ပွမစံၚ်ပလီုပလာ် စမြိုၚ်သ္ၚိဒၟံၚ်တံဂှ် ဒပ်ပၞာန်သီအဝဵု သာလုလောန်ကၠုၚ်

သေတ်ကိုၚ်၊ သေပ်တေမ်ဗာ (၂၅)

ကောန်ဂကောံဒပ်ကံၚ်ဇြဳပၞာန်သီအဝဵုတံဝွံ လက္ကရဴဏံ ပွမစံၚ်ပလီုပလာ် စမြိုၚ်သ္ၚိဒၟံၚ် နူဒေသတိဍာ် ဇြဟတ်ပရေၚ်ပၠန်ဂတး မခိုဟ်တံဂှ် အရိုဟ်ဒဒှ်တ္ၚဲ သာလုလောန်ကၠုၚ်ရဂှ် ညးချဳဒရာၚ်ကတိုၚ်ကၟဟ် ပရေၚ်ဒဳမဝ်ကရေဇြဳတံကဵု ညးဒေသတံ ဟီုရ။

အတိုၚ်စရၚ် ဂကောံသုတေသန ISP-Myanmar စဵုကဵုဂိတုသေပ်တေမ်ဗာ (၁၅) ဂှ်မ္ဂး အလုံမွဲကၟိန်ဍုၚ် အကြာပဋိပက္ခရပ်လွဟ်တံဂှ် ဒးဒုၚ်စံၚ်ပလီုပလာ်တံ၊ ဒးလွဟ်မကမ်တံတုဲ လီုလာ်ဆောံလေၚ်အာတံဂှ်ကဵု ဟွံဒှ်ပေါဲဗ္တိုက်မွဲသာ် ဒပ်ကံၚ်ဇြဳပၞာန် လုပ်ဍိုက်ဗ္တိုက်တုဲ စံၚ်ပလီုပလာ်ထောံတံဂှ်ရ သ္ၚိဒၟံၚ်စမြိုၚ် အပံၚ် (၃၆၀၀၀) ပြၚ် ဒးဆောံလေၚ်ဒၟံၚ်ရဂှ် လလောၚ်ပ္တိတ်လဝ်ရ။

ပၞောဝ်ကဵုဂှ် သၞာံဏံ ပ္ဍဲဂိတုသေပ်တေမ်ဗာ ကဵု ဂိတုအဝ်ဂါတ်တံဂှ် ပွမဒးဒုၚ်စံၚ်ပလီုပလာ် သ္ၚိဒၟံၚ်၊ စမြိုၚ်တံ ဂၠိုၚ်ကၠုၚ်ဒၟံၚ် စေအ်အ်တုဲ ပ္ဍဲကဵုရးမကွေကဵု ရးသေတ်ကိုၚ် ဒၞါဲပဋိပက္ခရပ်လွဟ်တံ သၠုၚ်တိုန်ဒၟံၚ်တံဂှ်ဟီုမ္ဂး အရိုဟ်ဒဒှ်တ္ၚဲ ဒးဒုၚ်စံၚ်ပလီုပလာ်ဒၟံၚ်ရ။

ညးဒေသရးသေတ်ကိုၚ်မွဲတၠဂှ် နကဵုကံၚ်ဇြဳပၞာန် ပွမစံၚ်ဒၟံၚ် သ္ၚိဒၟံၚ်ညးဍုၚ်ကွာန်လၟုဟ်ဂှ်ဝွံ ဝးပ္ကဝ်ဒၟံၚ်အခေါၚ်အရာမၞိဟ် ဟွံရောမ်ဟွံဓညတုဲ လုလောန်ကၠုၚ် စဵုကဵုအကာဲအရာ သ္ဇက်ဂွံဟီုဟွံမွဲရဂှ် ဟီုရ။

