ထဝါဲ၊ သေပ်တေမ်ဗာ (၂၂)
ကံၚ်ဇြဳပၞာန်ဂှ် နကဵုတၚ်ထ္ၜးဟိုတ် ပရေၚ်ဂီုကၠီုတုဲ ဗ္ဒိုပ်ကူသာန်သွံရာန်ဗၞိက် ထဝါဲ−ထဳခဳ မကၟာတ်လဝ် လလအ်ပွိုၚ် (၄) ဂိတုဂှ် ကလေၚ်ပံက်ဟွံမာန်ဏီဂှ်ရ သၟာဗၞိက်ဗွဲမဂၠိုၚ် ဒးဒေါအ်ဇူကၠုၚ်ကမၠောန်အိုတ်တုဲ ပရေၚ်ကူသာန်သွံရာန်တံလေဝ် ဒေါအ်ဒေၚ်အာအိုတ်ယျဂှ် သၟာဗၞိက်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဗ္ဒိုပ်ကူသာန်သွံရာန်ဗၞိက် ထဝါဲ−ထဳခဳ မဒှ်ဗ္ဒိုပ်သၠာဲဂတးဗၞိက် ပယျဵုသေံ−ဗၟာ ၜါဍုၚ်ဂှ် တုဲကၠုၚ်ဂိတုဨပရဴ (၂၄) တေံ နကဵုတၚ်ထ္ၜးဟိုတ်ပရေၚ်ဂီုကၠီုဂှ် ကံၚ်ဇြဳပၞာန် ကၟာတ်သီထောံလဝ် မွဲလ္ပာ်ဓဝ်ရ။
ဟိုတ်နူဗ္ဒိုပ်ကူသာန်သွံရာန်ဗၞိက် ထဝါဲ−ထဳခဳ ကၟာတ်သီလဝ်ဂှ်ရ ကိုပ်ကၠာတေံ သၟာဗၞိက်ဗွဲမဂၠိုၚ်ဝွံ သွံရာန်ကၠုၚ်လဝ် နူဂၠံၚ်မြဝတဳ ကဵု ဂၠံၚ်ဗိက်တံကီုလေဝ် ခရိတ်အိုတ်နာနာ ဇၞော်သၠုၚ်ကၠုၚ်ကီု ၊ သြန်ဒ္ကေဝ်ဗၟာစှ်ေတုဲ ၚုဟ်သြန်ၝာတ် ဆက်သၠုၚ်တိုန်ကၠုၚ်ကီုဂှ်ရ ကမၠောန်တံ ဒေါအ်ဇူကၠုၚ်အိုတ်ရ။
စပ်ကဵုအကာဲအရာဏံတုဲ သၟာဗၞိက်သွံရာန်ဒၟံၚ်ဗၞိက် ပ္ဍဲဗ္ဒိုပ်သၠာဲဂတးဗၞိက် ထဝါဲ−ထဳခဳမွဲတၠ ဟီုလဝ် ဗီုဏံရ။
“အကာဲအရာသၠာဲဂတးဗၞိက်တံဂှ် လက္ကရဴဏံ ဟွံတိုန်ကၠုၚ်အိုတ်ရပုဟ်၊ မၞိဟ်ဓမ္မတာတံရဂှ် အာကၠုၚ် ဟွံမွဲပုဟ်၊ ဗွဲမဂၠိုၚ်ဂှ် ဟွံမွဲဟဂှ်ရ၊ အကာဲအရာသၠာဲဂတးဗၞိက်ဂှ် လ္တူဟွံစှ်ေဟီုဂှ် ဒေါအ်ဇူဒၟံၚ် ဟီုဂွံရ၊ တိတ်လ္ပာ်ဒေသဏံဟီုမ္ဂးလေဝ် တိတ်ဟွံဂွံပုဟ်၊ ဗၞိက်နူဒေသ ပွဳပွူထဳခဳတံမ္ဂးလေဝ် တိတ်ဟွံဂွံပုဟ်” သာ်ဝွံ သ္ဂးရ။
နူကဵုဗ္ဒိုပ်သၠာဲဂတးဗၞိက် ထဝါဲ−ထဳခဳဂှ် ပလံၚ်ပ္တိုန်ဒၟံၚ် ဗၞိက်တိတ်နူပရေၚ်တဵုလွဳတံကဵု ဗၞိက်တိတ်နူဍာ် မဒှ်ဗၞိက်တိတ်နူဒေသဂမၠိုၚ်တံ အဓိကတုဲ နူကဵုဍုၚ်သေံဂှ် ကလေၚ်ပၠောပ်ဒၟံၚ် ကၠေၚ်စက်၊ သၟုဟ်ဓာတ်သ္ဂောံစကာပ္ဍဲဖဴ၊ သတ်ဆုသတ်ဒုန် ကေုာံ ကပေါတ်ဗၞိက်စၞစသ္ဇိုၚ်တံ မပါလုပ် ကပေါတ်တြေံတြေံတံ မဒှ်ရ။
ဟိုတ်နူဗ္ဒိုပ်ကူသာန်သွံရာန်ဗၞိက် ထဝါဲ−ထဳခဳ ကၟာတ်လဝ်ဂှ်ရ အပ္ဍဲဗွဝ်ဖျာဂှ်လေဝ် ကပေါတ်ဗၞိက်သေံတံ ၚုဟ်တိုန်ကၠုၚ်ကဵုဆတုဲ ကပေါတ်ဗၞိက်တိတ်နူဒေသတံဂှ်လေဝ် ဒးဂဗဒၟံၚ်အကာဲအရာ ပၠောပ်ပ္တိုန်လ္ပာ်သေံတေံ ဟွံဂွံရ။
အခိၚ်လၟုဟ်ဂှ် မွဲဒမြိပ်ဂၠံၚ်အာ ဗ္ဒိုပ်သၠာဲဂတးဗၞိက်ထဝါဲ−ထဳခဳဂှ်လေဝ် ပေါဲဗ္တိုက်ၜါလ္ပာ် အကြာဒပ်ကံၚ်ဇြဳပၞာန်ကဵု ဂကောံဒပ်စဵုဒၞါညးဒေသတံ ဆက်သ္ကာတ်မြဟ်ဒၟံၚ်ရ။
ၜိုန်ရဗ္ဒိုပ်ကူသာန်သွံရာန်ဗၞိက် ထဝါဲ−ထဳခဳ ကၟာတ်လဝ်ကီုလေဝ် ဌာနက္ဍိုက်ပ်ပရေၚ်သၠာဲဂတးဗၞိက် သၟဝ်ကံၚ်ဇြဳပၞာန်ဂှ် နူကဵုဗ္ဒိုပ်ကူသာန်သွံရာန်ဗၞိက် ထဳခဳဂှ် နူဂိတုဨပရဴ (၁) စဵုကဵု ဂိတုသေပ်တေမ်ဗာ (၉) ဂှ် နူကဵုကဏ္ဍဗၞိက်ပလံၚ်ပ္တိုန်ဂှ် ဒဝ်ဠာအမေရိကာန် (၁၀၀၀) ပြကောဋိကိုဋ်ပြၚ်၊ နူကဏ္ဍဗၞိက်ပၠောပ်ဂှ် ဒဝ်ဠာအမေရိကာန် (၆) ပြကောဋိကိုဋ်ပြၚ် ကူသာန်သွံရာန်မာန်လဝ်ရောၚ် လီဠာန်တုဲ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)