မတ်မလီု၊ ဂျာန္နဝါရဳ ၃
ကလိဂွံအခေါၚ် နူကဵုဌာနဝန်ဇၞော်ဟွံမွဲမွဲသာ် ပွမကၠောန်ပ္တိုန် VPN ၊ ရပ်စပ်ကွတ်နဲပညာအဳလက်ထရဝ်နေတ်တုဲ သွက်ညးမကလိလောန် အမှုရာဇဝတ်လ္တူလပှ်ကျာတံဂှ် ပ္ဍဲဂိတုဂျာန္နဝါရဳ ၁ ဂှ် ကံၚ်ဇြဳပၞာန် သ္ပဒတန်စၞောန်ပျးလဝ် သၞောဝ်ဂီုကၠီုသာ်ဗာရ။
အတိုၚ်သၞောဝ်ဂှ်မ္ဂး သီုကဵုသၞောတ်ဗ္ၜတ်ကၠုၚ် ပရေၚ်ရပ်စပ် VPN တံကီု သီုကဵုရပ်စပ်ကၠုၚ်သာ်ဗာ ဟွံဗဗွဲကဵုဒၞါဲတံကီု၊ ကၠတ်သြန်လ္တူလပှ်ကျာ၊ ကၠောန်ပတိုန်သၞောတ်ဝိုၚ်ဝေၚ်လ္တူလပှ်ကျာတံဂှ်မ္ဂး ဖျေံစၟတ်အာ ဒဏ်ထံၚ် ကေုာံ ဒဏ်သြန်ဏောၚ်ဂှ် သ္ဂးရ။
ညးချဳဒရာၚ်အခေါၚ်အရာမၞိဟ်တံဂှ်တှ်ေ ၜိုန်ရစၞောန်ပျးလဝ်သၞောဝ်သာ်ဏံကီုလေဝ် စပ်ကဵုအခေါၚ်ဟီုဂးထ္မံက်ပ္တိတ် ဗွဲမဗၠးၜး ကေုာံ အခေါၚ်ဆက်စၠောံဗွဲမဗၠးၜးတံမပါလုပ် ဟိုတ်နူကံၚ်ဇြဳပၞာန် မိက်ဂွံထံၚ်ပရိုၚ် လ္တူညးဍုၚ်ကွာန်ဍုၚ်ဗၟာတံဂှ်ရောၚ် ထံက်ထ္ၜးလဝ်ရ။
တၚ်ရန်တၟံကံၚ်ဇြဳပၞာန်ဂှ်တှ်ေ ရပ်စပ်နဲကွတ်ပညာအဳလက်ထရဝ်နေတ်တံဂှ်တုဲ ဗတိုက်ဒၟံၚ်ဂီုကၠီုသာ်ဗာတံဂှ်ရ သွက်ဂွံစဵုဒၞါ နူပွမဇီုကပိုက်ဒး အဝဵုအပိုၚ်အခြာကၟိန်ဍုၚ် ကေုာံ ပရေၚ်ညိၚ်ဝတ်တံဂှ်ကဵု သွက်ဂွံဂၠိုက်ဂၠါဲကေတ်အရေဝ် ဂဗုတ်မစပ်ကဵုသာ်ဗာတံဂှ်ဂးတုဲ ထ္မံက်ထ္ၜးလဝ်ရ။
မဇက်ပဳ ညးတာလျိုၚ် ဂကောံ(အသံ) မချဳဒရာၚ်ဒၟံၚ် အခေါၚ်ဟီုဂးထ္မံက်ပ္တိတ် ဗွဲမဗၠးၜးဂှ်မ္ဂး ပ္ဍဲအရာပါ်ပရအ်တၚ်နၚ်ပရိုၚ်တံဂှ် ကေတ်ကၠုၚ်အရေဝ် နကဵုသၞောဝ်ဂီုကၠီုသာ်ဗာတံမာန်ရောၚ် သ္ၚဳဂၠိပ်လဝ်ရ။
“ချိုတ်ပၠိုတ်ဂှ်တှ်ေ အခိၚ်ဟွံရုဲ စၟဳတ်ကၠုၚ်ဖုၚ်တံမာန်ဏောၚ်။ ရပ်ဒၟံၚ် VPN ဟီုမ္ဂး နကဵုသၞောဝ်မစၞောန်ပျးလဝ်တ္ၚဲဏံဂှ် စောဲကၠုၚ်ဂဗုတ်တံ တပ်ကၠုၚ်ဒဏ်သြန်တံ လက္ကရဴအိုတ် ဖျေံကၠုၚ်ဒဏ်ထံၚ်တံဒှ်တမ် ကၠောန်ကၠုၚ်မာန်ဏောၚ်။ လက္ကရဴအိုတ် ရပ်စပ်နဲကွတ်ပညာအဳလက်ထရဝ်နေတ်တံဂှ်တုဲ ပ္ဍဲဒၞါဲပါ်ပရအ်တၚ်နၚ်ပရိုၚ်တံဂှ်မ္ဂး ရပ်စပ်ကၠုၚ်သၞောဝ် ဗွဲမလောဲသွာတုဲ ကုညးလဵုမွဲဟွံဟီု ဂွံကိတ်ညဳကဵုသၞောဝ်ညးတံဂှ် ဖံက်ပ္ကဝ်ဒၟံၚ်သၞောဝ်ဏံဂးတုဲ ကဵုဒုဟ်ဒဏ်ကီု ကေတ်အရေဝ်တံကီုဂှ် ကၠောန်ကၠုၚ်တၟာဂလိုၚ်မာန်ဏောၚ်” သာ်ဝွံ သ္ဂးရ။
ပ္ဍဲသၞောဝ်ဂှ်တှ်ေ ဟွံဂွံအခေါၚ်မွဲသာ် ခၞံကၠောန်ကၠုၚ် VPN ကီု ဟွံသေၚ်မ္ဂး သွက်ညးမကၠောန်ကဵု VPN တံဂှ် ဒဏ်ထံၚ် နူမွဲဂိတု စဵုကဵုတြဴဂိတု၊ ဒဏ်သြန် နူ ၁၀ ကိုဋ်ဒ္ကေဝ် စဵုကဵု ၁၀၀ ကိုဋ်ဒ္ကေဝ် ဒးဒုၚ်ဖျေံစၟတ်မာန်ဏောၚ်တုဲ သီုဒဏ်ၜါသာ်လေဝ် ဖျေံစၟတ်မာန်ဂှ် သ္ဂးရ။
သ္အာၚ်နူဂှ်ပၠန် ကပေါတ်ဒုၚ်သက်သဳ မဆေၚ်စပ်ကဵုဂဗုတ်တံဂှ် ဒးသီဂိုၚ်အာ နဒဒှ်ဘဏ္ဍာကၟိန်ဍုၚ်ဏောၚ် စၞောန်ပျးလဝ် ပ္ဍဲသၞောဝ်ဂှ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူကျဳမျေတ်ဂှ်တှ်ေ စပ်ကဵု VPN တုဲ ပ္ဍဲတိဍာ်ကံၚ်ဇြဳပၞာန် အုပ်ဓုပ်လဝ်ဖိုဟ်တံဂှ် အန္တရာယ်နွံမာန်ရောၚ် ဟီုရ။
“ညအ်ဂှ်တှ်ေ မုလေဝ်ကၠောန်ဟွံဂွံ။ ဒးမံၚ်ဒၟံၚ် အပ္ဍဲဒၞါဲဍေံတံဏောၚ်တှ်ေလေဝ်။ အာကၠောန်စမ် ပ္ဍဲရခေၚ်တေံ၊ လ္ပာ်ကချေၚ် လ္ပာ်သေံတံဂှ်ညိ။ အတေံ သီုကဵုဗဗးဖျဴနၚ်ဏီဏောၚ်။ ပ္ဍဲတိဍာ်ဍေံတံအုပ်ဓုပ်မာန်တံဂှ်တှ်ေ အန္တရာယ်သာ်ဏံနွံရ” သာ်ဝွံ သ္ဂးရ။
ပ္ဍဲဍုၚ်ဗၟာ ကြဴနူအခိၚ်သီအဝဵုတုဲတေံဂှ် ကံၚ်ဇြဳပၞာန် ကဵုဇြဟတ်ဂရိုဟ် ကုကမ္ပဏဳဇာဇၞိက်အေန်တာနိတ် ကေုာံ အဝ်ပရေတာ ပရေၚ်ဆက်စၠောံအပ္ဍဲဍုၚ်တံဂှ်တုဲ ကဵုဇြဟတ်ဂရိုဟ် ကဵုကၟာတ်ကၠုၚ်လဝ် ဇာဇၞိက်ပရေၚ်မၞိဟ် Facebook မၞိဟ်ရပ်စပ်ဂၠိုၚ်တံဂှ်ရ။