“လ္ပာ်ဍေံတံ ပွမဝးပ္ကဝ်အခေါၚ်အရာမၞိဟ်တံဂှ် ဟွံရောမ်ဟွံဓည ကၠောန်သ္ပဒၟံၚ်ရ၊ ဍေံတံ ကၠောန်ဒၟံၚ်ဂှ်ဝွံ လ္တူနူပွပရေံဂှ် ဟွံကရပုဟ်၊ အရေဝ်သ္ဂောံၜတ်ကၞာတ် စဵုကဵုဟွံမွဲဒှ်ဒၟံၚ်ရ၊ ညံၚ်ဂွိုအ်ထံက်ပၚ် PDF တံကီု ညံၚ်ဂွိုအ်ထံက်ပၚ် ညးဒဒိုက်ပါဲဒဴဘဲပၞာန်တံကီုဂှ် ဍေံတံ ကၠောန်ဒၟံၚ် နဲကဲစုၚ်ဇဳရ” သာ်ဝွံ သ္ဂးရ။

အတိုၚ်တၚ်နၚ် ISP-Myanmar တံဂှ်မ္ဂး သၞာံဏံ ပ္ဍဲဂိတုအဝ်ဂါတ် မွဲဂိတုဓဝ်ဂှ် အလုံမွဲကၟိန်ဍုၚ်ပြးဇး သ္ၚိဒၟံၚ်၊ စမြိုၚ်အပံၚ်ဖအိုတ် (၆၂၀၀) ပြၚ် ဒးဒုၚ်စံၚ်ပလီုပလာ်လဝ် ဂၠိုၚ်အိုတ်ရ။

ပ္ဍဲကဵုဂှ် ကွာန်ဂမၠိုၚ် နူရးသေတ်ကိုၚ်၊ ရးမကွေ ကေုာံ တွဵုရးကချေၚ်တံဂှ် ဒးဒုၚ်စံၚ်ပလီုပလာ်လဝ် ဂၠိုၚ်အိုတ်တုဲ အပံၚ်ကွာန် မဒးဒုၚ်စံၚ်ပလီုပလာ်လဝ် ဒၞါဲမွဲဒၞါဲဓဝ် သ္ၚိဒၟံၚ်၊ စမြိုၚ် လ္တူ (၁၀၀) ဂှ် မၞုံဒၟံၚ် ဟွံအောန်နူကဵု (၁၀) ကွာန်ရ။

ညးချဳဒရာၚ် ကတိုၚ်ကၟဟ် ပရေၚ်ဒဳမဝ်ကရေဇြဳမွဲတၠဂှ် နကဵုကံၚ်ဇြဳပၞာန် ညံၚ်ညးဍုၚ်ကွာန်တံဂွံဖေက် စံၚ်ပလီုပလာ် သ္ၚိဒၟံၚ်တံကဵု ပွမရပ်ဒက်ဂစိုတ်တံဂှ် လၟေၚ်ဒဒှ်တ္ၚဲ လုလောန်ကၠုၚ် ပရေံပရေံရဂှ် ဟီုရ။

“ စံၚ်ကွာန်ညးဒေသတံတုဲမှ ညံၚ်ညးဍုၚ်ကွာန်တံ ဂွံဖေက်ဂှ်ကီု၊ ညးဍုၚ်ကွာန် ဟွံဖေက်ရတံဂှ်လေဝ်  ဒဵုကဵုမုဟွံမွဲ စံၚ်ယတ် ဂစိုတ်ဂယိုၚ်ရ၊ အခိၚ်ကာလလၟုဟ်ဏံမ္ဂး စွံပွန်ကဵု ဘာလကျာ်တံ၊ ဘာဗ္တောန်လိက်တံ ဒၞါဲညးဍုၚ်ကွာန်ဒေသတံ စ္ၜုဲစ္ၜော်ဒၟံၚ်တံဂှ်တုဲမှ ပန်ပှော်ကၠုၚ်တံဂှ် အရိုဟ်ဒဒှ်တ္ၚဲ နဇိုၚ်နတဲ ဂွံဆဵုဂဗဒၟံၚ်ဂှ် နွံဒၟံၚ်တၟာဂလိုၚ်ရ၊ ဂွံမိၚ်ဒၟံၚ် နွံ၊ ဂွံတီဒၟံၚ်တံလေဝ် နွံရ” ဂှ် ညးသ္ဂးရ။

