မတ်မလီု၊ ဂျူလာၚ် ၂၈
ပပ္တံနူဂိတုအဝ်ဂါတ်ဏံတုဲ ကုညးယိုက်ဝန် ကေုာံ ညးဒေါအ်ဇူတံဂှ် ထပ်ပပဵုပ္တိုန်ကဵုအာ သြန်ထံက်ပၚ် ပိဠက်ဒ္ကေဝ်ဏောၚ်ဂှ် ဌာနဝန်ဇၞော်ပရေၚ်ဘဏ္ဍာ ကေုာံ ကိုန်စဳမာန် သၟဝ်တဲကံၚ်ဇြဳပၞာန် လလောၚ်တြးလဝ် နကဵုစၟတ်တ္ၚဲ ဂိတုဂျူလာၚ် ၂၆ တေံရ။
ပပဵုပ္တိုန်ကဵုသြန်ထံက်သာ်ဏံဂှ်ဝွံ ညးယိုက်ဝန်ဂမၠိုၚ် ကေုာံ ညးဒေါအ်ဇူတံ ပ္ဍဲအရာယိုက်ဂၠေၚ်လျိုၚ်ဍုၚ်ကွာန်ဂှ် သွက်သ္ဂောံဒှ်အထံက်အပၚ် ပ္ဍဲပရေၚ်စသုၚ်မံၚ်စံၚ် ကေုာံ ပရေၚ်သၠဲလးတံရောၚ်ဂှ် သ္ဂးရ။
ကံၚ်ဇြဳပၞာန်ဝွံ တုဲကၠုၚ်သၞာံ ၂၀၂၃ ဂိတုအံက်တဝ်ဗာတေံဂှ်လေဝ် ပပဵုပ္တိုန်လဝ်ကဵုသြန်ထံက်ပၚ် ကုညးယိုက်ဝန်တံ ပိဠက်ဒ္ကေဝ်တုဲ လၟုဟ်မ္ဂး သြန်ထံက်ပၚ်လၟေၚ်ဂိတုဂှ် ဒှ်ကၠုၚ် စဵုကဵုတြဴဠက်ဒ္ကေဝ်ရ။
တၠကမၠောန်ပရေၚ်ပိုန်ဒြပ်မွဲတၠဂှ် ကံၚ်ဇြဳပၞာန် ဂလိုၚ်ပ္တိုန်ကဵုသြန်ထံက်ပၚ်ဂှ်ဝွံ ဒှ်သြန်ဖောဝ်တုဲ သွက်ၚုဟ်ဖျာဂွံတိုန်ဂှ် ဒှ်သဘဴကဵုဏာဇြဟတ်ဂရိုဟ်တုဲ ကၞောတ်တဲ ပရေၚ်ဇီုကပိုက် လ္တူကဆံၚ်မၞိဟ်သ္ဇိုၚ်တံဂှ် ဇၞော်ပၟဝ်ကၠုၚ်မာန်ရောၚ် ဟီုရ။
“အရာတံဏံ တိုန်ကၠုၚ်ဟီုမ္ဂး မွဲလ္ပာ်ဂှ်လေဝ် ၚုဟ်ဗၞိက်ဂှ် ဗက်တိုန်ကၠုၚ်ကီုဏောၚ်။ ဒးကလေၚ်ထံက်ထ္ၜး ပြသၞာသြန်ဖောဝ်ပၠန်ရဏောၚ်။ ဟိုတ်နူလၟိဟ်သြန်တံဏံတုဲ ၚုဟ်ဗၞိက်ဖျာ တိုန်ကၠုၚ်ဟွံသေၚ်ပုဟ်။ ဂလိုၚ်ပ္တိုန်လဝ်ဏောၚ် မိၚ်ကၠုၚ်ဗရုဗက် ညအ်ၚုဟ်ဗၞိက်ဂွံတိုန်ဂှ် ဒှ်သဘဴကဵုထောံ ဇြဟတ်ဂရိုဟ်ရ။ ပ္ဍဲကဆံၚ်မၞိဟ်သ္ဇိုၚ်တံဂှ်တှ်ေ ပရေၚ်ဇီုကပိုက်တံဂှ် သာတုဲဇၞော်ပၟဝ်ကၠုၚ်ရ။ ကၞောတ်တဲ ဇီုကပိုက်ဂှ်တှ်ေ အာဒး ကဆံၚ်မၞိဟ်သ္ဇိုၚ်တံ အဓိကရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် သွက်ဂွံကဵုသြန်ထံက်ပၚ် ကုညးယိုက်ဝန်တံဂှ် ယဝ်ရထပ်တက်ပ္တိတ်ကၠုၚ် သြန်စက္ခူတၟိတၟိတံဂှ်မ္ဂး သြန်ဖောဝ်ဂှ် ဒှ်ဂၠိုၚ်ကၠုၚ်ဏောၚ်တုဲ ၚုဟ်မးသြန် စှ်ေကၠုၚ်အဆက်က်တုဲ အရာရာအိုဿီု ၚုဟ်ဗၞိက်တံ သၠုၚ်တိုန်ကၠုၚ်မာန်ရောၚ် ညးဆက်ဟီုရ။
ညးယိုက်ဝန် သ္ပလဝ် CDM မွဲတၠဂှ်လေဝ် သြန်ထံက်ပၚ် ကံၚ်ဇြဳပၞာန် ထပ်ထံက်ပၚ်ကဵုလဝ်ဂှ်ဝွံ ဟိုတ်နူၚုဟ်ဗၞိက်ဖျာလၟုဟ်တုဲ စိုပ်တရဴဟွံသေၚ်ကီုလေဝ် ဘဲဒဏ်ၚုဟ်ဗၞိက်က္ဍၚ်တံဂှ် ထပ်ဒးဒုၚ်စသိုၚ်မာန်ရောၚ် ဟီုလဝ် လညာတ်ညးရ။
“ဍေံတံ လၟုဟ်ပပဵုပ္တိုန်လဝ် ခရိတ်မံၚ်စံၚ်တံဂှ်တှ်ေ ဂွံမိၚ်ကေတ် ၜါဝါရ။ ပိဠက် ၜါဝါရ။ ဍာံဍာံဂှ် ပိဠက်ဏံဂှ် မုပဟွံဂွံပုဟ်။ ပိဠက်ဏံပဵုကၠုၚ်တုဲ တ္ၚဲယး အဠဳတှ်ေ ၚုဟ်ဖျာဂှ် ဗက်တိုန်ကၠုၚ်ပၠန်ဏောၚ်။ အေ ဂှ်တှ်ေ မုမှလေဝ် ဟွံတၟေၚ်ပုဟ်။ မုမှဖဵုဟွံမွဲပုဟ်။ ပပဵုပ္တိုန်ကဵုပိဠက်ဂှ် ရဲ Non တံလေဝ် မိပ်မံၚ်ဏောၚ်ဂှ် ဟွံထေၚ်ပုဟ်” သာ်ဝွံ သ္ဂးရ။
ကံၚ်ဇြဳပၞာန် ပပဵုပ္တိုန်ကဵုသြန်ထံက်ပၚ် ကုညးယိုက်ဝန် Non CDM တံဂှ်ဝွံ အခိၚ်လၟုဟ် ဟိုတ်နူကျဒၟံၚ် ပ္ဍဲကဵုပရေၚ်ပၞာန်တံဂှ်ရ ညးယိုက်ဝန်ဂမၠိုၚ် ညံၚ်ဟွံဂွံသ္ပကၠေံ CDM ဂှ်လေဝ် ဒှ်မာန်တုဲ တုဲကၠုၚ်ဟွံလအ်ဂှ်လေဝ် ကလေၚ်ကော်ဒၟံၚ်ညးယိုက်ဝန် CDM တံဂှ်ရ သွက်ဂွံတံၚ်ဂြဲအာရီု ညးယိုက်ဝန် CDM တံလေဝ် ဒှ်မာန်ဂှ် ညးဆက်ဟီုလဝ်ရ။
အခိၚ်ကာလလၟုဟ်ဝွံ ဒှ်အခိၚ်ကြေပ်ဂြတ်ဒၟံၚ်သီုညးဖအိုတ်ဂှ်ရ ညံၚ်ၚုဟ်ဗၞိက်ဂွံစှ်ေ ဟွံကၠောန်မွဲသာ် ဆၜိုတ်အယာံမာတ် ဂလိုၚ်ပ္တိုန်သြန်ထံက်ပၚ်ညိညဓဝ်ဂှ် ညးယိုက်ဝန်တံ ပြေပြံၚ်ကၠုၚ်ဟွံသေၚ်တုဲ ဖဵုအဆက်လက္ကရဴဏံ ၚုဟ်ဗၞိက်သၠုၚ်တိုန်ဂှ် သာတုဲဒးဒုၚ်စသိုၚ်ဏောၚ်ဂှ် တၠကမၠောန်ပရေၚ်ပိုန်ဒြပ်တံ သ္ၚဳဂၠိပ်လဝ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ အပ္ဍဲဂိတုတုဲကၠုၚ်တေံဂှ်လေဝ် ကမၠောန်ပုဂ္ဂလိက နူအပ္ဍဲရးလ္ဂုၚ်၊ မာန္တလေဝ်တံ ဟိုတ်နူပ္တိုန်ဒး ပရူပရာပပဵုပ္တိုန်ကဵုလဝ်သြန်ဂိတု ကုညးယိုက်ဝန်ညးတံ လ္တူဇာဇၞိက်ပရေၚ်မၞိဟ်တုဲ ညံၚ်ဟွံဂွံညိၚ်ဝတ် ကၠောန်လဝ်ဂးတုဲ ရပ်ဒက်ကေတ်လဝ်အရေဝ်တံ ကၠောန်သ္ပလဝ်ရ။
ပ္ဍဲဍုၚ်ဗၟာဏံ အပ္ဍဲကာလဒပ်ပၞာန်သီအဝဵုပွိုၚ်ပိသၞာံပြၚ်ကၠုၚ်ဏံ ကရောံၚုဟ်မးသြန်ဗၟာ စှ်ေကၠုၚ်ကဵုဆဂှ် ဘဲဒဏ်ၚုဟ်ဗၞိက်ဖျာက္ဍၚ်တံဂှ် ညးယိုက်ဝန် Non CDM သၟဝ်တဲကံၚ်ဇြဳပၞာန်တံကီု ညးဍုၚ်ကွာန်သီုဖအိုတ်ဂှ် ဒးဒုၚ်စသိုၚ်ဒၟံၚ် ဇၞော်ကဵုဇြဟတ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram