နေဗျဳဒဝ်၊ ဂျူလာၚ် ၃၁
သွက်ဂွံကလေၚ်ရပ်စပ် သၞောတ်သမဝါယမ အလဵုအသဳတၠအဝဵုအဆက်က် နူသ္ကိုပ်ပၞာန်ဇၞော်နေဝေန် စဵုကဵုအလဵုအသဳသမ္မတတြေံဥူတုၚ်ဇြုၚ် ဟွံအံၚ်ဇၞးကၠုၚ်လဝ်ဂှ် က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ် စၞောန်ပ္ညုၚ်ကၠုၚ်ရ။
နူကဵုသၞောတ်ပရေၚ်ပိုန်ဒြပ်ဗွဝ်ဖျာ ရပ်စပ်ဒၟံၚ်လၟုဟ်ဂှ် သွက်ဂွံပြံၚ်လှာဲအာ သၞောတ်သမဝါယမဂှ် က္ဍိုပ်သ္ကိုပ်ပၞာန် စၞောန်ပ္ညုၚ်ကၠုၚ် ပ္ဍဲကောံဓရီုအလဵုအသဳကၟိန်ဍုၚ် ကံၚ်ဇြဳပၞာန် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုဂျူလာၚ် ၂၉ တေံရ။
ပ္ဍဲကဵုသၞောတ်ပရေၚ်ပိုန်ဒြပ်ဗွဝ်ဖျာ မရပ်စပ်ဒၟံၚ်လၟုဟ်ဂှ် ကမၠောန်အလဵုအသဳ ပါလုပ်ရေၚ်တၠုၚ်မာန်တံဂှ် နွံတုဲ ကမၠောန်အလဵုအသဳ ပါလုပ်ရေၚ်တၠုၚ် ဟွံမာန်တံဂှ်လေဝ် နွံဒၟံၚ်ဂှ်ရ သွက်ဂွံရေၚ်တၠုၚ် ကမၠောန်တံဏံ ကလိတ်တ်ကလောတ်တ်မာန်ဂှ် သၞောတ်သမဝါယမဝွံ ဒှ်သၞောတ်ဒးရးမွဲရောၚ် သ္ဂးရ။
သ္အာၚ်နူဂှ်ပၠန် အတိုၚ်အကာဲအရာဍုၚ်ကွာန်လၟုဟ်ဂှ်မ္ဂး ပ္ဍဲအရာရေၚ်တၠုၚ် ညံၚ်ကဏ္ဍပရေၚ်ပိုန်ဒြပ်ဂွံတောတက်ဂှ် သၞောတ်သမဝါယမဝွံ ကိတ်ညဳအိုတ်ဂှ် ဂွံဆဵုကေတ်တုဲ သၞောတ်သမဝါယမဝွံ ဒှ်သၞောတ်ဂကောံဗော်သွး တၠကမၠောန်၊ သၟာဗ္ၚ စိုတ်စရိုတ်တုပ်၊ တၚ်ရန်တၟံတုပ်ဂမၠိုၚ် ပံၚ်ကောံဒးကၠောန်မွဲရောၚ်ဂှ် က္ဍိုပ်သ္ကိုပ်ပၞာန် ဟီုရ။
တၠကမၠောန်ပရေၚ်ပိုန်ဒြပ်မွဲတၠဂှ် ကံၚ်ဇြဳပၞာန်ဝွံ သၞောတ်ပရေၚ်ပိုန်ဒြပ်ဗွဝ်ဖျာ မဗၠးၜးဂှ် ဟိုတ်နူအာဟွံမာန်ဂှ်ရ ဂွံအာသၞောတ်သမဝါယမဂှ် ကၠောန်လဝ်တုဲ သၞောတ်သမဝါယမဝွံ အလဵုအသဳလုပ်စိုပ်ပလာပ်ပထုဲဂၠိုၚ်တုဲ ပရေၚ်စလာဘ်ဗဇဴတံလေဝ် နွံကၠုၚ်မာန်ဂှ်ရ အံၚ်ဇၞးဟွံမာန်ပုဟ်ဂှ် ဟီုရ။
“အကာဲအရာလၟုဟ်ဂှ်တှ်ေ သၞောတ်ပရေၚ်ပိုန်ဒြပ်ဗွဝ်ဖျာ ဗၠးၜးဏံဂှ်လေဝ် ဍေံတံ အာဟွံမာန်ပုဟ်။ သၞောတ်ပရေၚ်ပိုန်ဒြပ်ဗွဝ်ဖျာဏံဂှ်တှ်ေ ပရေၚ်လုပ်စိုပ်ပလာပ်ပထုဲ နူအလဵုအသဳ ညံၚ်ဂွံဒှ်အောန်အိုတ်ဂှ် ဍေံတံကၠောန်လဝ်ရ။ ကဵုက္ဍိုပ်ကဵု ဗွဝ်ဖျာသၟးရဏောၚ်။ ပရေၚ်လုပ်စိုပ်ပလာပ်ပထုဲ နူအလဵုအသဳဂှ် အောန်။ သမဝါယမဂှ်တှ်ေ ၚုဟ်ဖျာကီု၊ ဗွဝ်ဖျာကီုဂှ် အလဵုအသဳ လုပ်စိုပ်ဒးဖန်ဖက်ဂှ်ဂၠိုၚ်။ ကိုန်စဳမာန်အလဵုအသဳ အစဳဇန်အလဵုအသဳ ပရေၚ်ထိၚ်ဒက် ကေုာံ ပရေၚ်ထံက်ပၚ် အလဵုအသဳတံဂှ်တှ်ေ ဒးစုတ်ဇြဟတ် ဂၠိုၚ်ၚ်ဏောၚ်။ ညအ်ဂှ် နကဵုဓဝ်ပတှ်ေနွံနွံ ဒးထ္မံက်ရုပ်ရဴမှ ဂွံဏောၚ်။ ပ္ဍဲအရာထ္မံက်ရုပ်ရဴသာ်ဏံဂှ် အန္တရာယ်ဂၠိုၚ်အိုတ်ဂှ်တှ်ေ စလာပ်ဗဇဴတံရဏောၚ်။ ပရေၚ်စလာဗ်ဗဇဴတံ နွံဒၟံၚ်တှ်ေ သၞောတ်ပရေၚ်ပိုန်ဒြပ်သမဝါယမဂှ်တှ်ေ သာ်လဵုမှ အံၚ်ဇၞးကေတ်ဟွံမာန်ပုဟ်” သာ်ဝွံ သ္ဂးရ။
က္ဍိုပ်သ္ကိုပ်ပၞာန်ဂှ်တှ်ေ ဒက်ပ္တန် ဂကောံသမဝါယမတုဲ ကမၠောန်ကၠောန်ပ္တိတ်ဗၞိက်၊ ပရေၚ်တဵုလွဳ ကေုာံ ပရေၚ်လွဳတိရစ္ဆာန်တံ ညံၚ်ဂွံတောတက် ဗွဲမဗဗွဲကဵု တိ၊ ဍာ်၊ မပလုမ်၊ နဲကဲ ၄ တၚ်ဂှ် ရေၚ်တၠုၚ်တုဲ နူဏံမွဲကဆံၚ် သွက်ဂွံဒက်ပ္တန်ရေၚ်တၠုၚ်အာ ရုၚ်စက်၊ ရုၚ်ကမၠောန် ဒုၚ်သ္ဇိုၚ်ကဵု ဗၞိက်ပ္တိတ်နူပရေၚ်လွဳတိရစ္ဆာန် ကေုာံ ပရေၚ်တဵုလွဳတံဂှ် စၞောန်ပ္ညုၚ်လဝ်ရ။
သၞောတ်သမဝါယမဝွံ ပ္ဍဲသၞောတ်ပရေၚ်ပိုန်ဒြပ်သၟာတမ်ရိုဟ် စပ်ကဵုတၠကမၠောန်တံ ရေက်ကးစပရဲ လ္တူကောန်ကလောန်တံဂှ်တုဲ သွက်ဂွံစဵုဒၞါမာန်ဂှ်ကီု၊ အလဵုကောန်ကလောန်တံ သွက်ဂွံကောပ်ကာဲဖန်ဇန်မာန် ကေုာံ သွက်သ္ဂောံဒုၚ်စသိုၚ် ဂုဏ်ဖဵုပရဲပရာဂမၠိုၚ်ကီု၊ သွက်ဂွံဗ္တိုက်သရိုဟ် ပရေၚ်ဒိုက်ဝါတ်တံဂှ် ရန်တၟံလဝ်ရ။
ဆ္ဂး ပ္ဍဲဍုၚ်ဗၟာဂှ်တှ်ေ သၞောတ်သမဝါယမဝွံ တၠအဝဵုတံကဵု နူကဵုဗွိုၚ်ညးကလိဂွံအဝဵုတံဂှ်ရ သ္ကိုပ်သ္ကတုဲ ဟိုတ်နူပရေၚ်ဗက်စအဂတိ၊ ကဵုကေတ်လာပ်ဗဇဴတံတုဲ ပ္ဍဲလက်ထက်တၠအဝဵုပၞာန်တြေံ ဥူနေဝေန်ဂှ် ဒယှ်ကၠုၚ်လဝ် နကဵုယၟုပရေံပရေံတုဲ ဒှ်ကၠုၚ်လဝ်ဘဝ ဒးၜေတ်မၚ်ကၠုၚ် ကၠေၚ်၊ သ္ၚုတံတုဲမှ ဂွံစလဝ်အိုတ်ရ။
ညးလ္ၚတ်ပရေၚ်ဍုၚ်ကွာန်ဝှ်ကြံၚ် ဥူတာန်သဵုနာၚ်ဂှ်လေဝ် ဟီုကၠုၚ် သွက်ဂွံကၠောန် သၞောတ်ပရေၚ်ပိုန်ဒြပ် သမဝါယမဂှ်ဝွံ ကမၠောန်ဟွံအံၚ်ဇၞးကၠုၚ် ပ္ဍဲခေတ် မဆလ ကၠာတေံဂှ် သွက်ဂွံကၠောန်မဒှ်တုဲ မူဝါဒတြေံ ညးဍုၚ်ကွာန် တးပါဲလဝ်တံဂှ် ပ္တိတ်ထ္ၜးကၠုၚ်ဂှ်ရ နတဲ ကၠောန်မာန်ဟွံသေၚ်ပုဟ်ဂှ် ဟီုရ။
“လၟုဟ်ဂှ် အလုံဍုၚ်မွဲပြးဇး ဒှ်ဒၟံၚ်ပေါဲဗ္တိုက်၊ သၟာဗ္ၚတံ ဒှ်ဒၟံၚ်ရဲပါဲဘဲပၞာန်တံတုဲ ဒှ်ဒၟံၚ်အကာဲအရာ ကၠောန်ကမၠောန်ပ္တိတ်ဗၞိက်တံ ဟွံမာန်ဒၟံၚ်ရ။ ပ္ဍဲအကာဲအရာသ်ာဏံ ဂွံကၠောန်ကမၠောန်သမဝါယမ ကိစ္စဏံဂှ် နူခေတ် မဆလ တေံ ကၠောန်ၜိုတ်ကၠုၚ်လဝ်တုဲ ကမၠောန်ဟွံအံၚ်ဇၞးတံဂှ် ကၠောန်အာဏောၚ် ညးဟီုဒၟံၚ်ဂှ်ဝွံ သွက်ဂွံကၠောန်သ္ပအပြံၚ်အလှာဲပရေၚ်ပိုန်ဒြပ်မွဲမွဲ အကာဲအရာလၟုဟ်ဂှ်တုဲ ပ္တိုန်ထ္ၜးကၠုၚ် ညအ် နဒဒှ်မွဲသာ်ကီုရ။ ဆ္ဂး ဂွံထ္မံက်ရုပ်ရဴ နတဲဏံဂှ် သာ်လဵုမှ ဒှ်ဟွံမာန်ပုဟ်” သာ်ဝွံ သ္ဂးရ။
မွဲလ္ပာ်ဂှ်ပၠန် ကံၚ်ဇြဳပၞာန်သီအဝဵုဝွံ ဌာနဝန်ဇၞော်သမဝါယမ မရုပ်သီလဝ် ပ္ဍဲလက်ထက်အလဵုအသဳကောန်အရာပ် သၟဝ်ပၠတရဴဗော် NLD ဂှ် ကြဴနူပၞာန်သီအဝဵုတုဲ ပ္ဍဲသၞာံ ၂၀၂၁ ဂိတုဂျောန် ၁၇ တေံဂှ် ကလေၚ်ဒက်ပ္တန်လဝ် ဌာနဝန်ဇၞော်သမဝါယမ ကေုာံ ဝန်ဇၞော်ပရေၚ်ဖောအ်ဗြေဝ်ကွာန်ရးတံရ။
သၞောတ်ပရေၚ်ပိုန်ဒြပ်သမဝါယမဝွံ ဟိုတ်နူအလဵုအသဳ ထိၚ်ဒက်ဂၠိုၚ်ဂှ်ရ ဂွံရာန်ပါန်သွံတြး အပ္ဍဲဗွဝ်ဖျာ ဗွဲမဗၠးၜးဂှ် အခက်အခုဲနွံကၠုၚ်မာန်တုဲ ယဝ်ရဟွံကၠောန် ဗွဲမစှ်ေကဵုသၞောတ်မ္ဂး ဗွဝ်ဖျာလေဝ် လီုအာမာန်ရောၚ် တၠကမၠောန်ပရေၚ်ပိုန်ဒြပ်ဂမၠိုၚ် ထံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI/Social Media