မတ်မလီု၊ ဒဳဇြေမ်ဗာ ၂၉
အခေါၚ်မန်ဂှ် အာနဲကဲတက်ကျာဟွံဂွံ၊ ဒးဗ္တိုက်ကေတ်ရောၚ်တုဲ တၠအဝဵုပၞာန်ဏံ ဗ္တိုက်သရိုဟ်မာန်မှ အခေါၚ်မန် ဍုၚ်မန်ဂွံဏောၚ် သာ်ဝွံ က္ဍိုပ်သ္ကိုပ် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဟီုရ။
က္ဍိုပ်သ္ကိုပ် NMSP AD နာဲဇဲယ ဖ္တိုက်ဖ္အောဝ်ကၠုၚ် ပ္ဍဲကဵုလိက်သဝဏ် မပလံၚ်ဗစိုပ်လဝ် သွက်တ္ၚဲသၟတ်မန် မရနုက်ကဵု ၁၃ ဝါ ပ္ဍဲဂိတုဒဳဇြေမ်ဗာ ၂၈ ဏံဂှ်ရ။
ပ္ဍဲအကာဲအရာ ပရေၚ်ဍုၚ်ကွာန်တ္ၚဲဏံ နကဵုဇြဟတ်သၟတ် ဂကူညးကုညး သီဂွံကၠုၚ်လဝ် တိဍာ်၊ သၠဲပ္တိတ်အဝဵုသြဇာ ဂကူညးကုညးမာန်ကၠုၚ်၊ ဌာန်ဂအုပ်ပၞာန်ရး ၂ ဒးစှ်ေအာသၟဝ်တဲ ဒပ်ပၠန်ဂတးတံတုဲရဂှ် သၟတ်မန်ပိုယ်တအ်လေဝ် ဂွံဆဵုညာတ်ဒၟံၚ် ဂတမတ်ရောၚ် သ္ဂးရ။
ပ္ဍဲရးကချေၚ်၊ ချေၚ်၊ ရးရခေၚ် ကေုာံ ရးသေံသ္ကုတ်သၟဝ်ကျာတေံ ဂကောံပၠန်ဂတးရပ်လွဟ်တံ သီဂွံကၠုၚ်လဝ် ဍုၚ်ဂမၠိုၚ်တုဲ သၟတ်မန်တံလေဝ် သ္ဒးစွံအာရီု လ္တူပရေၚ်ပၠန်ဂတးထေက်ယျ ဒဒှ်ရညာတ်ကေတ်ဂှ် ထ္မံက်ထ္ၜးလဝ် ပ္ဍဲလိက်သဝဏ်ဂှ်ရ။
ရံၚ်ကဵုကောန်ဂကူမန်ပိုယ်မ္ဂး သတီုသၟတ်မန်ၜိုန်ဂၠိုၚ်ဒၟံၚ်ကီုလေဝ် သ္ဂောံလုပ်ကေတ်တာလျိုၚ် စဵုဒၞါဂီုကၠီုဂကူဂှ် အောန်တဴဗွဲမလောန်ရောၚ် သ္ဂောံဆဵုကေတ်တုဲ ရမျာၚ်ကရေဲ တ္ၚဲသၟတ်မန်သၞာံဏံ “သၟတ်မန် ဇြဟတ်မန်” ဂှ်ဝွံ ကိတ်ညဳကဵု အခိၚ်အခါကာလလၟုဟ်ရောၚ် နာဲဇဲယ သ္ဂးရ။
ဟိုတ်ဂှ်ရ အနာဂတ်မန် ကံကုသိုလ်မန်ဂှ် နွံပ္ဍဲသ္ကေံတဲသၟတ်မန်တံတုဲ ပ္ဍဲပ္ၚံက်ပရေၚ်ဍုၚ်ကွာန်ဏံ သၟတ်မန်တံသီုဖအိုတ် ညံၚ်သ္ဂောံကောံကလောံ ဗဒှ်ဇြဟတ် ပ္ဍဲအရာပၠန်ဂတးသွက်ဗၠးၜးဂကူဂှ် ကိစ္စဇၞော်အိုတ်ရောၚ် သာ်ဝွံ ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−NMSP