ဗ္တိုက်ဗ္ဒိုပ်ဒပ်ကျာတံမာန်မှ စဵုဒၞါကောန်အရာပ်တံမာန်ဏောၚ်

နေဗျဳဒဝ်၊ ဒဳဇြေမ်ဗာ ၁၈

လ္ပာ်ဒပ်ပၠန်ဂတးတံ စပ်ကဵုတိဍာ်ထိၚ်ဒက်တံ ဂၠိုၚ်တိုန်ကၠုၚ်ဂှ်တုဲ ဗ္တိုက်ဗ္ဒိုပ်ဒပ်ကျာ ကံၚ်ဇြဳပၞာန်တံမာန်မှဟေၚ် စဵုဒၞါကောန်အရာပ်တံမာန်ဏောၚ်ဂှ် အကြာပ်ဒပ် ဇြေယျ နူကဵုဒပ်ကျာ မသ္ပလဝ်ဇြဳဒဳအာမ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

အခိၚ်လၟုဟ် ပ္ဍဲဒေသအညာကီု သီုကချေၚ်၊ ချေၚ်၊ ကရေၚ်ဍာဲ၊ ရးသေံသ္ကုတ်သၟဝ်ကျာ ကေုာံ ရခေၚ်တံဂှ် ဂကောံရပ်လွဟ်ကောန်ဂကူ အပ္ဍဲဒေသတံကဵု ဂကောံပၠန်ဂတးဂမၠိုၚ် ထိၚ်ဂွံလဝ် ဍုၚ်ကံၚ်ဇြဳပၞာန် မအုပ်ဓလီုလဝ်တံ ဗ္ဒါဲ ၉၀ ဍုၚ်ရ။

နကဵုကံၚ်ဇြဳပၞာန် ဟိုတ်နူပၞာန်ထ္ပက်ပၠန်ဂတး ကြပ်ဗ္ဒါဲအလုံဍုၚ်မွဲဂှ်တုဲ ပ္ဍဲပရေၚ်ပၞာန်ဗလးတိတံဂှ် သီုပရေၚ်ဗ္တိုက်ကီု သီုပရေၚ်စိုတ်ဓာတ်ကီုဂှ် ဒးကျဗြံကၠုၚ်ဒၟံၚ်အဆက်က်တုဲ သ္ပပဓာန်ကၠုၚ်ကဵု ပရေၚ်ဗ္တိုက်ပၞာန်ကျာတံ အဓိကရ။

မွဲလ္ပာ်ဂှ်ပၠန် တိဍာ်ဒးဗလးလဝ်တဲတံဂှ်လေဝ် ၜိုန်ရထ္ပက်ပၞာန်တိုက်ဟွံမာန်ကီုလေဝ် ညံၚ်စက်ယန်ပရေၚ်အုပ်ဓုပ် ဂေတ်ဂြိပ်ဟွံဂွံဂှ် စွံပွန်ကဵုစမြိုၚ် မဆေၚ်စပ်ကဵုကောန်အရာပ်တံတုဲ ထောံမခတိုဟ်ဗ္တိုက်ဒၟံၚ်တံ နွံဒၟံၚ်ရ။

ဟိုတ်ဂှ်ရ ပွမဗ္တိုက် တမ်ရိုဟ်မၞိဟ်ကောန်ဒပ်ကံၚ်ဇြဳပၞာန်တံဂှ်ကဵု ပလီုက္ၜၚ်ကျာတံဂှ်ရဟေၚ် စဵုဒၞါအာ တိဍာ်ထိၚ်ဒက်လဝ်တံကဵု ညးဍုၚ်ကွာန်တံမာန်ဏောၚ်ဂှ် အကြာပ်ဒပ်ဇြေယျ နူဒပ်ကျာ မသ္ပလဝ်ဇြဳဒဳအာမ်ဂှ် သ္ၚဳဂၠိပ်လဝ်ရ။

