ဟိုတ်နူကျ ပရေၚ်ဍုၚ်ကွာန်၊ ပရေၚ်ပၞာန်တုဲ ကံၚ်ဇြဳပၞာန် တက်ပၠောပ်ဓဝ်ဖေက်တုဲ ဂ္စါန်ကၠုၚ် သွက်ဂွံအုပ်ဓုပ်ညးဍုၚ်ကွာန်တံ

လ္ဂုၚ်၊ သေပ်တေမ်ဗာ (၂၂)

ယဝ်ရကဵုဇြဟတ်ထံက်ပၚ် ကုအလဵုအသဳညဳသၟဟ်ဂကူ NUG ၊ ကမ္မတဳသ္ပစၞး ကၠတ်ထဝ်ကၟိန်ဍုၚ် CRPH ကေုာံ ဂကောံဒပ်စဵုဒၞါညးဍုၚ်ကွာန် PDF တံဂှ်မ္ဂး ကေတ်အာအရေဝ် နကဵုဒုဟ်ဒဏ်မဇၞော်သန်တံရောၚ် ကံၚ်ဇြဳပၞာန် ဟီုဂးကၠုၚ် သာ်ဏံဂှ်ဝွံ  ဒဒှ်ရကျဒၟံၚ် ပ္ဍဲပရေၚ်ဍုၚ်ကွာန်၊ ပရေၚ်ပၞာန်ဂှ် ထ္ၜးဒၟံၚ်တုဲ တက်ပၠောပ်ဓဝ်ဖေက် ပ္ဍဲညးဍုၚ်ကွာန်တံတုဲ ဂ္စါန်ကၠုၚ် သ္ဂောံအုပ်ဓုပ်ရဂှ် ညးမရေၚ်တၠုၚ်ဒၟံၚ် သွက်ပရေၚ်ဒဳမဝ်ကရေဇြဳတံ ဟီုဂးလဝ်ရ။

ပ္ဍဲပေါဲသောၚ်ကလးလိက်ပရိုၚ် ကံၚ်ဇြဳပၞာန် မကၠောန်ဗဒှ် ပ္ဍဲဂိတုသေပ်တေမ်ဗာ (၂၀) တုဲကၠုၚ်တေံဂှ် ဆၜိုတ်ကဵုဇြဟတ် ထံက်ဂလာန် ကု NUG, CRPH ကေုာံ PDF တံ သၟးဂှ် ဖျေံစၟတ်ကေတ်အာအရေဝ် နကဵုဒုဟ်ဒဏ်ဇၞော်ဇၞော်တံမာန်ရောၚ် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ဗိုလ်ဇြဝ်မေန်ထောန် ဟီုဂးလဝ်ရ။

ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုဗိုလ်ဇြဝ်မေန်ထောန်ဂှ် ညးမထံက်ဂလာန်ကဵုဇြဟတ် ကဵု Like, ပါ်ပရအ် Share ဗီုဓာတ်၊ လိက် ကေုာံ ဗဳဒဳယော မဆက်စပ်ကဵု NUG, CRPH, PDF နူမုက်လိက် Facebook ဇာဇၞိက်ပရေၚ်မၞိဟ်တံဂှ်မ္ဂး ကေတ်အာအရေဝ် နကဵုသၞောဝ်ဥပဒေ ရာဇာသာတ်ဇၞော် ၝောံပိုဒ် (၁၂၄)−ခ (ခ) မာန်ရောၚ် ဘပဠလဝ်ရ။

ညးချဳဒရာၚ်ကတိုၚ်ကၟဟ် ပရေၚ်ဒဳမဝ်ကရေဇြဳမွဲတၠဂှ် ဂလာန်ကံၚ်ဇြဳပၞာန် ဟီုသာ်ဏံဂှ်ဝွံ ပၠောပ်ဓဝ်ဖေက် ကုညးဍုၚ်ကွာန်တံတုဲ ပိုၚ်ကၞာတ်ကၟာတ်ဒၞါကၠုၚ်ရဂှ် ဟီုရ။

“ကဵုဒါန်ကဵုဒှ်၊ ဍဵု Like and share ကု post တံဂှ်ကဵုဒှ် ရပ်ဏောၚ်ဟီုဂှ် ပၠောပ်ဒၟံၚ်ဓဝ်ဖေက် ကုညးဍုၚ်ကွာန်တံရောၚ်၊ တုဲတှ်ေ ပၠောပ်လဝ်လမျီု ဓဝ်ဖေက်တံလေဝ်ဒှ်တုဲ နကဵုဍေံတံ ဝးပ္ကဝ်ဒၟံၚ် အခေါၚ်အရာအရာမၞိဟ်ရောၚ် ဟီုဂွံရ၊ ညးဍုၚ်ကွာန်တံ ပွမပါလုပ်ပူဗိုၚ် ပ္ဍဲပရေၚ်ဇၞော် (အရေးတော်ပုံ) ဏံဂှ်လေဝ် ဍေံတံ ဖေက်ဒၟံၚ်ယျရောၚ် ဟီုဂွံရ၊ ရံၚ်ကဵုအကာဲအရာသာ်ဏံတုဲ ပရေၚ်ဇၞော်ပိုယ်တံဂှ် ၜိုတ် (၇၀) တၟံကၠံ စိုပ်ဒရဴတုဲ အံၚ်ဇၞးဒၟံၚ်ယျဂှ် ဟီုဂွံရ” သာ်ဝွံ ညးသ္ဂးရ။

