အကြာပေါဲဗ္တိုက်သီဍုၚ်ဂမၠိုၚ်ဂှ် တၚ်စၟဳပရေၚ်ပၞာန်တွဵုရးဍုၚ်မန် သွက်သၞာံဂတဏံ 

မတ်မလီု၊ ဒဳဇြေမ်ဗာ ၂၉

အခိၚ်ကာလသၞာံဏံ ကြပ်အိုတ်ကၠုၚ်ဂှ် ဒပ်ကံၚ်ဇြဳပၞာန် မသရိုဟ်စှ်ေဆုတ်ယုတ်ကၠုၚ်ဂှ်လေဝ် အကာဲအရာပရေံစှ်ေကၠုၚ်ဒၟံၚ်တုဲ သၞာံတၟိဏံ အပ္ဍဲတွဵုရးဍုၚ်မန် ဂွံညာတ်ကေတ်အပြံၚ်အလှာဲပရေၚ်ပၞာန်တံမာန်ဂှ် ညးဂမၠိုၚ် မၚ်စၟဳဒၟံၚ်အိုတ်ရ။

အပ္ဍဲဒေသကောန်ဍုၚ်အရၚ်တံ အခိၚ်ပေါဲဗ္တိုက်သီဍုၚ်မသ္ကာတ်မြဟ်ကၠုၚ်ဂှ် ပ္ဍဲတွဵုရးဍုၚ်မန် တိဍာ်ကံၚ်ဇြဳပၞာန်အုပ်ဓလီုဇြဟတ်ခိုဟ်ဒၟံၚ်ဂှ်တှ်ေ သၞာံဂတဏံ သၠုၚ်ပ္တိုန်အာအသိၚ်ပေါဲဗ္တိုက်ဏောၚ်ဂှ် ဂကောံပၠန်ဂတးအပ္ဍဲဒေသတံ ဟီုရ။

ညးဒုၚ်တာလျိုၚ်ခရိုၚ်သဓီု ဒပ်ပၞာန်စဵုဒၞါညးဍုၚ်ကွာန် ကိုဝ်အေမေန်ထောန်ဂှ်တှ်ေ ဂွံသၠုၚ်ပ္တိုန်အသိၚ်ပရေၚ်ပၞာန်နွံဒၟံၚ်တုဲ နကဵုညးဍုၚ်ကွာန်တံ ဟွံမွဲပၟိက်မွဲသာ် လ္ပအာတရဴ၊ လ္ပမံၚ်ကရပ်ကံၚ်ဇြဳပၞာန်တံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“သၞာံဂတဏံ ပိုယ်တံဂွံသၠုၚ်ပ္တိုန်အသိၚ်ပရေၚ်ပၞာန် နူဏံဂှ်နွံ။ နကဵုညးဍုၚ်ကွာန်ဂမၠိုၚ် ဒှ်မာန်တှ်ေ ဟိုတ်ဟွံမွဲမွဲသာ် လ္ပအာကၠုၚ်တရဴ၊ ပၟိက်ဟွံမွဲတှ်ေ လ္ပအာတရဴညိ။ တုဲပၠန် လ္ပဗက်လက္ကရဴဍုတ် ရေၚ်ယာန်ကွဳစက်ကံၚ်ဇြဳပၞာန်တံ လ္ပမံၚ်ကရပ်ဒပ်ကံၚ်ဇြဳပၞာန် လ္ပမံၚ်ကရပ်သၞာဲဒဴတံဂှ် ပိုယ်တံ မိက်ဂွံဆဝ်မ္ၚုဟ်ဏာ ညးဍုၚ်ကွာန်တံရ” သာ်ဝွံ သ္ဂးရ။

ပ္ဍဲတွဵုရးဍုၚ်မန် ပွိုၚ်ဍုၚ် နွံ ၁၀ ဂှ် ပွိုၚ်ဍုၚ်သဓီု၊ ပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်ကျာ်မြဟ်၊ ပွိုၚ်ဍုၚ်မုဟ်ဍုၚ် သ္ကုတ်သၠုၚ်ကျာ၊ ပွိုၚ်ဍုၚ်ဇြပ်ဗု ကေုာံ ပွိုၚ်ဍုၚ်ရေဝ်တံဂှ်ဝွံ ဒှ်ဒေသဂကောံရပ်လွဟ်ကောန်ဍုၚ်အရၚ်တံကဵု ဂကောံပၠန်ဂတးအပ္ဍဲဒေသတံ ချဳဒရာၚ်ဇြဟတ်ခိုဟ်မွဲရ။

ယဝ်ရလုပ်စိုပ်ဗ္တိုက်ကၠုၚ် ဗ္ဒိုပ်ဗၠာဲသၟိၚ်တိဍာ်ကံၚ်ဇြဳပၞာန်တံကဵု သၞေဟ်ကၚ်စၟဳတ် အပ္ဍဲဒေသတံဏံ၊ ယဝ်ရကြတ်ဗ္တိုက်ကၠုၚ်၊ ထ္ပက်ကၠုၚ်ကရောၚ်ပၞာန်ဂှ်မ္ဂး ပေါဲဗ္တိုက်ၜါလ္ပာ်တံ က္တဵုဒှ်ဒၟံၚ်နွံရ။

ဆ္ဂး အပ္ဍဲကာလသီအဝဵုကြပ်ပွိုၚ်ပန်သၞာံဏံ ညံၚ်ရဴဒေသကောန်ဍုင်အရင်တၞဟ်ဟ် ဗွဲတၟေၚ်ညံၚ်ရဴရးရခေၚ် ဂွံထိၚ်ဒက်သီကၠေံ ဌာန်ဂအုပ်ပၞာန် ဗ္ဒိုပ်ဒပ်ကံၚ်ဇြဳပၞာန်တံမာန် ဒဵုကဵုကဆံၚ်ထ္ပက်ပၞာန်မာန်ဂှ် ဟွံစိုပ်ကၠုၚ်ဏီရ။ 

နာဲဂံၚ်သကာ ညးမၞုံအခေါၚ်ဟီုဂး ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဂှ်တှ်ေ ရံၚ်အာလၟေၚ်ဒဒှ်ရခေၚ်တုဲ ၜိုတ်ဇြဟတ်နွံ သၠုၚ်ပ္တိုန်အာအသိၚ်ပၠန်ဂတး လုပ်အာပေါဲဗ္တိုက်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပိုယ်တံဂှ်တှ်ေ ၜိုတ်ဇြဟတ်နွံ သၠုၚ်ပ္တိုန်အသိၚ်ပၠန်ဂတးတုဲ ဂွံလုပ်အာပေါဲဗ္တိုက်ဂှ် ဖျေံလဝ်သ္ဂုတ်သွာတ်တုဲတုဲရ။ ထံက်ရံၚ်ကဵုလၟေၚ်ဒဒှ်ရးရခေၚ်ဂှ်မ္ဂး ပ္ဍဲပိုယ်တံဂှ်လေဝ် စိုတ်ဓာတ်ခိုၚ်ဗိုန်ကၠုၚ် ဒှ်ကၠုၚ်ဇြဟတ် ကောံကလောံကၠုၚ်ဂှ် ညာတ်ကေတ်ရ” သာ်ဝွံ သ္ဂးရ။

ကံၚ်ဇြဳပၞာန် မ္ဒးကဵုဒၟံၚ်သတိ အပ္ဍဲဒပ်မ္ၚးဒပ် ညံၚ်ဂွံညဳသာကောံကလောံဂှ် အပ္ဍဲသၞာံဏံ အပ္ဍဲရးသေံသ္ကုတ်သၟဝ်ကျာဂှ် ဒးဗလးလဝ်ဌာန်ဂအုပ်ပၞာန်ရးအဂၞဲ၊ အပ္ဍဲရးရခေၚ်ဂှ် ဒးဗလးလဝ် ဌာန်ဂအုပ်ပၞာန်ရးပလိုတ်တံဂှ်ရ။

အတိုၚ်တၚ်နၚ် ဂကောံသုတေသနဗၠးၜးတံှဂ်မ္ဂး အပ္ဍဲကာလသီအဝဵုဏံ ပ္ဍဲကဵုတိဍာ်ကံၚ်ဇြဳပၞာန်အုပ်ဓလီုလဝ်ဂမၠိုၚ် ၜိုတ် ၉၀ ဍုၚ်ဂှ် ဂကောံရပ်လွဟ်ကောန်ဍုၚ်အရၚ်တံကဵု ဂကောံပၠန်ဂတးတံ ထိၚ်ဒက်ဂွံလဝ်ရ။

ဣဏံဝွံ ဒှ်သွဟ်ဂွံအံၚ်ဇၞးကေတ် ပ္ဍဲပရေၚ်ပၞာန် ဒေသကောန်ဍုၚ်အရၚ် မပ္တံကဵုဒေသကချေၚ်၊ ချေၚ်၊ ရးသေံသ္ကုတ်သၟဝ်ကျာ ကေုာံ ရခေၚ်တံ ဂၠိုၚ်အိုတ်ဂှ်တုဲ အပ္ဍဲသၞာံဏံမွဲသၞာံဓဝ်ဂှ် ကံၚ်ဇြဳပၞာန် ဒးဆောံလေၚ်လဝ်ဍုၚ် စဵုကဵု ၆၀ ရ။

