တၞၚ်သဳ၊ ဒဳဇြေမ်ဗာ ၁၉
ပ္ဍဲရးတၞၚ်သဳဂှ် ပါဲနူပေါဲဗ္တိုက်အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ဟိုတ်နူကဵုပရေၚ်ပန်ပှော်လွဟ်ဇၞော် နူဒပ်ကံၚ်ဇြဳပၞာန်တံဂှ်ကီုတုဲ အပ္ဍဲဂိတုနဝ်ဝေမ်ဗာတုဲကၠုၚ်တေံ ညးဒးဂြိပ်ဒဴထောံလသာသ္ၚိဌာန် နွံဒၟံၚ် စဵုကဵု ၆၈၀၀၀ ပြၚ်ဂှ် ဂွံတီကေတ် ဇရေၚ်ဂကောံသုတေသန FE5 Thanintharyi ရ။
အပ္ဍဲဂိတုနဝ်ဝေမ်ဗာဂှ် ဟိုတ်နူဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်တ္ၚဲဇမၠိၚ် ပ္ဍဲကွာန်တံဂှ်တုဲ ပါဲနူပေါဲဗ္တိုက်ၜါလ္ပာ်ဂှ် ဟိုတ်နူစံၚ်ကၠုၚ်သ္ၚိဒၟံၚ်တံ၊ ဟိုတ်နူရပ်ဒက်ပြိုက်ဂစိုတ် ကောန်အရာပ်တံဂှ်တုဲ ညးဒးဂြိပ်ဒဴထောံလသာသ္ၚိဌာန်တံ သာဂၠိုၚ်ကၠုၚ်ရ။
ပ္ဍဲပွိုၚ်ဍုၚ်ထဝါဲ၊ ပွိုၚ်ဍုၚ်လံၚ်လုၚ်၊ ပွိုၚ်ဍာ်ဗု ကေုာံ ပ္ဍဲပွိုၚ်ဍုၚ်တယိတ်ချံၚ် နွံအပ္ဍဲခရိုၚ်ထဝါဲတံဂှ် ညးဒးဂြိပ်ဒဴထောံလသာသ္ၚိဌာန် ၃၁၉၀၀ ပြၚ် နွံတုဲ ပ္ဍဲပွိုၚ်ဍုၚ်လံၚ်လုၚ်မွဲပွိုၚ်ဍုၚ်ဓဝ်ဂှ် ဟိုတ်နူပေါဲဗ္တိုက်တံကဵု ဒဒှ်မထ္ပက်ကၠုၚ်ကရောၚ်ပၞာန်တ္ၚဲဇမၠိၚ်တံဂှ်တုဲ ညးဒးထောံလသာသ္ၚိဌာန် ပါဲဒလေတ်တံ နွံကၠုၚ်လဝ် ဗ္ဒါဲ ၁၂၀၀၀ ရ။
ပ္ဍဲပွိုၚ်ဍုၚ်တၞၚ်သဳ၊ ပွိုၚ်ဍုၚ်ပဠဝ် ကေုာံ ပွိုၚ်ဍုၚ်ဗိက် မၞုံအပ္ဍဲခရိုၚ်ဗိက်တံဂှ် ဟိုတ်နူပေါဲဗ္တိုက်ၜါလ္ပာ်ကဵု ဒးဒုၚ်ဗ္တိုက်ကဵုပၞာန်ကျာတံဂှ်တုဲ ညးဒးထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ ၃၅၉၀၀ တၠပြၚ် နွံလဝ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
ကံၚ်ဇြဳပၞာန် ကလေၚ်ထ္ပက်ကၠုၚ်ကရောၚ်ပၞာန် ပ္ဍဲတိဍာ် မၞုံပ္ဍဲပွိုၚ်ဍုၚ်ပဠဝ်တံဂှ်တုဲ ဟိုတ်နူထိၚ်ဒက်လဝ် ကွာန်လ္ၚဵုတံဂှ်တုဲ ညးကလေၚ်စဴမံၚ်ပ္ဍဲကွာန်တံဂှ်လေဝ် ထပ်ဒးပါဲဒလေတ်ဒၟံၚ်ဘဲပၞာန်ရောၚ် သ္ဂးရ။
ပ္ဍဲခရိုၚ်ကအ်သံၚ်ဂှ်တှ်ေ ဟိုတ်နူလုပ်စိုပ်ထ္ပက်ကၠုၚ်ကရောၚ်ပၞာန် စံၚ်ပလီုဒၟံၚ်သ္ၚိဒၟံၚ်တံဂှ်တုဲ ညးဒးဂြိပ်ဒဴထောံလသာသ္ၚိဌာန်တံ နွံလဝ် ဗ္ဒါဲ ၅၀၀ ရ။
မွဲလ္ပာ်ဂှ်ပၠန်လေဝ် ကံၚ်ဇြဳပၞာန်ဝွံ ပ္ဍဲကဵုဒေသ (အရှေ့တော) ထဝါဲ၊ ပွိုၚ်တိုက်ဒံၚ်ပျံက် တယိတ်ချံၚ်၊ ပွိုၚ်ဍုၚ်တၞၚ်သဳကဵု ပွိုၚ်ဍုၚ်ပဠဝ်တံဂှ် ဟိုတ်နူကၟာတ်လဒဵုလဝ် အခေါၚ်ယိုက်ဏာနၚ်သ္ၚု၊ ဇွောံမစၞစ ကေုာံ ဂဥုဲဇဗတံဂှ်တုဲ ညးဒေသပါဲဒလေတ်ဘဲပၞာန်တံ ဒှ်ဒၟံၚ်အခက်အခုဲအိုတ်ရ။
ညးပါဲဒဴဘဲပၞာန် နွံပ္ဍဲရးတၞၚ်သဳ ဗွဲမဂၠိုၚ်ဝွံ ဟွံမွဲကဵုကိုန်ဂစိုတ်တုဲ တန်တဴကဵုအကာဲအရာ ပေါဲဗ္တိုက်က္တဵုဒှ် လုပ်စိုပ်ထ္ပက်ကၠုၚ်ကရောၚ်ပၞာန်ဂှ်တုဲ လၟိဟ်ပြံၚ်လှာဲဒၟံၚ်တံ နွံဒၟံၚ်လၟိုန်ဂှ် ကဵုလဝ်သမ္တီရ။
အတိုၚ်တၚ်နၚ် ရုၚ်ပ္ညဳပ္ညပ်စပ်ကဵုပရေၚ်ဗ္စာရဏာမၞိဟ် ကုလသမဂ္ဂ UNOCHA ဂှ်မ္ဂး ဟိုတ်နူပဋိပက္ခရပ်လွဟ် မက္တဵုဒှ်ဒၟံၚ် အလုံဍုၚ်မွဲဂှ်တုဲ လၟိဟ်မၞိဟ်ဗ္ဒါဲ ၃ ဒဿမ ၅ ပြကောဋိကိုဋ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ

