မတ်မလီု၊ ဂျူလာၚ် ၃၀
ၚုဟ်ထဝ်ဒကောၚ် မဳဠေန် ထပ်တိုန်ကၠုၚ်ဒၟံၚ်အိၚ်ၚ်ဂှ်ဝွံ ပ္ဍဲဂိတုဂျူလာၚ် သတ္တာဟလက္ကရဴအိုတ်ဂှ် မွဲဒ္ကေဝ် ၚုဟ်သၠုၚ်တိုန်ကၠုၚ် စဵုကဵု ၆၅ ကိုဋ်ဒ္ကေဝ်ဂှ် တၠကမၠောန်ထဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ၚုဟ်ထဝ် ဂွံတိုန်ကၠုၚ်ဂှ်ဝွံ ဟိုတ်နူၚုဟ်ဒဝ်ဠာကဵု ၚုဟ်သြန်ဍုၚ်သ္အာၚ် တိုန်ကၠုၚ်ကဵုဆကီု၊ ၚုဟ်သြန်ဗၟာ စှ်ေကၠုၚ်ဒၟံၚ်အဆက်က်ကီု၊ ဓဝ်ပတှ်ေညးဍုၚ်ကွာန် လ္တူတိုန်သြန်တံ စှ်ေကၠုၚ်ကီု၊ ဟိုတ်နူကံၚ်ဇြဳပၞာန် ကောပ်ကာဲဖန်ဇန်ဟွံဒးတံ မဒှ်ရ။
ၚုဟ်သြန်ဍုၚ်ဗၟာစှ်ေတုဲ ၚုဟ်ထဝ်သၠုၚ်တိုန်ကၠုၚ်ဒၟံၚ်ကီုလေဝ် အပ္ဍဲဗွဝ်ဖျာဂှ်တှ်ေ မၞိဟ်ရာန်ပ္ကောံကၠုၚ်ထဝ်တံ သာဂၠိုၚ်ကၠုၚ်တုဲ ဇြဟတ်ရာန် သၠုၚ်တိုန်ဒၟံၚ် အဆက်က်ရ။
တၠကမၠောန်ထဝ်မွဲတၠဂှ်တှ်ေ ၚုဟ်ထဝ်တံ ဂွံသၠုၚ်တိုန်ကၠုၚ်ဂှ်ဝွံ ဗွဲအဓိက ဆက်စပ်ဒၟံၚ်ကဵု ၚုဟ်မးသြန်ဍုၚ်ဗၟာ စှ်ေတုဲ ၚုဟ်မးသြန်ဍုၚ်သ္အာၚ် ထၠာ်တိုန်ကၠုၚ်ဒၟံၚ်အဆက်က်၊ ပရေၚ်ကေတ်အရေဝ်ကံၚ်ဇြဳပၞာန် လ္တူတိုန်သြန်တံရ။
“ဟိုတ်နူအကာဲအရာပရေၚ်ဍုၚ်ကွာန်တုဲ ၚုဟ်မးသြန်ဗၟာဂှ်တှ်ေ စှ်ေဒၟံၚ်အဆက်က်ရ။ ၚုဟ်ထဝ်ဏံသၟးဟွံကပုဟ်။ ၚုဟ်ဒဝ်ဠာ၊ ၚုဟ်သြန်ၝာတ်၊ သေန်ကာပေါဝ်ဒဝ်ဠာ၊ အိန္ဒိယရူပဳတံဖအိုတ်ဂှ် သၠုၚ်တိုန်ဒၟံၚ်အဆက်က်တုဲ ၚုဟ်သြန်ဍုၚ်ဗၟာဂှ်တှ်ေ စှ်ေဒၟံၚ်ရ။ ဒးဟီုတပ်ပ်မ္ဂး ဆက်စပ်ဒၟံၚ်ကဵု နစက ကျပၞာန်တံကီုဏောၚ်။ ကျပၞာန်တုဲ ညးဍုၚ်ကွာန်တံဂှ်တှ်ေ လ္တူပရေၚ်ဍုၚ်ကွာန်ဏံဂှ် ဓဝ်ပတှ်ေဟွံမွဲရပုဟ်။ ဓဝ်ပတှ်ေလ္တူသြန်ဗၟာဂှ်လေဝ် စှ်ေကၠုၚ်ရ။ တုဲပၠန် ကော်တၠကမၠောန်တိုက်သြန်တံတုဲ စၟဳတ်တံဂှ်လေဝ် ဆက်စပ်ဒၟံၚ်ကီုဏောၚ်။ အဓိကဂှ်တှ်ေ ဟိုတ်နူပရေၚ်ဍုၚ်ကွာန်ဏံကဵု ကိစ္စတိုက်သြန်တံတုဲ ဒှ်အာလဝ်ရ” သာ်ဝွံ သ္ဂးရ။
ၚုဟ်ထဝ်အပ္ဍဲဍုၚ် သၠုၚ်တိုန်ကၠုၚ်အဆက်က်တုဲ ကံၚ်ဇြဳပၞာန် မၚ်ရံၚ်ရပ်ဒက် ဆေၚ်ထဝ်တံဂှ် ကၠောန်ဒၟံၚ်ဂှ်ရ အပ္ဍဲဗွဝ်ဖျာဗွဲမလုပ်သၞောဝ်ဂှ် ဟွံကၠောန်သ္ပပရေၚ်သွံရာန်ရတုဲ ဒးကၠောန်ဒၟံၚ် ပရေၚ်သွံရာန်ဒမၠုက်တံရောၚ်ဂှ် ဂွံတီကေတ်ရ။
ၚုဟ်ထဝ် သၠုၚ်တိုန်ကၠုၚ်ကီုလေဝ် ဂကောံတၠကမၠောန်ထဝ် ရးလ္ဂုၚ်ဂှ်တှ်ေ ခုတ်ပ္တန်လဝ် ၚုဟ်ထဝ်ဒကောၚ်မဳဠေန်ဂှ် ၄၆ ကိုဋ်ဒ္ကေဝ်ပြၚ်ရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ ညံၚ်ၚုဟ်ထဝ်ဂွံတိုန်ဂးတုဲ ရပ်ဒက်လဝ် ညးဍုၚ်ကွာန်သွံရာန်ထဝ် ၂၁ တၠတုဲ တၠကမၠောန်ထဝ် နူကဵုဆေၚ်ထဝ်ဒယှ် အံၚ်သမာဓိ၊ ဇြဲထက်၊ ဝုက်ဇြုၚ်တံ ၁၀ တၠဂှ်လေဝ် ပ္ဍဲဂိတုဂျောန် ၂ တုဲကၠုၚ်တေံ လလောၚ်ပ္တိတ်လဝ်ဝါရာန်ရပ်ရ။
ဍုၚ်ဗၟာဝွံ ပ္ဍဲလက်ထက်အလဵုအသဳ NLD တေံ ၚုဟ်ထဝ်ဂှ် နွံလဝ် ပွဳပွူ ၁၃ ကိုဋ်ဒ္ကေဝ်ဓဝ်ကီုလေဝ် ပ္ဍဲလက်ထက်ကံၚ်ဇြဳပၞာန်ဏံဂှ်တှ်ေ ၚုဟ်သၠုၚ်တိုန်ကၠုၚ် ဗ္ဒါဲ ၅ ဆတုဲ ၚုဟ်ဖျာဟွံညိၚ်ဝတ်တံဂှ် က္တဵုဒှ်ဒၟံၚ် အရိုဟ်ဒဒှ်တ္ၚဲရ။
ပရိုၚ်−သြၚ်လောန်တိုၚ်(မ်)
ဗီု−CJ