မတ်မလီု၊ သေပ်တေမ်ဗာ (၂၅)
အလုံကၟိန်ဍုၚ်မွဲ ဟိုတ်ပရေၚ်ပၞာန်သီအဝဵုတုဲ သွက်ကောန်ၚာ်သၟတ် မဒးချိုတ်အာတံဂှ် နကဵုကၟိန်ဍုၚ်သ္အာၚ်တံ သွက်ဂွံဖန်ဗဒှ်ကဵု အကာဲအရာကေတ်အရေဝ် ကုကံၚ်ဇြဳပၞာန်မာန်မွဲဂှ် ညးချဳဒရာၚ် ပရေၚ်ဒဳမဝ်ကရေဇြဳတံ အာတ်မိက်လဝ်ရ။
အပ္ဍဲကာလဒပ်ပၞာန်သီအဝဵု ပွိုၚ်မွဲသၞာံဘာ်ပြၚ်ဂှ် ကံၚ်ဇြဳပၞာန် ဗ္တိုက်ဂြာတ်ကၠုၚ်မခတိုဟ်ကီု၊ ပန်ပှော်ဗ္တိုက် လွဟ်လက်နက်ဇၞော် ကုဗ္ဒိုပ်ပါဲဒဴဘဲပၞာန်တံကဵု သ္ၚိဒၟံၚ်မၞိဟ်တံဂှ်ရ ပရေၚ်ချိုတ်ဂျိုၚ်ကောန်ၚာ်သၟတ်တံ သၠုၚ်တိုန်ကၠုၚ်လဝ်ရ။
ဟိုတ်နူပယောဂ ကံၚ်ဇြဳပၞာန်တံတုဲ အလုံမွဲကၟိန်ဍုၚ် ကောန်ၚာ်သၟတ်ဗဒါဲ (၃၅၀) မ္ဒးချိုတ်အာလဝ်တုဲ ကောန်ၚာ်သၟတ် (၁၅၀၀) ပြၚ်ဝွံလေဝ် ဒးဒုၚ်ရပ်ထိၚ်လဝ် ဟွံဗဗွဲဓဝ်တံရဂှ် အလဵုအသဳညဳသၟဟ်ဂကူ NUG လလောၚ်ပ္တိတ်လဝ် ပ္ဍဲဂိတုသေပ်တေမ်ဗာ (၂၂) တုဲကၠုၚ်တေံရ။
ပ္ဍဲကဵုဂှ် နူကွာန် (လက်ယက်ကုန်း) ၊ ပွိုၚ်ဍုၚ်ဒဳပေဝ်ယေန်၊ ရးသေတ်ကိုၚ်ဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ဂၠံၚ်ကျာ လ္တူဘာဗ္တောန်လိက်တံဂှ်ရ ပရေၚ်ကောန်ၚာ်ချိုတ်ဂျိုၚ် နဂအုံဗွဝ် က္တဵုဒှ်လဝ်ရ။
စပ်ကဵုအကာဲအရာသာ်ဏံတုဲ ကံၚ်ဇြဳပၞာန် မလုလောန်ဒၟံၚ် အမှုရာဇာဝတ်ပၞာန်တံဝွံ ကၠောန်သ္ပဒၟံၚ် ပြဝပရေံပရေံ ဒဵုဗ္စာရံၚ်ဟွံဂွံဂှ်တုဲ သွက်ကိစ္စတံဏံဂှ် နကဵုဂကောံကၟိန်ဍုၚ်သ္အာၚ်တံ ဆအယာံမာတ် ပ္တိတ်လိက်ဟွံသေၚ် သွက်ဂွံဖန်ဗဒှ်ကဵု အကာဲအရာကေတ်အရေဝ် ကုကံၚ်ဇြဳပၞာန်မာန်မွဲဂှ် ဖက်ဆောညးအုပ်ကာ ဗော်ဒဳမဝ်ကရေတ်တေတ်ဗွိုၚ်မၞိဟ်တၟိ ဒဝ်နှေန်န်မှိုဲ အာတ်မိက်လဝ်ရ။