ပ္ဍဲတွဵုရးဍုၚ်မန်ဂှ်တှ်ေ ပေါဲဗ္တိုက်သီဗ္ဒိုပ် မက္တဵုဒှ်လဝ် အပ္ဍဲဒေသၜဳဂြာၚ် အပ္ဍဲဂိတုမာတ် သၞာံဏံဂှ် သ္ကာတ်မြဟ်လဝ်ကီုလေဝ် ဟိုတ်နူထိၚ်ဒက်ဂွံလဝ်တိဍာ်ဟွံမွဲဂှ်တုဲ အကာဲအရာပရေၚ်ပၞာန် တောတက်ပြံၚ်လှာဲကၠုၚ် ဟွံမွဲရ။

နာဲနဂါ ညးမၞံဒအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် နကဵုဒပ်ပံၚ်ကောံပၠန်ဂတးတံ သွက်ဂွံပလှ်ဖျေံကံၚ်ဇြဳပၞာန် ဗွဲမပြဟ်မာန်၊ ဂွံအခေါၚ်တှ်ေ ဂွံဗ္တိုက်အာ နွံကီုလေဝ် ဂွံသီဗ္ဒိုပ် ညံၚ်ရဴတွဵုရးတၞဟ်ဟ်တံမာန်ဂှ် တၚ်အခက်အခုဲတၟာဂလိုၚ် နွံမာန်ရောၚ် ဟီုရ။

“ ဂွံပလှ်ဖျေံကံၚ်ဇြဳပၞာန် ဗွဲမပြဟ်မာန်ဂှ် တမ်ဒပ်ဍေံတံ ကရောၚ်ပၞာန်ဍေံတံဂှ် အကာဲအရာကဵုတှ်ေ ဂွံဗ္တိုက်အာဂှ်နွံ။ နွံပၟိက်ကဵု ဂွံထ္မံက်ပရေၚ်ပၞာန်ပြဟ်ဟ်ဂှ်ရဏောၚ်။ ညံၚ်ရဴဒေသတၞဟ်ဟ် ညံၚ်ရဴတွဵုရးတၞဟ်ဟ်တဂှ် ဂွံသီဍုၚ်မာန်ဂှ် ပ္ဍဲတွဵုရးဍုၚ်မန်ဂှ် အခက်အခုဲနွံဒၟံၚ်တၟာဂလိုၚ်ဏောၚ်။ ဒၟါနူအကာဲအရာနာနာတုဲ ပိုယ်တံတတ်ၜက်ဟွံမာန်ဏီ။ ဂကောံထံက်ပၚ်ကဵုပိုယ်တံဂှ် ဟွံမွဲဏီပုဟ်။ ညးဍုၚ်ကွာန်တံ ထံက်ပၚ်ကဵုဒၟံၚ်ဂှ်တှ်ေ ဂွံထ္မံက်ပေါဲဗ္တိုက်ဇၞော်ဇၞော်တံဂှ် ဟွံဍိုက်ပေၚ်ဏီပုဟ်” သာ်ဝွံ သ္ဂးရ။

ဟိုတ်နူပရေၚ်ပၞာန်သီအဝဵုတုဲ ပ္ဍဲတွဵုရးဍုၚ်မန်ဏံ ဂကောံဒပ်ပၠန်ဂတးရပ်လွဟ် မမံက်ကၠုၚ်ဟွံအောန်နူကဵု ၃၀ ဂှ် ဒပ်ရပ်လွဟ်မန်တံဂှ်တှ်ေ အခိၚ်ညးကဵုညး နဗီုပြၚ်ညးကုညးဂှ် ဒက်ပ္တန်ကၠုၚ်လဝ်အိုတ်ရ။

ပ္ဍဲကဵုဏံ ဒပ်စဵုဒၞါဍုၚ်မန် MSDF ၊ ဒပ်ပၠန်ဂတးဍုၚ်မန် MSRF ကေုာံ ဒပ်ဗၠးၜးဍုၚ်မန် MLA တံဝွံ အခိၚ်စသီအဝဵုပြဟ်ဟ်တေံကဵု သီအဝဵုတုဲ ကာလဗွဲကြဴဏံဂှ် ဒက်ပ္တန်လဝ်ညးသ္ကအ်ရ။

ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD မပါ်တိတ်ကၠုၚ်နူဗော်မိဂှ်တှ်ေ သၞာံဏံ ပ္ဍဲဂိတုဖေဖဝ်ဝါရဳဂှ်မှ ဂွံဗ္တိုက်ဒပ်ကံၚ်ဇြဳပၞာန်ဂှ် ပါလုပ်ကၠုၚ်လဝ် ပ္ဍဲပၠန်ဂတးရပ်လွဟ်ရ။