“ပြသၞာဂှ်တှ်ေ ဂွံစဵုဒၞါညးဍုၚ်ကွာန်တံဂှ် အခိၚ်မၞိဟ်သ္ၚိတ် အခိၚ်ညးဍုၚ်ကွာန်တံတိက်ဒၟံၚ်အိုတ်ဂှ် လုပ်ထောံမခတိုဟ် ပ္ဍဲဍုၚ်မသီဂွံလဝ်တံဂှ်တုဲ ဂွံစဵုဒၞါညအ်ဂှ် ဝါတ်ဂါတ်ကွေံကွေံဏောၚ်။ ဂွံစဵုဒၞါညးဍုၚ်ကွာန်တံ၊ ညံၚ်ပရေၚ်ဇီုကပိုက်ဟွံဂွံမွဲ ညံၚ်ဟွံဂွံဇီုကပိုက်ဒးသီုဖအိုတ်ဂှ် နွံမွဲနဲရဏောၚ်။ ဗ္တိုက်ကောန်ဒပ်ကံၚ်ဇြဳပၞာန််တံကဵု ညံၚ်တိုန်က္ၜၚ်ကျာဟွံဂွံ လုပ်စိုပ်ပလီုပလာ် ဒပ်ကျာတံရဏောၚ်။ နဲကဲဏံရဂှ် ဒှ်ဂၠံၚ်ဍာန်စဵုဒၞါညးဍုၚ်ကွာန် ပ္ဍဲတိဍာ်မထိၚ်ဒက်လဝ်တံဂှ် ဂွံဏောၚ်” သာ်ဝွံ သ္ဂးရ။

နကဵုကံၚ်ဇြဳပၞာန်  အပ္ဍဲပၞာန်သီအဝဵုဏံ ဟိုတ်နူပေါဲဗ္တိုက်က္တဵုဒှ်လဝ်တံဂှ်ကဵု ဟိုတ်နူဂၠံၚ်ဂြိပ်ဗၠေတ်အာတံဂှ်တုဲ ဒးဆောံလေၚ်လီုလာ်အာလဝ် က္ၜၚ်ကျာလ္ၚဵုတံဂှ်တုဲ ပ္ဍဲအသေအဟာန် တ္ၚဲကၠောံသၞာံ ဒပ်ပၞာန်ကျာ မကၠောန်ဗဒှ်လဝ် ပ္ဍဲဂိတုဒဳဇြေမ်ဗာ ၁၅ ဂှ် ကလေၚ်ဗပေၚ်လဝ်ရ။

ပ္ဍဲကဵုဂကူက္ၜၚ်ကျာ ဗပေၚ်လဝ်ဂမၠိုၚ် က္ၜၚ်ကျာသၞေၚ်ဝဲ Mi 17 ပိဖ္ဍိုက်၊ က္ၜၚ်ကျာဗ္တိုက် FTC 2000 G ပိဖ္ဍိုက်၊ က္ၜၚ်ကျာဗ္တိုက် K-8W မွဲဖ္ဍိုက် ကေုာံ က္ၜၚ်ကျာပလံၚ်ဇွောံမ Y-8 မွဲဖ္ဍိုက် အပံၚ်ဖအိုတ် က္ၜၚ်ကျာဒ္စါံဖ္ဍိုက် ထ္ၜးပျးလဝ် ပ္ဍဲအသေအဟာန်ဂှ် ဂွံဆဵုကေတ်ရ။

ပ္ဍဲအသေအဟာန်ဂှ် က္ဍိုပ်သ္ကိုပ်ပၞာန်ဂှ်တှ်ေ အစောံဇြဟတ်မှဲအကးတေံကဵု အစောံဇြဟတ်က္ၜၚ်ကျာတံဂှ်ဝွံ ညံၚ်ဂွံဇၞးပေါဲပၞာန်ဂှ် ပါလုပ်ဒၟံၚ် ပ္ဍဲအခန်ကဏ္ဍပၟိက်ဇၞော်တံဂှ်တုဲ ယဝ်ရအစောံဇြဟတ်ပၞာန်ကျာခိုဟ်ဒၟံၚ်မ္ဂး ဗ္တိုက်သရိုဟ်အာသၞတံမာန်ဏောၚ်ဂှ် သ္ဂးရ။

က္တဵုဗဒှ်ကဵုစိုတ်ဓာတ် ကေုာံ အစောံဇြဟတ်ဗ္တိုက် ကောန်ဒပ်ကံၚ်ဇြဳပၞာန်တံ သ္ဂောံခိုဟ်တိုန်ကၠုၚ်ဂှ် ဂွံညာတ်ကေတ်တုဲ လ္ၚတ်စၟဳတ်အကာဲအရာမက္တဵုဒှ်ဒၟံၚ်ဂှ် ဟွံကဵုပိုတ်သ္ကုတ်တုဲ ညံၚ်ဂွံပြံၚ်လှာဲတောတက်တိုန်အာဂှ် ဒးရေၚ်တၠုၚ်ဏောၚ် ဟီုဏာလဝ်ရ။

