ဘာပန်၊ ဂျူလာၚ် ၂၅
ကုန်ဗျူဟာဒပ်ကံၚ်ဇြဳပၞာန် နွံသၠုၚ်ကျာဍုၚ်ဘာပန် တွဵုရးကရေၚ်ဂှ် ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ဆက်ဗိုၚ်ကၟာတ်လဒဵု ဗ္တိုက်ဒၟံၚ်တုဲ လ္ပာ်ဒပ်ကံၚ်ဇြဳပၞာန်လေဝ် သွက်ဂွံကဵုအရီုဗၚ်ပၞာန်ဂှ် ပ္တိတ်ဒၟံၚ်ဇြဟတ်ရောၚ် ညးမၞုံအခေါၚ်ဟီုဂး ဒပ်မဟာ ၅ သ္ကိုပ်ဗိုလ်ဇၞော်သဝ်ကလာဒိုဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုမာတ်တုဲကၠုၚ်တေံတုဲ ဒပ်ပံၚ်ကောံပၠန်ဂတး သၟဝ်ပၠတရဴ ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA တံ စကၟာတ်လဒဵုဗ္တိုက်လဝ် ကုန်ဗျူဟာ ကေုာံ ဗ္ဒိုပ်ဌာန်ဂအုပ်တမ်ဒပ်ကံၚ်ဇြဳပၞာန် နွံသၠုၚ်ကျာ ဍုၚ်ဘာပန်ဂှ်ရ။
ဍုၚ်ဘာပန်ဂှ် တုဲကၠုၚ်ဂိတုဖေဖဝ်ဝါရဳကြပ်အိုတ်တေံ ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ဗ္တိုက်သီဂွံလဝ်တုဲ ဆက်ကၟာတ်လဒဵုဗ္တိုက်လဝ် ဗျူဟာကံၚ်ဇြဳပၞာန် ကေုာံ ဌာန်ဂအုပ်တမ်ဒပ် နွံသၠုၚ်ကျာဍုၚ်ဘာပန်ဂှ်တုဲ ဗ္တိုက်သီဂွံလဝ် တမ်ဒပ်ကံၚ်ဇြဳပၞာန်ပိ ခလရ ၁၉၊ ခမရ ၄၃၄၊ စစန ၆၄၂ တံ မဒှ်ရ။
အခိၚ်လၟုဟ် ဒပ်ပံၚ်ကောံပၠန်ဂတး သၟဝ်ပၠတရဴ KNLA တံဂှ် ဆက်ဗိုၚ်ကၟာတ်လဒဵုဒၟံၚ် ကုန်ဗျူဟာဘာပန်ကဵု ခမရ ၃၄၀ ၊ ခမရ ၃၄၁ တံဂှ်တုဲ နူကဵုဗ္ဒိုပ်ဒပ်(ခေါပုတ်) နွံလ္ပာ်လ္တူ ဍုၚ်ဘာပန်ဂှ်မွဲကဆံၚ် ဒပ်ကံၚ်ဇြဳပၞာန် သွက်ဂွံကဵုပၞာန်အရီုဗၚ်ဂှ် ပ္တိတ်ဒၟံၚ်ဇြဟတ်ရ။
ကောန်ဒပ်ကံၚ်ဇြဳပၞာန် ဂြိပ်တိတ်ကၠုၚ်လဝ် နူကဵုဗ္ဒိုပ်ဒပ်ကံၚ်ဇြဳပၞာန် နွံဗ္ဒါဲပယျဵုသေံ ၅ ဗ္ဒိုပ်တံ ကလေၚ်ကောံမံၚ်ဒၟံၚ်ညးသ္ကအ် ပ္ဍဲကဵုဗ္ဒိုပ်ဒပ်(ခေါပုတ်) ဒပ်ကံၚ်ဇြဳပၞာန်ဏံဂှ်တုဲ ဇြဟတ် ၁၀၀ ပြၚ်နွံတုဲ သွက်ဂွံကဵုအရီုဗၚ်ပၞာန် ကုဗျူဟာဘာပန်ဂှ် ပ္တိတ်ဒၟံၚ်ဇြဟတ်ရောၚ် တမ်ရိုဟ်ပရိုၚ်အပ္ဍဲဒေသတံ ထ္မံက်ထ္ၜးဒၟံၚ်ရ။