“ ဣဏံဂှ် ဒှ်အမှုရာဇာဝတ် မသ္ကာတ်မြဟ်ပရေံတံရ၊ ပ္ဍဲကိစ္စပရူ ဒဳပေဝ်ယေန်တုဲကၠုၚ်ဂှ်တှ်ေ ပိုယ်တံ ဒးဒှ်လၞီလၞာ်အောန်စိုတ် ကွေံကွေံရ၊ သ္ဂောံဂစိုတ်ပန်ပှော် ကုကောန်ၚာ်အဝဲဟွံစိုပ်ဏီတံ၊ ကောန်ၚာ်တံဂှ် ဂိဒ္ကေဝ်လောန်တုဲ ဂစိုတ်ကဵုညိ ပွမကညာၚ်ကရေဲသာ်ဏံ ဒးဆဵုဂဗဒၟံၚ်ဂှ် က္တဵုဒှ်လၞီစိုတ်ကွေံကွေံရ၊ သွက်ဏံဂှ် ဂကောံဍုၚ်သ္အာၚ်တံ ဆၜိုတ်ပ္တိတ်လိက်သၟးဟွံသေၚ်မွဲသာ် သွက်ဂွံဖန်ဗဒှ်ကဵု အကာဲအရာကေတ်အရေဝ် ကုကံၚ်ဇြဳပၞာန်မာန် သွက်ဂွံဘိုၚ်ရီုဗၚ်ကဵုဂှ် နွံပၟိက်ရောၚ်” သာ်ဝွံ ညးသ္ဂးရ။
မွဲလ္ပာ်ပၠန်ဂှ် ကံၚ်ဇြဳပၞာန်ဝွံ သွက်ဂွံကဵုဇြဟတ်ဂရိုဟ် ကုမိမ မဒစဵုဒစးပရေၚ်ပၞာန်သီအဝဵုတံဂှ် လုတ်လာန်ဒၟံၚ် သီုကဵုပြဝ မရပ်ဒက်လဝ် ကောန်ၚာ်သၟတ် (၆၅) တၠတံ နဒဒှ်ဒးဒုၚ်သ္ပဒၞန်တံဂှ်ကီု၊ လၟိဟ်ဂၞန် ကောန်ၚာ်သၟတ် မဒးဂြိပ်ဒဴပါဲဒလေတ်ဒၟံၚ် ဒၟါနူဘဲဒဏ်ပၞာန်တံဂှ်လေဝ် မၞုံကၠုၚ် စဵုကဵု (၁၄၀၀၀) ပြၚ်ရ။
ပ္ဍဲကၟိန်ဍုၚ်ဗၟာ ဗွဲကြဴဒပ်ပၞာန်သီအဝဵုတုဲဂှ် ပ္ဍဲကောန်ၚာ်သၟတ် ကဝက်ပြၚ်ဂှ်လေဝ် ဒးဆောံလေၚ်ဒၟံၚ် အခေါၚ်တိုန်ဘာတံကဵု အခေါၚ်ဗ္တောန်ပညာတံရဂှ် အလဵုအသဳညဳသၟဟ်ဂကူ NUG ဟီုဂးလဝ်ရ။
ကုကံၚ်ဇြဳပၞာန် မလုလောန်ဒၟံၚ် အမှုရာဇာဝတ်ပၞာန် သာ်ဏံတံဂှ် နကဵုဂကောံသၟဝ်တဲ ကုလသမဂ္ဂတံ ဟွံကၠောန်သ္ပ ဆက်ဆောံမွဲသာ် သွက်ဂွံဆက်ဆောံကဵု အလဵုအသဳညဳသၟဟ်ဂကူ NUG ဂှ် တုဲကၠုၚ်ပ္ဍဲဂိတုသေပ်တေမ်ဗာ (၂၃) တေံ ဂကောံဗွိုၚ်မှာဇန် (၆၀၀) ပြၚ်တံ ပလံၚ်လိက်ပရၚ်ပံက်ထာၚ် ဇရေၚ်သ္ကိုပ်ညးအုပ်ကာ ကုလသမဂ္ဂတုဲ အာတ်မိက်လဝ်ရ။
ပရိုၚ်−သြၚ်လောန်တိုၚ်(မ်)