ကအ်ကြိက်၊ ဒဳဇြေမ်ဗာ ၂၅
တွဵုရးကရေၚ် ပွိုၚ်ဍုၚ်ကအ်ကြိက် လ္တူဂၠံၚ်ဒဵုဒဝ်ဏဂှ် အကြာကရောၚ်ပၞာန်အံၚ်ဇေယျ ဒပ်ကံၚ်ဇြဳပၞာန်ကဵု ဒပ်ပံၚ်ကောံဒပ်ပၠန်ဂတးတံဂှ် ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ်ရောၚ် ဂွံတီကေတ် နူကဵုတမ်ရိုဟ်ပရိုၚ်ပရေၚ်ပၞာန် အပ္ဍဲဒေသတံရ။
လ္ပာ်ကွာန်( ရန်ကုတ်) ဗ္ဒါဲဂၠံၚ်ဒဵုဒဝ်ဏတြေံ သ္ကုတ်သၟဝ်ကျာ ဍုၚ်ကအ်ကြိက်ဂှ်ကဵု ဂၠံၚ်ဇၞော်အာယှ ဗြဝတဳ−ကအ်ကြိက်ဂှ် အကြာကရောၚ်ပၞာန်ဒပ်ကံၚ်ဇြဳပၞာန် သၟဝ်တဲကရောၚ်ပၞာန်အံၚ်ဇေယျတံကဵု ဒပ်ပံၚ်ကောံပၠန်ဂတးတံဂှ် စဵုကဵုဂိတုဒဳဇြေမ်ဗာ သတ္တာဟတတိယလောန်ၜက်ကၠုၚ်ဂှ် ပေါဲဗ္တိုက်ၜါလ္ပာ် ဆက်သ္ကာတ်မြဟ်ဒၟံၚ်ရ။
ပ္ဍဲဂၠံၚ်ဇၞော်အာယှ ကအ်ကြိက်−ဗြဝတဳ လ္တူဒဵုဒဝ်ဏဂှ် ဒပ်ပံၚ်ကောံပၠန်ဂတး KNLA တံ ဗိုၚ်ကၟာတ်လဒဵုဗ္တိုက်ဒၟံၚ် ကရောၚ်ပၞာန်သၟဝ်တဲအံၚ်ဇေယျဂှ်တုဲ လ္ပာ်ဒပ်ကံၚ်ဇြဳပၞာန်လေဝ် နူကဵုလ္တူဍုၚ်ကအ်ကြိက်ဂှ် ဘိုၚ်ပန်ကဵုလဝ်လွဟ်ဇၞော်၊ ကမ်လှောဝ်(အတွဲလိုက်ပစ်ဒုံး) တံဂှ်ရောၚ် တမ်ရိုဟ်ပရိုၚ်ပရေၚ်ပၞာန်ဗလးတိတံ ဟီုရ။
ဟိုတ်နူဒပ်ကံၚ်ဇြဳပၞာန် ပန်ပှော်ကၠုၚ် နကဵုကမ်လှောဝ် (အတွဲလိုက်ပစ်ဒုံး) တံဂှ်တုဲ အပ္ဍဲအကြာတ္ၚဲတံဏံ လ္ပာ်ဒပ်ပံၚ်ကောံပၠန်ဂတး KNLA ဂှ် ကောန်သ္ဂံၚ်မွဲတၠ ပြဟ်လလုဲအာလဝ်ရောၚ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ပရေၚ်ပၞာန် အပ္ဍဲဒေသမွဲတၠရ။
သ္အာၚ်နူဂှ်ပၠန် ပ္ဍဲဂိတုဒဳဇြေမ်ဗာ ၂၂ အပ္ဍဲပရေၚ်ဗ္တိုက်သရိုဟ် ကရောၚ်ပၞာန်အံၚ်ဇေယျကံၚ်ဇြဳပၞာန်တံဂှ် လ္ပာ်ဒပ်ကံၚ်ဇြဳပၞာန် ၂ တၠ ချိုတ်အာလဝ်တုဲ သီုကဵုရပ်ဂွံလဝ် ဂၠုဲပၞာန်ပန်တၠ သီုလွဟ်လက်နက်ဂမၠိုၚ်ဂှ် Justice Soldier PDF ကဵုသမ္တီလလောၚ်ပ္တိတ်လဝ်ရ။
သွက်ဂွံကဵုအရီုပၞာန် ဇရေၚ်ကရောၚ်ပၞာန်အံၚ်ဇေယျ မစိုပ်ဒၟံၚ်လ္တူရေၚ်ဒဵုဒဝ်ဏဂှ် ဒပ်ကံၚ်ဇြဳပၞာန်ဝွံ နူကဵုဘာအၚ်၊ ကြုၚ်ဒဵု၊ ဒေသနဘူတံဂှ်မွဲကဆံၚ် ပလံၚ်ဗလးဏာဒၟံၚ် ဒြဟတ်ပၞာန်အရီုဂမၠိုၚ် ပါလုပ်သီုကဵု ကောန်ဒပ်စှ်ေနူတန်ဗ္တောန်ကွတ်ပၞာန်တၟိတံ ပ္ဍဲဍုၚ်ကအ်ကြိက်နွံဒၟံၚ်ဂှ် တမ်ရိုဟ်ပရိုၚ်ဗလးတိတံ သ္ဂးအိုတ်ရ။
သွက်ဂွံထိၚ်ဒက်တိဍာ် ဂၠံၚ်ဇၞော်အာယှကီု ပါလုပ်သီုကဵုဍုၚ်ဗြဝတဳ ကေုာံ ဒေသတေန်ဂါန်ညဳနံၚ် တွဵုရးကရေၚ်တံဂှ် နူဂိတုမာတ်တုဲကၠုၚ်တေံ ဒပ်ကံၚ်ဇြဳပၞာန် ထ္မံက်ကၠုၚ်ဒၟံၚ်ပရေၚ်ပၞာန်အံၚ်ဇေယျ မဒှ်ပရေၚ်ပၞာန်ကဆံၚ်ကၟိန်ဍုၚ်ဂှ်ရ။
ဆ္ဂး ကရောၚ်ပၞာန်အံၚ်ဇေယျကံၚ်ဇြဳပၞာန်ဂှ်ဝွံ ဟိုတ်နူဒပ်ပံၚ်ကောံပၠန်ဂတးတံ ကြတ်ဗ္တိုက်လဝ်ဂှ်တုဲ အာကၠုၚ်ဟွံဂွံ နွံဒၟံၚ်ပ္ဍဲလ္တူဒဵုဒဝ်ဏဂှ်တုဲ အရာမဇီုကပိုက်ကလိဂွံဝပ်ချိုတ်အာတံကဵု ဂြိပ်တိတ်ဖျေံလွဟ်တံ ဆက်နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−KNU