ကြဴနူဂှ်တုဲ ညးမမံၚ်အပ္ဍဲဍုၚ်တံဝွံ ဂွံဂွံအခေါၚ်တီကေတ်တၚ်နၚ်ပရိုၚ်တံဂှ် ဒုၚ် VPN အကြာတုဲ ဒးရပ်စပ်ဒၟံၚ် Facebook ဂှ် ပေၚ်ကၠုၚ်ပိသၞာံရ။
ဟိုတ်ဂှ်ရ သွက်ဂွံကၟာတ်ပရိုၚ် ကေုာံ သွက်ဂွံတြးဝါဒ နူကဵုသဵုယှေဝ်မဳဒဳယျာတံဂှ် ကံၚ်ဇြဳပၞာန် စၞောန်ပျးကၠုၚ်သၞောဝ်သာ်ဗာတုဲ ဂွံကၟာတ် Facebook ပေၚ်ၚ်မာန်ဂှ် ပ္တိတ်ကၠုၚ်ဒၟံၚ်ဇြဟတ် ဂွံကၟာတ်လဒဵုအာ ပရေၚ်ရပ်စပ် VPN တံဂှ်ရ။
ညးဍုၚ်ကွာန်မွဲတၠဂှ်တှ်ေ ဟိုတ်နူသၞောဝ် လလောၚ်ပ္တိတ်ကၠုၚ်ဂှ်တုဲ ပ္ဍဲကဵု Facebook ဂှ်တှ်ေ အခေါၚ်ဂွံတီကေတ်တၚ်နၚ်ပရိုၚ်တံ အခေါၚ်ဂွံရပ်စပ်တံဂှ် ဒှ်အာဒဒိုက်သီုဖအိုတ်ဏောၚ် ဟီုရ။
“ ဒှ်ဗီုဏံတှ်ေ ပ္ဍဲကဵုပိုယ်တံဂှ် အရာမစပ်ကဵုအေန်တာနိတ်တံ အခေါၚ်ပံက်ဖုၚ်ဟွံမွဲပုဟ်ဟီုမ္ဂး ဒှ်အာဒဒိုက်အိုတ်ဏောၚ်။ ပိုယ်တံရပ်ဒၟံၚ် Facebook ဂှ် ဒုၚ် VPN တုဲမှ ဒးရပ်စပ်ဒၟံၚ်။ ညအ်ဂှ် ဍေံတံ ဒှ်သဘဴကၟာတ်ထောံ ညးဍုၚ်ကွာန်တံရဏောၚ်။ ဂွံဂွံအခေါၚ်ရပ်စပ်အေန်တာနိတ််တံဂှ်တှ်ေ အခေါၚ်အရာညးဍုၚ်ကွာန်တံ အောန်အာယျလေဝ်” သာ်ဝွံ သ္ဂးရ။
သၞာံတုဲကၠုၚ် ၂၀၂၄ တေံ ပ္ဍဲဂိတုမေကြပ်အိုတ်ဂှ်လေဝ် ညးဍုၚ်ကွာန်ဒၟံၚ်အပ္ဍဲဍုၚ်တံ ညံၚ်ဆက်ရပ်စပ်ဇာဇၞိက်ပရေၚ်မၞိဟ်ဟွံဂွံဂှ် ကံၚ်ဇြဳပၞာန် ပံက်ကၠုၚ် Secure Web Gateway SWG တုဲ နကဵုအရီုဗၚ်ကွတ်နဲပညာကြုက်တံဂှ် ကၟာတ်လဒဵုကၠုၚ်လဝ် VPN တံဏီရ။
ဆ္ဂး ဒဵုကဵုအခိၚ်လၟုဟ် ပ္ဍဲဍုၚ်ဗၟာဂှ် ဆက်ရပ်စပ်ဒၟံၚ် VPN တံ ဂွံဒၟံၚ်တုဲ ညးမရပ်စပ်ဒၟံၚ်သပ်ဝဴ VPN ပ္ဍဲဖုၚ်တံဂှ် ပ္ဍဲကဵုသၞေဟ်ကၚ်ဂီုကၠီုကံၚ်ဇြဳပၞာန်တံ စၟဳတ်တုဲ အာတ်မိက်ဒၟံၚ်လှုဲတံလေဝ် နွံဒၟံၚ်ပၠန်ရ။