ညးလ္ၚတ်အကာဲအရာပရေၚ်ပၞာန်၊ ပရေၚ်ဍုၚ်ကွာန် အပ္ဍဲဒေသမွဲတၠဂှ်တှ်ေ အပ္ဍဲသၞာံဏံ ပၠန်ဂတးဍုၚ်မန်ဂှ်ဝွံ ပြံၚ်လှာဲအာတၟေၚ်ၚ်တၟဟ်ဟ်ဂှ် ဟွံဂွံဆဵုကေတ်တုဲ မုသွဟ်မှလေဝ် ဟွံတိတ်လဝ်ပုဟ်ဂှ် သ္ၚဳဂၠိပ်လဝ်ရ။

အခိၚ်လၟုဟ် ဒပ်ပၠန်ဂတးရပ်လွဟ်မန် ၄ ဂကောံဂှ်ဝွံ လောန်ၜက်တိဍာ်ချဳဒရာၚ်ညးတံတုဲ သွက်ဂွံပံၚ်တောဲလုပ်အာပေါဲဗ္တိုက် မွဲကရောံမွဲစွံ သၟဝ်မွဲအသံဂှ် ဂွံလဝ်တၚ်တုပ်စိုတ်ရ။

ဒပ်ပၠန်ဂတးမန်ဖအိုတ်ပါလုပ်တုဲ ဒပ်မန်မွဲ ညံၚ်ဂွံမံက်ကၠုၚ်ဂှ် ကဆံၚ်ကၠာအိုတ်ဂှ်တှ်ေ သွက်ဂွံပံၚ်တောဲထ္မံက်အာပရေၚ်ပၞာန်တံဂှ် အပ္ဍဲဂိတုဒဳဇြေမ်ဗာ သတ္တာဟတတိယဂှ် ဂကောံမဆေၚ်စပ်ဂမၠိုၚ် တုပ်လဝ်စိုတ်ရ။

နာဲမန်သာၚ် ညးမၞုံအခေါၚ်ဟီုဂး ကံၚ်ဇြဳဖေဝ်ဒရာဍုၚ်မန် MSFC မပါလုပ်ဒၟံၚ် ပ္ဍဲပၠန်ဂတးမန် သီုပရေၚ်ဍုၚ်ကွာန် သီုပရေၚ်ပၞာန်ဂှ်တှ်ေ သၞာံဂတဏံ ဂွံထ္မံက်အာပေါဲဗ္တိုက် ဗွဲမစှ်ေကဵုသၞောတ်ဂှ် စဳဇန်လဝ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“လ္ပာ်မန်ပိုယ်ဂှ်တှ်ေ ဒပ်ပၠန်ဂတး ဂကူမန်တံအာက္ဍိုပ်ဂှ် နွံ ၄ ဒပ်။ လၟုဟ်တှ်ေ ပိုယ်တံ စပ္ကောံဂွံမံၚ်ယျ။ ဟိုတ်ဂှ်ရ သၞာံ ၂၀၂၅ ဏံ နကဵုသၞောတ်စှ်ေစှ်ေ ထ္မံက်အာပေါဲဗ္တိုက်တံမာန်ဏောၚ်ဂှ် ပိုယ်တံ စဳဇန်လဝ်နွံ” သာ်ဝွံ သ္ဂးရ။

မ္ၚးနူကဵုဒပ်ရပ်လွဟ်မန် ၄ ဒပ် မပံၚ်တောဲလဝ် သွက်ဂွံချဳဒရာၚ်ပရေၚ်ပၞာန်ဂှ် ပ္ဍဲကဵုတွဵုရးဍုၚ်မန် ကေုာံ ဒေသမဆက်စပ်တံဂှ် ဂွံပံၚ်တောဲကၠောန်အာ ပရေၚ်ပၞာန်မစှ်ေကဵုဗျူဟာတံ နွံဂှ် ညးတာလျိုၚ်ဂကောံဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ညးခါတ်အကာဲပရေၚ်ပၞာန်၊ ပရေၚ်ဍုၚ်ကွာန်မွဲတၠဂှ်တှ်ေ စပ်ကဵုဂကောံရပ်လွဟ်မန်တံ ပံၚ်တောဲကၠုၚ်ညးသ္ကအ်ဂှ်တုဲ ကြက်ရှ်သာပၠန်ဂတးဂှ်ဝွံ ဆၜိုတ်ဒက်မဟာမိတ်သၟးဟွံသေၚ် ဗ္တိုက်ဍာံမ္ဂး သွဟ်ပရေၚ်ပၞာန်တံ ကဵုကၠုၚ်သ္ဂုတ်သွာတ်မာန်ဂှ် သ္ပလဝ်တၚ်စၟတ်ရ။

ပရိုၚ်−သြၚ်လောန်တိုၚ်(မ်)

ဗီု−MLA