အကြာပ်ဒပ်ဇြေယျ နူဒပ်ကျာ မသ္ပလဝ် CDM ဂှ်တှ်ေ ပရေၚ်ဗ္တိုက်ပၞာန်ကျာဂှ်ဝွံ ဆက်အာဒၟံၚ်အတိုၚ်ဏံရဏီဏောၚ်ဂှ်ရ နကဵုဂကောံပၠန်ဂတးဂမၠိုၚ် ဒးစဵုဒၞါညးဍုၚ်ကွာန် နူတိဍာ်သီဂွံလဝ်တံဂှ်ဏောၚ်ဂှ် ထံက်ထ္ၜးလဝ်ရ။

“ ဂွံသောၚ်ကလး ဒပ်ကျာကံၚ်ဇြဳပၞာန်ဂှ် ဂကောံရပ်လွဟ်ကောန်ဍုၚ်အရၚ်သီုဖအိုတ် တုဲပၠန် ဂကောံရပ်လွဟ်ဒစဵုဒစးဒၟံၚ် ဒပ်ပၞာန်အပ္ဍဲဍုၚ်ဗၟာတံသီုဖအိုတ် ညးတာလျိုၚ်ဂမၠိုၚ် ပံၚ်ကောံတုဲ ဒှ်ပြသၞာဒးသောၚ်ကလးမွဲဏောၚ်ဂှ် အဲညာတ်ကေတ်ရ။ ဟိုတ်ဂှ်ရ ညးဍုၚ်ကွာန် နူဒေသ နူဍုၚ်ဇကုတံမသီဂွံလဝ်တံဂှ် ယဝ်စဵုဒၞါကဵုဟွံမာန်မ္ဂး သီဂွံလဝ်လေဝ် ဒှ်အာမးမးရဏောၚ်” သာ်ဝွံ သ္ဂးရ။

အတိုၚ်စရၚ်ဂကောံမၚ်မွဲရီုဗၚ် ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး တုဲကၠုၚ် နူဂိတုအဝ်ဂါတ်မံက်တေံ စဵုကဵုဂိတုနဝ်ဝေမ်ဗာအိုတ်ဂှ် ဟိုတ်နူပရေၚ်ဗ္တိုက်ပၞာန်ကျာ ကံၚ်ဇြဳပၞာန်တုဲ ကောန်အရာပ် ဗ္ဒါဲ ၂၄၀ တၠ ဒးချိုတ်အာလဝ်ရ။

အပ္ဍဲပရေၚ်ဗ္တိုက်ပၞာန်ကျာဂှ် တွဵုရးရခေၚ် ၈၈ တၠ၊ တွဵုရးသေံဇၞော် ၄၃ တၠ ဒးချိုတ်လဝ်ဂၠိုၚ်အိုတ်ဂှ် ပ္ဍဲဂိတုဒဳဇြေမ်ဗာ ၁၁ ဂှ် တၚ်နၚ် AAPP မလလလောၚ်ပ္တိတ်လဝ် ပ္ဍဲဂိတုဒဳဇြေမ်ဗာ ၁၁ တေံ ထ္မံက်ထ္ၜးလဝ်ရ။

စပ်ကဵုပရေၚ်စဵုဒၞါပၞာန်ကျာဂှ်တုဲ ဂကောံပၠန်ဂတးရပ်လွဟ်တံဂှ် လွဟ်ပန်က္ၜၚ်ကျာ ရုမ်မ်ဂပ်ပ်ဟွံမွဲဂှ်တုဲ ညးဍုၚ်ကွာန်ဂမၠိုၚ် သွက်ဂွံၜံက်ခါဲလဝ်ကတိုၚ်ပါဲဗုမ်တံကဵု တၚ်စၞောန်နွံပၟိက် သွက်သၞောတ်ဒစးဒုၚ်ကဵုသမ္တီတံဂှ် ကဵုပညာဟီုတွံဒၟံၚ်တံ နွံဒၟံၚ်ရ။

သုတေသဳပရေၚ်ပၞာန်တံဂှ်တှ်ေ နကဵုဂကောံပၠန်ဂတးရပ်လွဟ်ဂမၠိုၚ် ဂွံထိၚ်ဒဝ်အာ တိဍာ်ထိၚ်ဒက်လဝ်ဂမၠိုၚ် ဍာ်ဇမၠိၚ်ဂှ်ကဵု ဂွံစဵုဒၞါညးဍုၚ်ကွာန်တံမာန်ဂှ် နွံပၟိက်ဒၟံၚ်ကဵု လွဟ်ပၞာန်ဂွံစဵုဒၞါပၞာန်ကျာတံဂှ်ရောၚ် ထံက်ထ္ၜးလဝ်ရ။

ပရိုၚ်−သြၚ်လောန်တိုၚ်(မ်)

ဗီု−MOI