ဟိုတ်နူအကာဲအရာဏံတုဲ နကဵုညးဍုၚ်ကွာန်တံ ဂွံကၠိုဟ်ကေတ်သၞောဝ်ဂီုကၠီုသာ်ဗာဂှ် ထေက်ကဵုဒးဗှ်ချိုတ်တ်ပၠိုတ်တ်တုဲ သွက်ပရေၚ်ဂီုကၠီုဒေတ်ဂျေတ်ဒဴဂှ်လေဝ် ဒးကဵုက္ဍိုပ်ထေက်ဂှ် ထံက်ထ္ၜးဒၟံၚ်တံလေဝ် နွံဒၟံၚ်ပၠန်ရ။
ပ္ဍဲကဵုသၞောဝ် ကံၚ်ဇြဳပၞာန် စၞောန်ပျးလဝ်လၟုဟ်ဂှ် နကဵုစိုတ်မယျေလ္ဂူဟွံသေၚ် ပွမစကာတမ်ရိုဟ်သာ်ဗာတံဂှ်တုဲ ကၠတ်ကၠုၚ်သြန်လ္တူလပှ်ကျာတံဂှ်ကီု ဟွံသေၚ်မ္ဂး စကာမၞိဟ်တၞဟ်ဟ်တုဲ ကဵုကၠောန်တံဂှ်ကီုဂှ် ဖျေံစၟတ်အာ ဒဏ်ထံၚ် နူ ၂ သၞာံ စဵုကဵု ၇ သၞာံဏောၚ်တုဲ သီုကဵုဖျေံစၟတ်ဒဏ်ထံၚ်တံမာန်ဂှ်လေဝ် ထ္မံက်ထ္ၜးလဝ်ရ။
ဟွံဂွံအခေါၚ်မွဲသာ် ယဝ်ရကၠောန်ကၠုၚ်သၞောတ်ဝိုၚ်ဝေၚ်လပှ်ကျာတံဂှ်မ္ဂးလေဝ် ဒဏ်ထံၚ် နူ ၆ ဂိတု စဵုကဵုမွဲသၞာံ၊ ဒဏ်သြန် နူ ၅၀ ကိုဋ် စဵုကဵု ၜါကၠံကိုဋ်၊ သီုဒဏ်ၜါသာ် ဖျေံစၟတ်မာန်တုဲ ကပေါတ်မဆက်စပ်ကဵုဂဗုတ်တံဂှ်လေဝ် သီဂိုၚ်အာ နဒဒှ်ဘဏ္ဍာကၟိန်ဍုၚ်ဏောၚ်ဂှ် သ္ဂးရ။
သ္အာၚ်နူဂှ်ပၠန် တၚ်နၚ်ပရိုၚ် ညးဂမၠိုၚ်ကျောဝ်ဗဵုဟွံထေက်တံဂှ် နကဵုကွတ်နဲပညာအဳလက်ထရဝ်နေတ်တံဂှ် ပါ်ပရအ်ကၠုၚ် ပလံၚ်ဗစိုပ် ဆာဲစၠောံ ဟွံသေၚ်မ္ဂး ကၠောန်သ္ပသွံတြးကၠုၚ်မ္ဂး ဖျေံစၟတ်အာ ဒဏ်ထံၚ် နူမွဲဂိတု စဵုကဵုတြဴဂိတု၊ ဒဏ်သြန် နူ ၁၀ ကိုဋ် စဵုကဵု ၁၀၀ ကိုဋ်၊ သီုဒဏ်ၜါသာ်ဂှ် ဖျေံစၟတ်မာန်ဂှ် စၞောန်ပျးလဝ်ရ။
နာဲအာဲမန် ဒါရိုက်တာဌာန်ဒတန်အခေါၚ်အရာမၞိဟ်ဍုၚ်မန်ဂှ် သၞောဝ်ဂီုကၠီုသာ်ဗာ ကံၚ်ဇြဳပၞာန် မကဵုဒၟံၚ်ဒဒိုက်ကုညးဍုၚ်ကွာန်တံ သီုလ္တူတိ သီုနူမှဲအကးတေံ မစၞောန်ပျးကၠုၚ်ဂှ်ဝွံ ဂွံစဵုဒၞါကဵုသွက်ညးဍုၚ်ကွာန်ဂမၠိုၚ်ဂွံခိုဟ်စဂှ် ဒှ်ဟွံမာန်ပုဟ်ဂှ် ဟီုလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