ကောန်ဒပ်ကံၚ်ဇြဳပၞာန် ကလေၚ်ကောံမံၚ်ဒၟံၚ် ပ္ဍဲဗ္ဒိုပ်ဒပ် (ခေါပုတ်) တံဂှ်ဝွံ ပ္တိတ်ဒၟံၚ်ဇြဟတ် သွက်ဂွံကလေၚ်ကဵုအရီုဗၚ်ပၞာန် ကုဗျူဟာဘာပန်ဂှ်ကီုလေဝ် ဟိုတ်နူဒပ်ပံၚ်ကောံပၠန်ဂတး ဒပ်မဟာ ၅ KNLA တံ ကၟာတ်လဒဵုလဝ်တုဲ ကောန်ဒပ်ကံၚ်ဇြဳပၞာန်တံဝွံ ဒဵုကဵုအခိၚ်လၟုဟ် တိတ်ကၠုၚ်နူကဵုဗ္ဒိုပ်ဂှ် ဟွံဂွံဏီပုဟ်ဂှ် သ္ကိုပ်ဗိုလ်ဇၞော်သဝ်ကလာဒိုဝ် ဟီုရ။
သ္အာၚ်နူဂှ်ပၠန် ဗ္ဒိုပ်ဗျူဟာဘာပန်ဂှ်လေဝ် ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ဗိုၚ်ကၟာတ်လဒဵုလဝ်ဖိုဟ်တုဲ နူကဵုဍုၚ်ကမမံၚ်မွဲကဆံၚ် ဒပ်ကံၚ်ဇြဳပၞာန် ကေုာံ ဒပ် BGF တံ ပံၚ်တောဲတုဲ တိုန်ကၠုၚ်ဒၟံၚ် လ္ပာ်ဘာပန်ရောၚ် ဂွံမိၚ်ကေတ်ကီုလဝ် ဟွံစိုပ်ကၠုၚ် ဒဵုကဵုဘာပန်ဏီပုဟ်ဂှ် သ္ဂးရ။
လ္ပာ်ကံၚ်ဇြဳပၞာန်ဂှ်တှ်ေ ညံၚ်ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ဟွံဂွံသီဂွံ ဗျူဟာဘာပန်ဂှ် ရပ်စပ်လဝ် အရီုဗၚ်တရဴကျာတံ ဇၞော်ကဵုဇြဟတ်တုဲ ပ္ဍဲပရေၚ်ဗ္တိုက်ကဵုတရဴကျာဏံဂှ်လေဝ် ပန်ပှော်စုတ်လဝ် ပ္ဍဲကဵုဒၞါဲကောန်အရာပ်မံၚ်တံဂှ်ရ ကောန်အရာပ်ဇီုကပိုက်ချိုတ် ကလိဂွံလဝ်ဝပ်တံ နွံဒၟံၚ်ရ။
အပ္ဍဲတိဍာ်ဒပ်မဟာ ၅ ခရိုၚ်ဘာပန်ဂှ် တိဍာ်ဗွဲမဂၠိုၚ်ဂှ် ဒပ်ကံၚ်ဇြဳပၞာန် ထိၚ်ဒက်အုပ်ဓလီုဂွံလဝ် ဟွံမွဲရဂှ်တုဲ နူကဵုဗလးတိဏံမွဲကဆံၚ် ပလံၚ်ဗစိုပ်ကဵုအရီုဗၚ်ပၞာန်တံဂှ် ကၠောန်ဟွံမာန်ရတုဲ ပ္ဍဲအရာပလံၚ်ဗစိုပ်ဇွောံမ ကေုာံ ကပေါတ်ကညောတ် သွက်ကောန်ဒပ်ညးတံဂှ်လေဝ် ဒးရပ်စပ်ဒၟံၚ် က္ၜၚ်ကျာသၞေၚ်ဝဲသၟးရ။
အတိုၚ်တၚ်လလောၚ်တြး ဌာန်ဂအုပ် ဒပ်မဟာ ၅ ဂှ်မ္ဂး ပ္ဍဲတိဍာ်ဒပ်မဟာ ၅ ခရိုၚ်ဘာပန်ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံဂှ် အပ္ဍဲဂိတုဂျူလာၚ် ဘာ်ဂိတုဏံ က္တဵုဒှ်လဝ် ပေါဲဗ္တိုက် ၆၆ ဝါတုဲ လ္ပာ်ကံၚ်ဇြဳပၞာန် ၃၇ တၠ ချိုတ်တုဲ ၁၀ တၠ ဇီုကပိုက်ကလိဂွံလဝ်ဝပ်တုဲ ဗ္ဒိုပ်ဒပ်လ္ၚဵုတံလေဝ် ပၟတ်တူလီုလာ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−FED