လံၚ်လုၚ်၊ ဒဳဇြေမ်ဗာ ၂၆
ရးတၞၚ်သဳ ပွိုၚ်ဍုၚ်လံၚ်လုၚ် ပ္ဍဲကွာန်ကျံက်နဳမဝ်ဂှ် နူဂိတုဒဳဇြေမ်ဗာ ၂၃ စဵုကဵုဂိတုဒဳဇြေမ်ဗာ ၂၅ ဏံဂှ် ပေါဲဗ္တိုက်က္တဵုဒှ်ဆက်ဒၟံၚ်တုဲ သ္ကာတ်မြဟ်ဒၟံၚ်ရောၚ် ဂကောံပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲပေါဲဗ္တိုက်တံဏံဂှ် လ္ပာ်ဒပ်ပၠန်ဂတးတံဂှ်လေဝ် ဟွံဆုတ်ကလေၚ် ဆက်ဗ္တိုက်ဒၟံၚ်တုဲ လ္ပာ်ကံၚ်ဇြဳပၞာန်ဂှ်လေဝ် ညံၚ်ကုန်ဗ္ဒိုပ်ဒပ်ဂမၠိုၚ် ဟွံဂွံစှ်ေအာဂှ် ပန်ပှော်ကဵုဒၟံၚ် နူဒပ်တိုက်၊ ဒပ်ဍာ်၊ ဒပ်ကျာတံရောၚ် သ္ဂးရ။
စဵုကဵုဂိတုဒဳဇြေမ်ဗာ ၂၅ ဏံဂှ် အကာဲအရာပေါဲဗ္တိုက် ဟွံညိၚ်ဏီတုဲ ဆက်က္တဵုဒှ်ဒၟံၚ်တုဲ လ္ပာ်ကံၚ်ဇြဳပၞာန်ဂှ်လေဝ် ညံၚ်ဗ္ဒိုပ်ညးတံ ဟွံဂွံစှ်ေအာဂှ် ဒးတဝ်စၞေဟ်ဒၟံၚ်တၟာလှ်ဂှ်ေ ကောန်သ္ဂံၚ်လုပ်ပေါဲဗ္တိုက်မွဲတၠ ဟီုရ။
အပ္ဍဲပေါဲဗ္တိုက်ဂှ် ကောန်ဒပ်သီုၜါလ္ပာ် ဇီုကပိုက်ဒးနွံဒၟံၚ်တုဲ လၟိဟ်ဂှ်တှ်ေ ပြဟ်ဟ်ဏံ သ္ပဒတန်ဟွံဂွံဏီပုဟ်ဂှ် သ္ဂးရ။
လ္ပာ်ကံၚ်ဇြဳပၞာန်ဂှ်တှ်ေ အခိၚ်ဒှ်ပေါဲဗ္တိုက်ဂှ် ထောံမခတိုဟ်နူကဵုတရဴကျာကီု၊ ဘိုၚ်ပန်ကဵုလွဟ်ဇၞော် နူကဵုက္ၜၚ်ပၞာန်တံကီုဂှ် ကၠောန်သ္ပဒၟံၚ်ရ။
ပ္ဍဲဂိတုဒဳဇြေမ်ဗာ ၂၄ ပယျာံနူဂယး ၜိုတ် ၆ နာဍဳဂှ် နူကဵုသၞေဟ်ကၚ်အကံက်အခေါန် ဍုၚ်ထဝါဲဂှ် ဂကောံဒပ်ကံၚ်ဇြဳပၞာန် နူဒပ်ခမရ ၄၀၅ ဖျေံသ္ဇိုၚ်တယိတ်ချံၚ် မကၠုၚ်ဘိုၚ်ကဵုပၞာန်ရီု လ္ပာ်ကျံက်နဳမဝ် နကဵုဂၠုၚ်စက်ပါမ်ကတံဂှ် လ္ပာ်ဒပ်ပံၚ်ကောံပၠန်ဂတးတံ ထောံလဝ်မခတိုဟ်နကဵုဒရုၚ် အပ္ဍဲၜဳထဝါဲ ဗ္ဒါဲကွာန်ဝေဒဳတံဂှ်တုဲ သ္ကိုပ်တမ်ဒပ် ကလိဂွံအာဝပ်တုဲ ကောန်သ္ဂံၚ် ၂ တၠ ချိုတ်အာလဝ်ရောၚ် သ္ဂးရ။
ပ္ဍဲဂိတုဒဳဇြေမ်ဗာ ၂၃ အခိၚ်နူဂယး ၜိုတ် ၉ နာဍဳပြၚ်ဂှ် လ္ပာ်ဒပ်ပံၚ်ကောံပၠန်ဂတးတံ ကၠုၚ်စိုပ်ဗ္တိုက်လဝ် ဗ္ဒိုပ်ပျူသဝ်ထဳ ကေုာံ ကံၚ်ဇြဳပၞာန် မၞုံအပ္ဍဲကွာန်ကျံက်နဳမဝ်ဂှ်တုဲ ပေါဲဗ္တိုက်ၜါလ္ပာ်သ္ကာတ်မြဟ်ဒၟံၚ်ရောၚ် ဂွံတီကေတ်ရ။
ပေါဲဗ္တိုက်ဒှ်ဒၟံၚ်တုဲ ညးဒေသဗၞတ် ၁၀၀၀ နူကဵုကွာန်ကျံက်နဳမဝ်၊ အံက်ကျံက်ဝတ်၊ ကျံက်ဝတ်ပျေန်တံဂှ်ဝွံ ဒးပါဲဒလေတ်ဒၟံၚ် လ္ပာ်ကွာန်ဗၠးဘဲတံ နကဵုဂၠုၚ်၊ ကွဳစက်၊ ကွဳလိုန်ဓာတ်တံဂှ်ရ။
ပရေၚ်ဗ္တိုက်ဏံဂှ်တှ်ေ ဒပ်ပံၚ်ကောံ ပကဖလံၚ်လုၚ်၊ T1 တံ ဗ္တိုက်ဒၟံၚ်ရောၚ် သ္ဂးရ။
ပ္ဍဲကွာန်ကျံက်နဳမဝ်ဂှ် ဒၞါဲဒပ်ကံၚ်ဇြဳပၞာန် ဖျေံလဝ်ဗဒိုပ်ဂှ် နွံ ၃ တုဲ ကောန်ဒပ်ကံၚ်ဇြဳပၞာန် ဗၞတ် ၃၀ ပြၚ်ကဵု ဇြဟတ်ပျူသဝ်ထဳ ၅၀ ပြၚ် နွံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media