ထဝါဲ၊ ဒဳဇြေမ်ဗာ ၂၉
ဂၠံၚ်ပယျဵု မေတ္တာ−ထဳခဳ ပွိုၚ်ဍုၚ်ထဝါဲ ရးတၞၚ်သဳ ဒှ်ဂၠံၚ်သွံရာန်ဗၞိက်ပယျဵု သေံ−ဗၟာဂှ် လ္ပာ်ဒပ်ပၞာန်ကဝ်တူလေဝ် KTLA ပပ္တံနူဂိတုဒဳဇြေမ်ဗာ ၂၇ တုဲ ကၟာတ်လဒဵုကၠုၚ်အခေါၚ်အာကၠုၚ်ဂၠံၚ်ဏံ ဟွံတီကဵုတ္ၚဲကလေၚ်ပံက်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂၠံၚ်ဇၞော် နူဍုၚ်မေတ္တာ စဵုပယျဵုထဳခဳဂှ် ယာန်ဇၞော်၊ ယာန်ဍောတ် လ္ပတတ်ကၠောံအာကၠုၚ်ဂှ် ဌာန်ဂအုပ်ဆာခဳလာ ၝောံဒပ်သာကသဝ် ဒပ်ပၞာန်ကဝ်တူလေဝ် KTLA လလောၚ်ပ္တိတ်ကၠုၚ်ရ။
ဟွံဒ္ဂေတ်ဗက်တၚ်လလောၚ်တြး ယဝ်ရတတ်ကၠောံအာကၠုၚ်တုဲ ဇီုကပိုက်ဒးမွဲမွဲသာ်နွံမ္ဂး ကေတ်အာတာလျိုၚ်ဟွံသေၚ်ပုဟ်ဂှ် ဒပ်ပၞာန်ကဝ်တူလေဝ် KTLA ကဵုလဝ်သတိရ။
ဆ္ဂး စပ်ကဵုပရေၚ်ကၟာတ်လဒဵုအခေါၚ်အာကၠုၚ် ပ္ဍဲဂၠံၚ်ပယျဵုမေတ္တာ−ထဳခဳဂှ်တုဲ ဒပ်ပၞာန်ကဝ်တူလေဝ် KTLA လလောၚ်ပ္တိတ်လဝ် မမိက်ကဵုမွဲမွဲဂှ် ဟွံမွဲရ။
ဒၟါနူကၟာတ်လဒဵုကၠုၚ် ဂၠံၚ်ပယျဵုမေတ္တာ−ထဳခဳဂှ်တုဲ ပရေၚ်ကပေါတ်ဗၞိက်ဇွောဝ်စှ်ေတံကီု၊ ကောန်ကလောန်ဆုဲပြံၚ် တိတ်လ္ပာ်ဍုၚ်သေံတံကီုဂှ်လေဝ် ဒးဂဗဒၟံၚ်အခက်အခုဲဂှ် ညးဒေသတံ ဟီုရ။
ပရေၚ်ကၟာတ်လဒဵုဂၠံၚ်ဏံဂှ်ဝွံ ဟိုတ်နူအကာဲအရာပရေၚ်ပၞာန် မက္တဵုဒှ်ဒၟံၚ် အကြာဒပ်ပၞာန်ဗၠးၜးကောန်ဂကူကရေၚ် KNLA ဒပ်မဟာ ၄ ဂှ်ကဵု ဒပ် KTLA တံဂှ်တုဲလေဝ် ဒှ်မာန်ဂှ် သ္ၚဳဂၠိပ်ဒၟံၚ်တံလေဝ် နွံဒၟံၚ်ရ။
ဒပ် KNLA ကေုာံ ဒပ် KTLA တံဝွံ အပ္ဍဲဂိတုဒဳဇြေမ်ဗာ သတ္တာဟတတိယ ပွဳပွူဗ္ဒါဲဒဵုဗာမေအ် (ဗားမဲ့) သ္ကုတ်ဂၠံၚ်ထဝါဲ−ထဳခဳဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဟွံအောန်နူကဵု ၄ ဝါရ။
အပ္ဍဲပေါဲဗ္တိုက်ဂှ် လ္ပာ် KTLA ကလိဂွံလဝ်ဝပ် ၅ တၠတုဲ ၁၄ တၠဂှ်လေဝ် လ္ပာ် KNLA ရပ်ဒက်ဏာလဝ်ဂှ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်အပ္ဍဲဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