မတ်မလီု၊ ဂျူလာၚ် ၃၀
ပ္ဍဲကဵုကောန်ဂရက်ခရိုၚ်ဒူပလာယာ ဒပ်မဟာ ၆ ဗော်သွးကောန်ဂကူကရေၚ် KNU မရနုက်ကဵု ၁၇ ဝါဂှ် ရုဲစှ်ပ္တိုန်လဝ် ပဒိုဝ်သဝ်လေဿတာန် နဒဒှ်ဥက္ကဌခရိုၚ်တၟိဂှ် ဂွံတီကေတ်ရ။
ကောန်ဂရက်ကောံဓရီု ခရိုၚ်ဒူပလာယာ KNU မရနုက်ကဵု ၁၇ ဝါဂှ် ကၠောန်ဗဒှ်လဝ် နူဂိတုဂျူလာၚ် ၂၄ စဵုကဵု ၂၇ တုဲ ကောံဓရီုဏံဂှ် ဒုဥက္ကဌ KNU ပဒိုတ်သဝ်သေဝ်ဂေ၊ ကမ္မတဳဗဟဵု ပဒိုဝ်သဝ်ပိုဝ်ဝ်ထူအံၚ်၊ ပဒိုဝ်မာန်ကနေဒဳ ကေုာံ ညးစၞးအပ္ဍဲပွိုၚ်ဍုၚ်တံ တိုန်စိုပ်လဝ်ရ။
ပ္ဍဲကဵုကောန်ဂရက်ကောံဓရီု ခရိုၚ်ဒူပလာယာ မရနုက်ကဵု ၁၇ ဝါဏံဂှ် ဥက္ကဌဂှ် ပဒိုဝ်သဝ်လေဿတာန်၊ ညးအုပ်ကာ ပဒိုဝ်သဝ်မဝ်ထူ၊ ဖက်ဆောညးအုပ်ကာဂှ် ပဒိုဝ်သဝ်မိုဝ်အေအ်ဒိုဝ်တံ မဒှ်တုဲ ပဒိုဝ်သဝ်ယှိုဲမံၚ် ဥက္ကဌတြေံကၠာတေံဂှ် ဟွံလုပ်ဒုၚ်ရုဲစှ်လဝ် ပ္ဍဲကောံဓရီုဂှ်ပုဟ်ဂှ် ဂွံတီကေတ်ရ။
ပဒိုဝ်သဝ်လေဿတာန် ဂွံဒုၚ်ရုဲစှ်ပ္တိုန်လဝ် နဒဒှ်ဥက္ကဌခရိုၚ်ဒူပလာယာဂှ်ဝွံ ကၠာတေံ ဒှ်ညးကေတ်လဝ်တာလျိုၚ် ကဆံၚ် ညးအုပ်ကာခရိုၚ်မွဲတၠရ။
အခိၚ်လၟုဟ်လေဝ် ပ္ဍဲကဵုတိဍာ်ဒပ်မဟာ ၆ ခရိုၚ်ဒူပလာယာဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတး KNLA တံ ပေါဲဗ္တိုက်ပရေၚ်ပၞာန်တံ ဆက်က္တဵုဒှ်ဒၟံၚ်တုဲ လ္ပာ်ဒပ်ပံၚ်ကောံ KNLA တံ ဗ္တိုက်သီဂွံလဝ် ဍုၚ်ကျာ်ဍုၚ် ကေုာံ ဍုၚ်သုကလိ နွံအပ္ဍဲခရိုၚ်တံဂှ်သၟးဟွံက သီုကဵုဗ္ဒိုပ်ဒပ်ပၞာန်ဗွဲမဂၠိုၚ်ဂၠေၚ်ရ။
အတိုၚ်ဌာန်ဂအုပ်ဗဟဵု ဒပ်ပၞာန်ဗၠးၜးကောန်ဂကူကရေၚ် KNLA လလောၚ်ပ္တိတ်လဝ် ဗွဲမလုပ်သၞောဝ်ဂှ်မ္ဂး ဗ္ဒိုပ်ဒပ်ဗျူဟာကျာ်ဍုၚ် နွံလ္တူဍုၚ်ကျာ်ဍုၚ် တိဍာ်ဒပ်မဟာ ၆ ဂှ်ကဵု ဗ္ဒိုပ်ဒပ်သၟဝ်တဲဂမၠိုၚ် မပ္တံကဵုဗ္ဒိုပ်ဒပ်ထဳထာဗဝ်၊ ဗ္ဒိုပ်ကွဳလေဝ်တေဝ်၊ ဗ္ဒိုပ်ပေဝ်ခလေဝ်၊ ဗ္ဒိုပ်ဖိုဝ်သဳမူ၊ ဗ္ဒိုပ်ကျဝ်ထာ၊ ဗ္ဒိုပ်ကရိ၊ ဗ္ဒိုပ်ယှိုဝ်ထာ၊ ဗ္ဒိုပ်မေဝ်ကဒဳ ကေုာံ ဗ္ဒိုပ်ကာတ်လဳခဳတံ မဒှ်ရ။
သ္အာၚ်နူဂှ်ပၠန် နကဵုညးယိုက်ဝန်သၟဝ်တဲကံၚ်ဇြဳပၞာန် ပ္ဍဲတိဍာ်ဒပ်မဟာ ၆ ခရိုၚ်ဒူပလာယာ KNU တံသီုဖအိုတ် သွက်ဂွံနုက်တိတ်ဆုဲပြံၚ်ဂှ်ကီု၊ သွက်ဂွံပံၚ်တောဲကဵု ဒပ်မဟာ ၆ KNU ဂှ် တုဲကၠုၚ်ဂိတုဂျောန်တေံ ကမ္မတဳလၟိုန် ခရိုၚ်ဒူပလာယာ KNU လလောၚ်ပ္တိတ်ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−KIC