ်ပၞာန်ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲလ္တူကုန်ကျာ် ကွာန်တၟိတၟအ်ကၞေၚ် ပွိုၚ်ဍုၚ်ရေဝ် တွဵုရးဍုၚ်မန်ဂှ် ဒပ်ပံၚ်ကောံ ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD တံ လုပ်စိုပ်ဗ္တိုက်လဝ်ရောၚ် ဂွံတီကေတ်ရ။
ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲကျာ်စေတဳကွာန်တၟိကုန်ဗဴ နကဵုဇြဟတ်ဒပ် ဗ္ဒါဲ ၁၀၀ ဂှ် ပ္ဍဲဂိတုဂျူလာၚ် ၂၃ အခိၚ်ဇိုၚ်သဝ်တ္ၚဲ ၜိုတ် ၆ နာဍဳဂှ် ဗော်ဍုၚ်မန်တၟိ AD ကဵု ဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ်ဗ္ဒါဲ ၂၀ မိနေတ်တုဲ လ္ပာ်ကံၚ်ဇြဳပၞာန်မွဲတၠ ချိုတ်တုဲ ဇီုကပိုက်ကလိဂွံဝပ်တံလေဝ် နွံဒၟံၚ်ရောၚ် နာဲဗညာမန် ညးမၞုံအခေါၚ်ဟီုဂး ဗော်ဍုၚ်မန်တၟိ AD ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်ဂှ် လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံ ဇီုကပိုက်ကလိဂွံဝပ် ဟွံမွဲဂှ်ကီု၊ အခိၚ်လၟုဟ် ပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ရောၚ် ဂွံတီကေတ်ရ။
ကရောၚ်ပၞာန်ကံၚ်ဇြဳပၞာန်ဏံဝွံ တုဲကၠုၚ်ပ္ဍဲဂိတုဂျူလာၚ် ၂၂ တေံ ကၠုၚ်စိုပ်ဖျေံလဝ်ဒပ် ပ္ဍဲကျာ်စေတဳကွာန်တၟိကုန်ဗဴ ပ္ဍဲကွာန်တၟိတၟအ်ကၞေၚ်ဂှ်ရ။
အတိုၚ်ဂလာန် ညးတာလျိုၚ် ဒပ်ပံၚ်ကောံ ဂကောံဇြဟတ်ပၠန်ဂတးတံဂှ်မ္ဂး ပ္ဍဲကရောၚ်ပၞာန်ကံၚ်ဇြဳပၞာန်ဂှ် ကောန်ပၞာန်စှ်ေနူတန်ဗ္တောန်ကွတ်ပၞာန် ပါလုပ်ဒၟံၚ် ဗွဲမဂၠိုၚ်ဂၠေၚ်ရောၚ် သ္ဂးရ။
ပရေၚ်ဗ္တိုက်ဏံဂှ် ဗော်ဍုၚ်မန်တၟိ AD ၊ ကရောၚ်ပၞာန်ဒံၚ်ညဵု YPDF ၊ တပေန်ယှိုဲထဳ ကေုာံ (ပဒဲကော) ဒပ်တံဏံ ပါလုပ်ဗ္တိုက်လဝ်ရ။
ပ္ဍဲပွိုၚ်ဍုၚ်ရေဝ် မလလောၚ်တြးလဝ် ပရေၚ်အုပ်ဓုပ်ပၞာန်ဂှ် စနူဂိတုဏံမံက်တုဲ လ္ပာ်ကံၚ်ဇြဳပၞာန် ထ္ပက်ကၠုၚ်ဒၟံၚ်ကရောၚ်ပၞာန် နကဵုက္ဍိုပ်လိက်ပရေၚ်အုပ်ဓလီုတိဍာ်ဂှ် နွံဒၟံၚ်တုဲ ပေါဲဗ္တိုက်ၜါလ္ပာ်တံ ကလေၚ်က္တဵုဒှ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−NMSP