ကျာ်ထဝ်၊ ဒဳဇြေမ်ဗာ ၂၈
ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲကွာန်ဝါဒက်ကွေန် ပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ်တုဲ မၞိဟ်ဗြဴမွဲတၠ ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံကဵု ဗော်သွးကောန်ဂကူကရေၚ် KNU ခရိုၚ်သဓီုရ။
တုဲကၠုၚ်ပ္ဍဲဂိတုဒဳဇြေမ်ဗာ ၂၆ အခိၚ်နူဂယးဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ် တမ်ဒပ်ကံၚ်ဇြဳပၞာန် ခမရ စၟတ် ၂၀၇ ဖျေံသ္ဇိုၚ်ဒုၚ်သယိတ်တံ နကဵုဒရုၚ်ရ။
သွက်ဂွံကလေၚ်ပၠန်တဲ ကုပရေၚ်ဗ္တိုက်ဏံဂှ်တုဲ ဒပ်ကံၚ်ဇြဳပၞာန် ကလေၚ်ပန်ပှော်ကၠုၚ်လွဟ်ဇၞော်ဂှ် ဒတုံဗ္တိုဟ်ထ္ကးအာလဝ် အပ္ဍဲကွာန်ဝါဒက်ကွေန် သ္ကုတ်အရာပ်တၟိဂှ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာဂှ်တုဲ မအေးသန္တာ အာယုက် ၂၂ သၞာံ ဒၟံၚ်ကွာန်ဝါဒက်ကွေန်ဂှ်ဝွံ ဒးအာလဝ်ဝပ် ပ္ဍဲကဵုဇိုၚ်၊ ပ္ဍဲဇကုဇကောဝ်တံဂှ်တုဲ ဒှ်ဒၟံၚ်အကာဲအရာ ဒးဂွိၚ်ကဵုဘဲလမျီုရ။
ညးဗြဴ ဒးလွဟ်ဇၞော် ကလိဂွံလဝ်ဝပ်ဂှ်ဝွံ အခိၚ်လၟုဟ် တိုန်စိုပ်လွဳဒၟံၚ် ပ္ဍဲရုၚ်ဂဥုဲဍုၚ်ဒုၚ်သယိတ် ပ္ဍဲဗဒမ်ကာတၟေၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
လအာတုပ်သာ်ဂှ်ကီု တုဲကၠုၚ်ပ္ဍဲဂိတုဒဳဇြေမ်ဗာ ၂၁ တေံဂှ်လေဝ် သၞေဟ်ကၚ်စၟဳတ်မုပ္ပလၚ် ကံၚ်ဇြဳပၞာန် နွံပွိုၚ်ဍုၚ်ကျာ်ထဝ် ဒးဒုၚ်ဗ္တိုက်တုဲဂှ် ဟိုတ်နူဒပ်ကံၚ်ဇြဳပၞာန် ပန်ပှော်ကဵုလွဟ်ဇၞော်ကြာန်န်တုဲ ညးဒေသပိတၠ နူကွာန်(တဂေးချောင်းဖျား) ဂှ် ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−KHRG