သဓီု၊ ဂျာန္နဝါရဳ ၄
အပ္ဍဲကွာန် မၞုံပ္ဍဲတိဍာ်အုပ်ဓုပ်ခရိုၚ်သဓီု ဒပ်မဟာ ၁ ဗော်သွးကောန်ဂကူကရေၚ် KNU ဂှ် အပ္ဍဲဂိတုဒဳဇြေမ်ဗာ ပွိုၚ်မွဲဂိတုတုဲကၠုၚ်တေံ ဟိုတ်နူဒပ်ကံၚ်ဇြဳပၞာန် ပန်ပှော်ကၠုၚ်လွဟ်ဇၞော်ဂှ်တုဲ ကောန်အရာပ်ပန်တၠ ချိုတ်အာလဝ်ရောၚ် ဂွံတီကေတ် ဇရေၚ်ခရိုၚ်သဓီု KNU ရ။
အပ္ဍဲဂိတုဒဳဇြေမ်ဗာဂှ် နူကဵုဒပ်ကံၚ်ဇြဳပၞာန် ပန်ကၠုၚ်လွဟ်ဇၞော် ပ္ဍဲကဵုပွိုၚ်ဍုၚ်ဘာအၚ်၊ ပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်သဓီု မၞုံပ္ဍဲခရိုၚ်သဓီု KNU တံဂှ် ဟွံအောန်နူကဵု ၄၀ ဝါရ။
ဟိုတ်နူဒပ်ကံၚ်ဇြဳပၞာန် ပန်ပှော်ကၠုၚ်လွဟ်ဇၞော်ဂှ်တုဲ ပ္ဍဲကဵုပွိုၚ်ဍုၚ်ဘာအၚ် ကဵု ပွိုၚ်ဍုၚ်ကျာ်ထဝ်တံဂှ် မွဲမွဲပွိုၚ်ဍုၚ် ကောန်အရာပ်ၜါတၠ ချိုတ်အာလဝ်တုဲ ညးဇီုကပိုက်ကလိဂွံဝပ် မသုန်တၠ နွံလဝ်ရ။
တမ်ဒပ်ကံၚ်ဇြဳပၞာန် ဒ္စါံဒပ် ဖျေံသ္ဇိုၚ်ပွိုၚ်ဍုၚ်သဓီု၊ ပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်ကျာ်ထဝ်တံ ကလိလောန်လဝ် ပရေၚ်ပန်ပှော်လွဟ်ဇၞော်ဂှ်တုဲ ကၠောန်သ္ပလဝ်ပရေၚ်ဗ္တိုက်ပၞာန်ကျာပိဝါရ။
ပဒိုဝ်သဝ်အေနာၚ် ညးအုပ်ကာခရိုၚ်သဓီု KNU ဂှ်တှ်ေ ကံၚ်ဇြဳပၞာန်ပန်ကၠုၚ်လွဟ်ဇၞော်ဂှ်ဝွံ ဒးပ္တောံၜတ်ကဵုဂိတုနဝ်ဝေမ်ဗာတုဲကၠုၚ်တေံဂှ်မ္ဂး လၟိဟ်လ္တုန်ဂၠိုၚ်ကၠုၚ်တုဲ ဗွဲကြဴဏံ ဒးဂွိၚ်ဒၟံၚ် သီုကဵုဘဲအန္တရာယ်ပၞာန်ကျာဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုဒဳဇြေမ်ဗာ သတ္တာဟလက္ကရဴအိုတ်ဂှ်လေဝ် ဟိုတ်နူဒပ်ကံၚ်ဇြဳပၞာန် ပန်ပှော်ဗ္တိုက်ကၠုၚ်ပၞာန်ကျာ ပ္ဍဲပွိုၚ်ဍုၚ်ဘာအၚ် ကေုာံ ပွိုၚ်ဍုၚ်ၜဳကလေၚ် ခရိုၚ်သဓီု KNU တံဂှ်တုဲ ညးဒေသ နူကဵုကွာန် ၁၅ ကွာန် ဟွံအောန်နူကဵု ၄၀၀၀ ထောံလသာဌာန်ဒၟံၚ် ဒးဂြိပ်ဒဴပါဲဒလေတ်ဒၟံၚ်ရ။
ပ္ဍဲတိဍာ်ခရိုၚ်သဓီု KNU ဂှ် အပ္ဍဲဂိတုဒဳဇြေမ်ဗာဏံ ပေါဲဗ္တိုက်က္တဵုဒှ်လဝ် ၂၇ ဝါတုဲ လ္ပာ်ကံၚ်ဇြဳပၞာန် ဟွံအောန်နူကဵု ၃၀ တၠ ဇီုကပိုက်ချိုတ်လဝ်တုဲ လ္ပာ်ဒပ်ပၠန်ဂတးတံမွဲတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်နၚ်ခရိုၚ်သဓီု KNU ရ။
ပရိုၚ်−သြၚ်လောန်တိုၚ်(မ်)
ဗီု−KNU