ကံၚ်ဇြဳပၞာန်ဂှ် ပွမဆဝ်မ္ၚုဟ် ကုသၞာဲဒဴဍေံတံ ညံၚ်သ္ဂောံသ္ပ CDM ဂှ်ကီု၊ ကၠောန်သ္ပထံက်ပၚ်သြန်လှုဲ ကု PDF တံမ္ဂးလေဝ် ကေတ်အာအရေဝ် နကဵုသၞောဝ်ဥပဒေရာဇာသာတ်ဇၞော် ၝောံပိုဒ် ၁၀၈ (က) ရောၚ် ဟီုဂးကၠုၚ်ရ။

သ္အာၚ်နူဂှ်ပၠန် ဒုဟ်ဒဏ် (၅) ဂကူ မဖျေံစၟတ်ကေတ်အရေဝ်မာန်  သွက်ပွမထံက်ပၚ်သြန်လှုဲ ကုပွပကီုပရာပ်တံ ဗီုပြၚ်နာနာ မပ္တံကဵု ရီုဗၚ်ကဵုဇြဟတ် ထံက်ပၚ်သြန်လှုဲတံ၊ ရာန်လိက်ကသုက်တိုန်သြန် ကံက်ထဳ နူကဵုဂကောံတံဏံ ကေုာံ စုတ်လှုဲကဵုဒါန် နူအောန်လာၚ်မွဲကဆံၚ်တံဂှ် လလောၚ်ပ္တိတ်လဝ်ရ။

ညးရေၚ်တၠုၚ်ဂဗုတ် အလဵုအသဳမွဲတၠဂှ် အကာဲအရာလၟုဟ်ဝွံ မွဲကရောံကဵု ဇြဟတ်ပြိုၚ်ပ္ကာန် ပရေၚ်ဍုၚ်ကွာန်ဂှ် သီုကဵု ဇြဟတ်ပြိုၚ်ပ္ကာန် ပရေၚ်ပၞာန်တံလေဝ် သ္ကာတ်မြဟ်ဒၟံၚ်ဂှ်ရ နကဵုကံၚ်ဇြဳပၞာန် ဒှ်ကၠုၚ်ဇြဟတ်ဂရိုဟ် ဇၞော်ဇၞော်မွဲတုဲ ကၟာတ်ဂဒဵုကၠုၚ်သာ်ဏံရဂှ် သ္ၚဳဂၠိပ်လဝ်ရ။

“အခိၚ်ကာလလၟုဟ်ဂှ်လေဝ် ချဳဒရာၚ်ပရေၚ်ပၞာန် ကေုာံ ဒက်ပ္တန်ပရေၚ်ပၞာန် NUG ကဵု PDF တံဂှ် သွက်ကံၚ်ဇြဳပၞာန် ဒှ်ကၠုၚ်ပရေၚ်ဘပဠဇၞော်ဇၞော်မွဲရ၊ ဒှ်ကၠုၚ် ဇြဟတ်ဂရိုဟ်ဇၞော်ဇၞော်မွဲတုဲ ညံၚ်ကောန်ဍုၚ်သ္အာၚ်တံ ဆက်တုဲကဵုပရိုၚ်၊ ကဵုဇြဟတ်ထံက်ဂလာန် ဂွိုအ်ဂွံဂှ် နကဵုတၚ်ရန်တၟံနွံနွံ မိက်ဂွံကၟာတ်သၞောတ်ဗ္ၜတ်ဂှ်တုဲ လလောၚ်ပ္တိတ်လဝ်ဂှ် အဲညာတ်ကေတ်ရ” ဂှ် ညးဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

လ္ပာ်ကံၚ်ဇြဳပၞာန် နူကဵုပေါဲသောၚ်ကလးလိက်ပရိုၚ်ဂှ်မွဲကဆံၚ် ကဵုကၠုၚ်သမ္တီဂှ်ရ ပွမကေတ်အရေဝ်တံ သၠဲလးသ္ကာတ်မြဟ်ကၠုၚ်မာန်တုဲ နကဵုညးဍုၚ်ကွာန်တံ အခါရစကာ ဇာဇၞိက်ပရေၚ်မၞိဟ်တံမ္ဂး သွက်ဂွံစွံသတိဇၞော်ဇၞော် နွံပၟိက်ကၠုၚ်ရဂှ် သ္ဂးရ။

 ပ္ဍဲကၟိန်ဍုၚ်ဗၟာ ဗွဲကြဴဒပ်ပၞာန်သီအဝဵုတုဲ ဒပ်ကံၚ်ဇြဳပၞာန်ဝွံ မ္ၚးနူရပ်ဒက်ညးဍုၚ်ကွာန်လ္တူဍုၚ်တံ၊ ပ္တိတ်သၞောဝ်ဥပဒေ ထိၚ်ဒဝ်ပ္ဍဵုပ္ဍိုက်တံဂှ် ပ္ဍဲဒေသလ္ၚဵုတံမ္ဂး သီုကဵုပွမစံၚ်စမြိုၚ်သ္ၚိဒၟံၚ်တံ၊ ဂစိုတ်ဂယိုၚ်တံဂှ်ဝွံ အရိုဟ်ဒဒှ်တ္ၚဲ လုတ်လောန်ဒၟံၚ်ရောၚ် ညးချဳဒရာၚ်ကတိုၚ်ကၟဟ် အခေါၚ်အရာမၞိဟ်တံ ဟီုရ။

ညးမၞုံတာလျိုၚ် ဂကောံ Generation Wave မွဲတၠဂှ် “လၟုဟ် ဒုၚ်သ္ဇိုၚ်ကဵု လ္တူအရေဝ်ဍေံ (သ္ကိုပ်ဗိုလ်ဇြဝ်မေန်ထောန်) မဟီုလဝ်ဂှ်တုဲ ဒးဟီုမ္ဂး ကၞောတ်တဲ အကာဲအရာဒးဟီုပ္တိတ်ကၠုၚ် ပြာပြာကတ်တ်ရ၊ လၟုဟ်မှ ဟီုကဵုဒှ် ဟွံဟီုကဵုဒှ်ဂှ် ဟွံတၟေၚ်ရ၊ တုဲတုဲတေံလေဝ် ဒးဒုၚ်လုလောန်လဝ်တံ နွံဒၟံၚ်ရ၊ အခိၚ်လၟုဟ်လေဝ် လုတ်လောန်ဒၟံၚ်ဖိုဟ်ရ” ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ကံၚ်ဇြဳပၞာန်ဂှ် ဆၜိုတ်ထံက်ဒးဂလာန် ကဵုဒးဇြဟတ် ကုညးဒစဵုဒစးတံသၟးဂှ် ယဝ်ရဒးစောဲဂဗုတ်မ္ဂး ၝောံပိုဒ်ရာဇာသာတ်ဇၞော် ၅၀၅ (က) ၊ ၝောံပိုဒ်ရာဇာသာတ်ဇၞော် ၁၂၄− ခ(ခ) ၊ ၝောံပိုဒ်ဖျေံစၟတ်ဒဏ်ထံၚ် ဗ္တိုက်သ္အးပကီုပရာပ် (၅၂) ၊ (၅၄) တံဝွံ ဒှ်ၝောံပိုဒ်ဖျေံစၟတ်ဒဏ်ထံၚ်  နူ (၃) သၞာံ စဵုကဵု ဒဏ်သၠုၚ်အိုတ် ဒဏ်ထံၚ်မွဲအာယုက်တံ သၟးဟွံက သီုကဵု ဒဏ်ဂစိုတ်တံလေဝ် ပါရ။

အတိုၚ်တၚ်နၚ် ဂကောံရီုဗၚ်မၚ်မွဲ ကောန်ထံၚ်ပရေၚ်ဍုၚ်ကွာန် (AAPP) မလောၚ်ပ္တိတ်လဝ် စဵုကဵုဂိတုသေပ်တေမ်ဗာ (၂၀) ဂှ်မ္ဂး အပ္ဍဲပၠန်ဂတးက္ညၚ်ဂှ် မၞိဟ်ဒးပြဟ်လလုဲအာ (၂၂၉၉) တၠ နွံတုဲ ပ္ဍဲကဵုညးဒးဒုၚ်ရပ်ထိၚ်ဒဝ်လဝ် (၁၂၄၄၄) တၠဂှ် (၁၄၇၇) တၠဝွံ မ္ၚးနူဒဏ်ထံၚ်ဂှ် ဒးဒုၚ်ဖျေံစၟတ်လဝ် ဒုဟ်ဒဏ် နာနာ နွံရောၚ် လလောၚ်ပ္တိတ်လဝ်ရ။

ပရိုၚ်−သြၚ်လောန်တိုၚ်(မ်)