ရေဝ်၊ ဂျူလာၚ် ၃၀
သွက်ဂွံကလေၚ်ထိၚ်ဒက် သ္ကုတ်ဂၠံၚ်ရေဝ်−ထဝါဲ မဒှ်သ္ကုတ်ဂၠံၚ်ပျဳထံၚ်သု စၟတ် ၈ ဒပ်ပံၚ်ကောံဂကောံဇြဟတ်ပၠန်ဂတးတံ ထိၚ်ဒက်လဝ်ဂှ်တုဲ ကံၚ်ဇြဳပၞာန် ထ္ပက်ဒၟံၚ်ပၞာန် ဗွဲမသ္ကာတ်မြဟ်တုဲ ပေါဲဗ္တိုက်တံ သာတုဲသ္ကာတ်မြဟ်ကၠုၚ်ဂှ် ဂွံတီကေတ် ဇရေၚ်ဒပ်ပံၚ်ကောံတံရ။
ဒပ်ကံၚ်ဇြဳပၞာန်ဝွံ သွက်ဂွံကလေၚ်ထိၚ်ဒက် သ္ကုတ်ဂၠံၚ်ရေဝ်−ထဝါဲမာန်ဂှ် ပပ္တံနူဂိတုဂျူလာၚ် သတ္တာဟတတိယတုဲ ထ္ပက်ကၠုၚ်ကရောၚ်ပၞာန် နကဵုဇြဟတ် ၃၀၀ ပြၚ်ဂှ်ရ က္တဵုဒှ်ဒၟံၚ်ပေါဲဗ္တိုက်တံ အရိုဟ်ဒဒှ်တ္ၚဲရ။
ပေါဲဗ္တိုက်တံဏံဂမၠိုၚ်ဝွံ စနူဂိတုဂျူလာၚ် ၂၅ တုဲ ပ္ဍဲကဵုသ္ကုတ်ဂၠံၚ်ပျဳထံၚ်သု ပွိုၚ်ဍုၚ်ရေဝ်ဂှ် ပေါဲဗ္တိုက်တံ က္တဵုဒှ်ဒၟံၚ် အရိုဟ်ဒဒှ်တ္ၚဲတုဲ အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ပလံၚ်ဗစိုပ်အရီုဗၚ်ပၞာန်လွာဲဂှ်တံလေဝ် နွံဒၟံၚ်ရ။
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ဝွံ နူကွာန်တၟအ်ကၞေၚ်ဂှ် ထ္ပက်လုပ်စိုပ်ကၠုၚ် ပ္ဍဲတၟအ်ကၞေၚ်ကွာန်တၟိ၊ ကၞေၚ်တၟအ်၊ အံၚ်သာယာ၊ ကၠအ်လိမ္မဴ ၊ ကွာန်နှေဟ်ခြေၚ်တံရ။
ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တုဲ ပ္ဍဲဂိတုဂျူလာၚ် ၂၉ တေံဂှ်လေဝ် ဗ္ဒါဲကွာန်ကၠအ်လိမ္မဴဂှ် ပေါဲဗ္တိုက်ၜါလ္ပာ် သ္ကာတ်မြဟ်လဝ်တုဲ ဒပ်အမၠံက် စၟတ် ၃၁၇ ဖျေံသ္ဇိုၚ်ရေဝ်ဂှ်ဝွံ ဘိုၚ်ပန်ပှော်ကဵုလဝ် လွဟ်ဇၞော် ဟွံပိုတ်သ္ကုတ်ရ။
ညးတာလျိုၚ်ကရောၚ်ပၞာန်ဒံၚ်ညဵု မဒှ်ကရောၚ်ပၞာန် ဒပ်ပၞာန်စဵုဒၞါညးဍုၚ်ကွာန် PDF ဂှ် ကုဒပ်ကံၚ်ဇြဳပၞာန် ပ္တိတ်ကၠုၚ်ဇြဟတ် သွက်ဂွံထိၚ်ဒက် သ္ကုတ်ဂၠံၚ်ရေဝ်−ထဝါဲဂှ် ဗ္တိုက်တဝ်စၞေဟ်အာ ဗွဲမသၟဟ်အစောံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်ဂှ်ရ နကဵုညးဍုၚ်ကွာန်တံ ဟွံမွဲပၟိက်မွဲသာ် လ္ပအာတရဴ သ္ကုတ်ဂၠံၚ်ရေဝ်−ထဝါဲဂှ်ကီု၊ ဟွံဒေါအ်ဟွံဂွံ ဒးအာမ္ဂး ကလၚ်ပရိုၚ်ပေါဲဗ္တိုက်တံတုဲမှ သွက်ဂွံအာကၠုၚ်အိုတ်ဂှ် ဖ္တိုက်ဖ္အောဝ်လဝ်ရ။
အပ္ဍဲပေါဲဗ္တိုက် သ္ကုတ်ဂၠံၚ်ရေဝ်−ထဝါဲ မက္တဵုဒှ်ဒၟံၚ်လၟုဟ်ဂှ် ကောန်အရာပ်ဟွံအောန်နူကဵု ၜါတၠ ဇီုကပိုက်ကလိဂွံလဝ်ဝပ်တုဲ ၜါလ္ပာ်ဇီုကပိုက်ချိုတ်အာတံလေဝ် နွံဒၟံၚ်ရ။
ဒပ်ကံၚ်ဇြဳပၞာန် ဒးဗလးလဝ်တဲ သ္ကုတ်ဂၠံၚ်ရေဝ်−ထဝါဲဂှ်ဝွံ ပ္ဍဲအရာပလံၚ်ဗစိုပ်အရီုဗၚ်ပၞာန် ပါလုပ်သီုကဵုလွဟ်လက်နက်မကမ်၊ ဇွောံမတံဂှ် ဒးရပ်စပ်ဒၟံၚ် ဂၠံၚ်ဍာ်အဓိကသၟးရတဲ သွက်ဂွံကလေၚ်ဟံၚ် ဂုဏ်သိက္ခာပရေၚ်ပၞာန်တုဲ ထ္ပက်ကၠုၚ်ကရောၚ်ပၞာန်ရ။
ပပ္တံနူသၞာံတုဲကၠုၚ်တေံတုဲ ဒပ်ပၠန်ဂတးတံ ထိၚ်ဒက်လဝ် သ္ကုတ်ဂၠံၚ်ရေဝ်−ထဝါဲဂှ်တုဲ ပရေၚ်စၟဳတ်ပရေၚ်ဂီုကၠီုတံဂှ်လေဝ် ကၠောန်သ္ပဒၟံၚ် မွဲဏှမွဲဏှရ။
ပရိုၚ်−သြၚ်လောန်တိုၚ်(မ်)
ဗီု−MSRF/Frontier M