မတ်မလီု၊ သေပ်တေမ်ဗာ ၂၉
ဟိုတ်နူၚုဟ်ကၠေၚ်စက်ကီု ၚုဟ်ကပေါတ်ဗၞိက်နာနာတံ သၠုၚ်တိုန်ကၠုၚ်ဂှ်တုဲ ဍာ်သ္ၚးဇ္ၚး ၂၀ လဳတာ မွဲဗူဂှ် သၠုၚ်ပ္တိန်လဝ် စဵုကဵု ၁၅၀၀ ဒ္ကေဝ်ရောၚ် ဂကောံတၠကမၠောန်ဍာ်သ္အးဇ္ၚး ပွိုၚ်ဍုၚ်မတ်မလီု လလောၚ်တြးလဝ်ရ။
မ္ဒးသၠုၚ်ပ္တိုန် ၚုဟ်ဍာ်သ္အးဇ္ၚးဂှ်ဝွံ ဒၟါနူခရိတ်အိုတ်နာနာ သၠုၚ်တိုန်ကၠုၚ်ကီု၊ ဟိုတ်နူၚုဟ်ကၠေၚ်စက် ၚုဟ်ကပေါတ်ပါလုပ် ပ္ဍဲအရာပ္တိတ်ဍာ်သ္အးဇ္ၚးတံ သၠုၚ်တိုန်ကၠုၚ်တံဂှ်ရောၚ် သ္ဂးရ။
ၚုဟ်ဍာ်သ္အးဇ္ၚးဂှ် အတိုၚ်တၚ်တုပ်စိုတ် တၠကမၠောန်ဍာ်သ္အးဇ္ၚး ပွိုၚ်ဍုၚ်မတ်မလီုတံဂှ်မ္ဂး ပပ္တံနူဂိတုအံက်တဝ်ဗာ ၁ ဏံတုဲ ဍာ်သ္အးဇ္ၚးမွဲဗူဂှ် သွံတြးအာကဵု နကဵုၚုဟ်နှေန် ၁၅၀၀ ဒ္ကေဝ်ဏောၚ်ဂှ် ကဵုလဝ်သမ္တီရ။
တၠကမၠောန်ဍာ်သ္အးဇ္ၚး ပွိုၚ်ဍုၚ်မတ်မလီုမွဲတၠဂှ်တှ်ေ မ္ဒးသၠုၚ်ပ္တိုန် ၚုဟ်ဍာ်သ္အးဇ္ၚးဂှ်ဝွံ ဟိုတ်နူပၟတ်ဓာတ်လလဳ ကၠုၚ်ဟွံမှာန်ကီု၊ ၚုဟ်ခရိတ်အိုတ်နာနာ သၠုၚ်တိုန်ကၠုၚ်တံဂှ်တုဲ ဒးခုတ်ပ္တန်အာၚုဟ် ဗွဲမဗဗွဲကဵု ခေတ်ကာလဂှ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲအရာသၠုၚ်ပ္တိုန်ၚုဟ်ဍာ်ဂှ် ၂၀ လဳတာ မွဲဂကူဓဝ်ဟွံသေၚ်၊ သှ်ေဍာ် ၁ လဳတာတံကီု ဗူတၞဟ်ဟ်တံဂှ်လေဝ် မွဲကာဒ်တှ်ေ အောန်အိုတ် နူ ၁၀၀၀ ဒ္ကေဝ် သၠုၚ်ပ္တိုန်အာ စဵုကဵု ၂၀၀၀ ဒ္ကေဝ်တုဲ သွံတြးအာဏောၚ်ဂှ် ဂွံတီကေတ်ရ။
ၚုဟ်ဍာ်သ္အးဇ္ၚးဂှ်ဝွံ ကၠာဂွိုအ်သီအဝဵုတေံဂှ် ဍာ် ၂၀ လဳတာ မွဲဗူဂှ် နွံကၠုၚ်လဝ် ၃၀၀ ဒ္ကေဝ်ဓဝ်ရတုဲ ကြဴနူဒပ်ပၞာန်သီအဝဵုတုဲ နူကဵု ၅၀၀ ဒ္ကေဝ်၊ ၇၀၀ ဒ္ကေဝ်၊ ၁၀၀၀ ဒ္ကေဝ်တံဂှ်မွဲကဆံၚ် သၠုၚ်ပ္တိုန်အာ ၁၅၀၀ ဒ္ကေဝ် မဒှ်ရ။
ပ္ဍဲပွိုၚ်ဍုၚ်မတ်မလီုဂှ် ကမၠောန်ကၠောန်ပ္တိတ်သွံတြးဒၟံၚ် ဍာ်သ္အးဇ္ၚးဂှ် နွံဒၟံၚ် ဟွံအောန်နူကဵု ၁၀ တုဲ လၟေၚ်တ္ၚဲ အရာပ်ညးကဵုညး ဗက်သွံတြးဒၟံၚ် နကဵုကွဳစက်တံ မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