လ္ပာ်ဒေသသ္ကုတ်လဒေါဝ် ကၟိန်ဍုၚ်ဗၟာ ပ္ဍဲရးမကွေကဵု ရးသေတ်ကိုၚ်တံဂှ် ဒဵုကဵုတ္ၚဲဏံ မွဲကရောံကဵု ပေါဲထ္ၜးဆန္ဒ ဗလးတိဂှ် သီုကဵုပၞာန်ပၠန်ဂတးရပ်လွဟ်တံဂှ် ဂ္စါန်ဒၟံၚ်ညံၚ်ဂွံထပိုတ်ရိုဟ်ကၞက် သၞောတ်တၠအဝဵုတံရ။

ဒပ်ပၞာန်ဗၟာဂှ် ညံၚ်ဂွိုအ်ကၠောန်သ္ပရီုဗၚ် ကုဂကောံဇြဟတ်ပၠန်ဂတး ညးဍုၚ်ကွာန် နူဒေသအညာတံမာန်ဂှ်တုဲ ကွာန်မစံၚ်လဝ်တုဲတံဂှ်လေဝ် ထပ်စံၚ်ပလီုပလာ်ကၠုၚ်ပၠန်ရ။

ညးဒေသ နူရးမကွေမွဲတၠဂှ် ၜိုန်ရဒပ်ပၞာန်ဗၟာ စံၚ်ပလီုပလာ်ဒၟံၚ် ညံၚ်ဒၞါဲမံၚ်ညးဍုၚ်ကွာန်တံ ဟွံဂွံမွဲကီုလေဝ် သွက်တၠအဝဵုပၞာန် ဂွံဒတုံပြဟ်မာန် ဆက်ရီုဗၚ်ကဵုအာရောၚ် ဟီုရ။

“အခိၚ်လၟုဟ် ပြဝဍေံတံ (စကစ) ဝွံ လ္တူညးဍုၚ်ကွာန်တံဂှ် ကၠောန်အာဒၟံၚ် ပွဓဇန်အိုတ်ရ၊ သာ်လဵုကၠောန်ကၠောန် နကဵုတိဍာ်ပိုယ်တံ ညံၚ်ပရေၚ်ပၠန်ဂတးဂွံအံၚ်ဇၞး နူသွာၚ်ဇဳ ဆက်ဂ္စါန်အာတုဲ ဆက်ကၠောန်အာလၟိုန်ရောၚ်” သာ်ဝွံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အခိၚ်လၟုဟ်ဂှ် ဒပ်ကံၚ်ဇြဳပၞာန်တံဝွံ ကြပ်ကၟိန်ဍုၚ်မွဲ ပံက်လဝ်မုက်ပၞာန်တုဲ ဒးဆေၚ်ဒၟံၚ်မုက်ကဵု ပွမဗ္တိုက်ပံၚ်တောဲ ကုဒပ်စဵုဒၞါညးဍုၚ်ကွာန် (PDF) တံကဵု ဒပ်ဂကောံရပ်လွဟ်ကောန်ဍုၚ်အရၚ် (EAOs) တံ အိုတ်အစောံရ။

မွဲလ္ပာ်ပၠန်ဂှ် အကြာဒပ်ကံၚ်ဇြဳပၞာန် ကဵု ဒပ်ပၞာန်ရခေၚ် (AA) ပေါဲဗ္တိုက်ကလေၚ်မွဲဝါပၠန်တံ မသ္ကာတ်မြဟ်ဒၟံၚ်တံဂှ် ပရေၚ်ပၞာန်ကြံၚ်မ္ၚိုဟ်တံ က္တဵုဒှ်ဒၟံၚ်တုဲ ပ္ဍဲဂိတုသေပ်တေမ်ဗာ (၂၃) ဗ္တံ ၜိုတ်(၉) နာဍဳဂှ် ဒပ်ကံၚ်ဇြဳပၞာန် ခမရ (၂၁၀) ဝွံ စံၚ်လဝ်ကွာန်တဗုက်ဒံၚ် မၞုံပွိုၚ်ဍုၚ် ဗူတဳဒံၚ်ဂှ်ဏီရ။

ပရိုၚ်−သြၚ်လောန်တိုၚ်(မ်)