ကျာ်ထဝ်၊ ဒဳဇြေမ်ဗာ ၃၁
ပ္ဍဲတွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲကဵုကွာန်(အၚ်္ဂဘို) ကောန်ဒပ်ကံၚ်ဇြဳပၞာန် မမၚ်ဒၟံၚ်တိုၚ်တာဝါတံ ဒှ်ပန်ပှော်ညးသ္ကအ်တုဲ ပိတၠ ချိုတ်အာလဝ်ရောၚ် ညးမစုက်လုက်ကဵု ဒပ်ကံၚ်ဇြဳပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂိတုဒဳဇြေမ်ဗာ ၂၉ အခိၚ်ဇိုၚ်သဝ်တ္ၚဲ ၜိုတ် ၆ နာဍဳဂှ် ကောန်ဒပ်ကံၚ်ဇြဳပၞာန် မၚ်ဒၟံၚ်တိုၚ်တာဝါတြဴတၠ အရေဝ်ဂၠိုၚ်ဒှ်သၞတုဲ ဒှ်လဝ်ပန်ပှော်ညးသ္ကအ်ရ။
“ဍေံတံကဵုဍေံတံရ ဒှ်ပန်လဝ်။ စဒှ်ဗီုလဵုဂှ် ဟွံတီပုဟ်။ ကောန်ဒပ်မွဲတၠ ပန်တုဲဂြိပ်အာဂှ် နူကဵုဒပ်ပၞာန် ဗက်ရပ်ဒၟံၚ်ယျ။ ဒဵုလၟုဟ် ဟွံဆဵုဏီပုဟ်” သာ်ဝွံ ညးမစုက်လုက်ကဵုဒပ်ကံၚ်ဇြဳပၞာန်မွဲတၠ ဟီုရ။
အပ္ဍဲပရေၚ်ပန်ပှော်ဏံဂှ် ကောန်ဒပ်ကံၚ်ဇြဳပၞာန်ပိတၠ ချိုတ်တုဲ ၜါတၠ ဇီုကပိုက်ကလိဂွံလဝ်ဝပ်တုဲ ကောန်ဒပ်ကံၚ်ဇြဳပၞာန်မွဲတၠ မစလဝ်ပရေၚ်ပန်ပှော်ဂှ်တှ်ေ ဂြိပ်တိတ်အာလဝ် သီုကဵုလွဟ်လက်နက်မကမ်ဂမၠိုၚ်ရ။
ကြဴနူဒှ်ပန်ပှော်တုဲ ဇိုၚ်သဝ်တ္ၚဲ ၜိုတ် ၁၀ နာဍဳဂှ် မၞိဟ်တြုံမရပ်လဝ်လွဟ်မွဲတၠဂှ်ဝွံ ကြဴနူလုပ်စိုပ်ဍိုက်ဗ္တိုက် သ္ၚိပ္ဍဲကွာန်ကျိုက္ကသာ ပွိုၚ်ဍုၚ်ကျာ်ထဝ်ဂှ်တုဲဂှ် ကေတ်ဏာလဝ်သြန်ညိညတုဲ မၞိဟ်တံဂှ်တှ်ေ မုဟွံပဏာလဝ်ပုဟ်ဂှ် ညးဒေသတံ ဟီုရ။
ညးဒေသတံဂှ်တှ်ေ မၞိဟ်တြုံရပ်ကၠုၚ်လဝ်လွဟ်ဂှ်ဝွံ ကောန်ဒပ်ကံၚ်ဇြဳပၞာန် ဒှ်မာန်ရောၚ် သ္ၚဳဂၠိပ်ဟီုဂးဒၟံၚ်တံ နွံဒၟံၚ်ရ။
တ္ၚဲဏံ ပ္ဍဲဂိတုဒဳဇြေမ်ဗာ ၃၀ အခိၚ်နူဂယး ၜိုတ် ၇ နာဍဳဂှ် နူဒပ်ကံၚ်ဇြဳပၞာန်တံ နကဵုကွဳစက် ၅ ဖ္ဍိုက်ဂှ် ဗက်ဂၠိုက်ဂၠါဲဒၟံၚ် ကောန်ဒပ်ကံၚ်ဇြဳပၞာန် မဂြိပ်အာလဝ် လ္ပာ်ဗ္ဒါဲကွာန်ကျိုက္ကသာတံဂှ်ရ။
မၞိဟ်တြုံကောန်ကွာန်ကျိုက္ကသာဂမၠိုၚ် နူကဵုဒပ်ကံၚ်ဇြဳပၞာန် မဗက်ဂၠိုက်ဂၠါဲဒၟံၚ် ပွဳပွူဗ္ဒါဲကွာန်တံဂှ်ဝွံ ဟိုတ်နူဖေက်ဒးဒုၚ်ရပ်ပပဝ်တာတုဲ ဒးပါဲဒလေတ်ဒၟံၚ်အိုတ်ရောၚ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု− Social Media