နေဗျဳဒဝ်၊ ဂျူလာၚ် ၃၀
သွက်ဂွံသၠုၚ်ပ္တိုန်အာအသိၚ် တၚ်တုပ်စိုတ်ဟိုၚ်ဂေန် ကြုက်လုပ်အကြာပ္ညဳပ္ညပ်ကဵုလဝ်ဂှ် ဗော်ပရေၚ်ဍုၚ်ကွာန်ပန်ဗော် ကံၚ်ဇြဳပၞာန် ကဵုလဝ်အခေါၚ်ဂှ် ဖ္တိုက်ဖ္အောဝ်လဝ် အပ္ဍဲလၟေၚ်တရဴကြုက်ရောၚ် လ္ပာ်ဗော် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နူဂိတုဂျူလာၚ် ၂၀ စဵုကဵု ၂၇ သွက်ဂွံကၠုၚ်စိုပ်ဍုၚ်ကြုက်ဂှ် ဗော်ကောန်မျူနေတ်ကြုက် ကော်ဘိက်လဝ် ဗော်ကျခိုၚ်ယျေ၊ ဗော်ညးဍုၚ်ကွာန်၊ ဗော်က္ဍိုက်ပ်ရခေၚ် ကေုာံ ဗော်ဒဳမဝ်ကရေတ်တေတ် ကောန်ဍုၚ်အရၚ်သေံ (ကၠဗု) တံရ။
အပ္ဍဲလၟေၚ်တရဴဏံ သွက်ဂွံသၠုၚ်ပ္တိုန်အသိၚ် တၚ်တုပ်စိုတ်ဟိုၚ်ဂေန် မဟာမိတ်သ္ကုတ်သၟဝ်ကျာပိဂကောံ ကေုာံ ကမ္မတဳပ္ညဳပ္ညပ်ပရေၚ်ၜိုဟ်လလမ် ကံၚ်ဇြဳပၞာန် NSPNC တံဂှ် ပ္တိုန်ထ္ၜးလဝ် ကုကြုက်ရောၚ် ဥက္ကဌ ဗော်က္ဍိုက်ပ်ရခေၚ် ဒံက်တာအေမာၚ် ဟီုရ။
“ပရေၚ်ၜိုဟ်လလမ်ဍုၚ်ဗၟာ ကေုာံ ဂကောံသ္ကုတ်သၟဝ်ကျာ ဍေံတံဖန်ဇန်ကဵုလဝ်ဂှ်ရ။ ဆဵုဂဗသဳကၠဳကဵု NSPNC တုဲမှ ဂွံဂၠါဲသွဟ်၊ သွက်ဂွံသၠုၚ်ပ္တိုန်အာဂှ် လ္ပာ်ပိုယ်တံ ဟီုဂှ်တှ်ေ ဟိုၚ်ဂေန်ရ။ တၚ်တုပ်စိုတ်ဟိုၚ်ဂေန်ဂှ် ကၠောန်ဗဒှ်ပေါဲသဳကၠဳ မရနုက်ကဵု ၆ ဝါတုဲ သဳကၠဳအိုတ်ညိ။ ကောပ်ကာဲကဵုညိ။ ဂွံသွဟ်ပ္ညဳပ္ညပ်ဍုၚ်ဗၟာတုဲမှ ဍုၚ်ကြုက်လေဝ် ဖောအ်ဗြေဝ်တောတက်အာဏောၚ်။ ပရေၚ်ဍုၚ်ကွာန်ဂွံညိၚ်ဝတ်ဂှ် ပၟိက်ဇၞော်ကွေံကွေံဏောၚ်။ ပိုယ်တံ ပ္တိုန်ထ္ၜးလဝ် သာ်ဏံရ” သာ်ဝွံ သ္ဂးရ။
ပရေၚ်ပၞာန် ၁၀၂၇ လပှ်ဒုတိယဏံဂှ် ဂကောံမဟာမိတ်ကောဒေံ မပ္တံကဵုဂကောံကဝ်က MNDAA ကဵု ဂကောံတအာၚ် TNLA တံ မပါလုပ် ဂကောံဒပ်ပံၚ်ကေံ PDF တံ ထ္ပက်ပၞာန်ဗ္တိုက်ဒၟံၚ် ဗ္ဒိုပ်ဒပ်ကံၚ်ဇြဳပၞာန် ပ္ဍဲရးသေံသ္ကုတ်သၟဝ်ကျာကဵု ရးမာန္တလေဝ်တံရ။
အပ္ဍဲပရေၚ်ဗ္တိုက်ဏံ ဍုၚ်(မိုးကုတ်) ဍုၚ်မၞိက်တိတ်ဂှ်ကီု ဍုၚ်နံၚ်ချဵု ကေုာံ ဍုၚ်သေအ်ကူတံဂှ် ဒပ်ပံၚ်ကောံမဟာမိတ်တံ သီဂွံလဝ်တုဲ ဍုၚ်လာယှိုဝ် ဖျေံသ္ဇိုၚ်ဌာန်ဂအုပ်ပၞာန်ရးဒိုဟ်ဨသာန်ဂှ်လေဝ် သီဂွံလဝ်ရ။
ညးမၞုံအခေါၚ်ဟီုဂး ဌာနဝန်ဇၞော်ကာဍုၚ်သ္အာၚ်ဍုၚ်ကြုက် Mrs. Mao Ning ဂှ်တှ်ေ သွက်ဂွံထိၚ်အာ အသိၚ်အလိုန်ပရေၚ်သဳကၠဳ ပရေၚ်ဒေါအ်ပန်ပှော် သ္ကုတ်သၟဝ်ကျာဍုၚ်ဗၟာ ဗွဲမၜိုဟ်လလမ်ဂှ် ကဵုအာဇြဟတ်ဂရိုဟ်ဏောၚ် ပ္ဍဲပေါဲသောၚ်ကလးလိက်ပရိုၚ် မကၠောန်ဗဒှ်လဝ် ပ္ဍဲဂိတုဂျူလာၚ် ၂၅ တေံ ဟီုလဝ်ရ။
စပ်ကဵုကိစ္စဏံတုဲ နူကမ္မတဳပရေၚ်ပၞာန် ဂကောံကဝ်က MNDAA ဂှ် ဒ္ဂေတ်ဗက်အာ မူဝါဒကြုက် လုပ်စိုပ်အကြာပ္ညဳပ္ညပ်ဂှ်တုဲ သွက်ပေါဲဗ္တိုက်ဂွံတုဲဒှ်အာဗွဲမပြဟ်ကဵု သွက်ဂွံထ္မံက်ရုပ်ရဴပရေၚ်ၜိုဟ်လလမ်ဂှ် ပ္တိတ်အာဇြဟတ်ဏောၚ် ပ္ဍဲဂိတုဂျူလာၚ် ၂၇ တေံ လလောၚ်ပ္တိတ်ကဵုလဝ်သမ္တီရ။
ဟိုတ်ဂှ်ရ အတိုၚ်ကြုက် ကဵုလဝ်ဇြဟတ်ဂရိုဟ်ဂှ်မ္ဂး ပေါဲသဳကၠဳဟိုၚ်ဂေန် မရနုက်ကဵု ၆ ဝါ အကြာကံၚ်ဇြဳပၞာန်ကဵု ဂကောံကောဒေံပိဂကောံဂှ် ပ္ဍဲဂိတုဂျူလာၚ် ၃၁ ဏံ ဟွံသေၚ်မ္ဂး ဂိတုအဝ်ဂါတ် ၁ ဏံ ပရေၚ်သဳကၠဳပ္ညဳပ္ညပ်ပရေၚ်ၜိုဟ်လလမ်မွဲ ဒှ်ကၠုၚ်မာန်ရောၚ် ပရိုၚ်တိတ်ဒၟံၚ်ရ။
နကဵုသြၚ်လောန်တိုၚ်(မ်) စပ်ကဵုပေါဲသဳကၠဳ တၚ်တုပ်စိုတ်ဟိုၚ်ဂေန် ကြုက်လုပ်အကြာ ပ္ညဳပ္ညပ်ကဵုလဝ်ဂှ်တုဲ သၟာန်သၟုက်လဝ် ဇရေၚ်ညးမၞုံအခေါၚ်ဟီုဂး ဂကောံတအာၚ် TNLA ဂှ် ဟွံတီဏီပုဟ်ဂှ် ကလေၚ်လဝ်ပရိုၚ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ကောံဓရီုဟိုၚ်ဂေန်ဝွံ တန်တဴကဵု ကောံဓရီုဂီုကၠီုစဵုဒၞါ ကော်အာဟွံလအ်ဏံဂှ်တုဲ ယဝ်ရလစွံစိုတ်ကြံၚ်မ္ၚိုဟ်တံနွံမ္ဂး အပြံၚ်အလှာဲတၟေၚ်ၚ်တၟဟ်ဟ်တံ သ္ဇက်ဂွံဒှ်ဟွံမွဲပုဟ်ဂှ် သ္ၚဳဂၠိပ်လဝ်ရ။
“ကောံဓရီုဟိုၚ်ဂေန်အလန်ဏံ ဗဒေါအ်ကဵုပေါဲဗ္တိုက် က္တဵုဒှ်ဒၟံၚ် ပ္ဍဲရးသေံသ္ကုတ်သၟဝ်ကျာတေံမာန်ဟာဟီုဂှ် တန်တဴကဵုကောံဓရီုဂီုကၠီုစဵုဒၞါ မကၠောန်ဗဒှ်အာ ပ္ဍဲစၟတ်တ္ၚဲ ၃၁ ဏံဂှ်တုဲ ပိုယ်တံ သ္ၚဳဂၠိပ်လဝ်ရ။ ပ္ဍဲကောံဓရီုဂီုကၠီုစဵုဒၞါဏံ နကဵုမေန်အံၚ်လှာၚ် ဒက်ပ္တန်အာ အလဵုအသဳကောန်အရာပ်မွဲသ္ကုတ် အလဵုအသဳပံၚ်ကောံ ဗီုအလဵုအသဳကြုက် မၞုံပၟိက်ဂှ်ဟာ။ ဟွံသေၚ်မ္ဂး ဆက်အာအတိုၚ်တြေံ ကၠောန်သ္ပပြဝပကီုပရာပ်တံတုဲ ဆေၚ်အာမုက် ပရေၚ်ပၞာန်တံဟာ။ ယဝ်ရလစွံစိုတ်ကြံၚ်မ္ၚိုဟ်သာ်ဏံနွံမ္ဂး ကောံဓရီုဟိုၚ်ဂေန် သဳကၠဳအလန်ဏံဂှ်လေဝ် အပြံၚ်အလှာဲတၟေၚ်ၚ်တၟဟ်ဟ်တံ သ္ဇက်ဂွံဒှ်ဂှ် ဟွံမွဲပုဟ်” သ်ာဝွံ သ္ဂးရ။
သၞာံတုဲကၠုၚ် စနူဂိတုအံက်တဝ်ဗာတုဲ ပ္ဍဲရးသေံသ္ကုတ်သၟဝ်ကျာဂှ် ဟိုတ်နူပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံတုဲ ဗ္ဒိုပ်ဒပ်ဂၠိုၚ်ကဵုကၠံ ဒးဒုၚ်သီလဝ်တုဲ ကံၚ်ဇြဳပၞာန်ကျကၠုၚ်ဒၟံၚ်ဂှ် နကဵုအရီုဗၚ်ပၞာန် ပ္တိတ်ကၠုၚ်ဇြဟတ် ပေါဲသဳကၠဳစဵုကဵု ၅ ဝါရ။
နူကဵုဏံ အတိုၚ်သွဟ်ပေါဲသဳကၠဳဆဵုဂဗ အလန်တတိယ အကြာကံၚ်ဇြဳပၞာန်ကဵု မဟာမိတ်ကောဒေံပိဂကောံဂှ် ပ္ဍဲရးသေံသ္ကုတ်သၟဝ်ကျာ ဒပ်ၜါလ္ပာ်တံ ဂွံဒေါအ်ပန်ပှော်ဂှ် ပ္ဍဲသၞာံ ၂၀၂၄ ဂိတုဂျာန္နဝါရဳ ၁၁ ဂှ် ကလိဂွံလဝ်တၚ်တုပ်စိုတ် ဟိုၚ်ဂေန်ရ။
နူကဵုဏံ သွက်ဂွံသဳကၠဳ ကိစ္စစပ်ကဵုတၚ်တုပ်စိုတ် ကေုာံ အကာဲအရာပေါဲဗ္တိုက် အပ္ဍဲဒေသရခေၚ်တံဂှ်တုဲ အကြာဒပ်ကောဒေံတံကဵု ကံၚ်ဇြဳပၞာန်တံဂှ် ထပ်ဆဵုဂဗလဝ် ၜါဝါပၠန်ကီုလေဝ် မုသွဟ်မှဟွံတိတ်မွဲသာ် ပ္ဍဲဂိတုဂျောန် ၂၅ ဂှ် ပရေၚ်ပၞာန် ၁၀၂၇ ကလေၚ်ကၠုၚ်မွဲဝါပၠန်ရ။
ပရိုၚ်−သြၚ်လောန်တိုၚ်(မ်)
ဗီု−ICDPC