ဘာပန်၊ ဂျာန္နဝါရဳ ၄
အပ္ဍဲဒေသကတိုၚ်တိ တိဍာ်ဒပ်မဟာ ၅ ခရိုၚ်ဘာပန် ဗော်သွးကောန်ဂကူကရေၚ် KNU ဂှ် အကြာဒပ်ပံၚ်ကောံပၠန်ဂတး KNLA တံကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်တုဲ ညံၚ်ဗ္ဒိုပ်ဟွံဂွံစှ်ေအာဂှ် ကံၚ်ဇြဳပၞာန် တဝ်စၞေဟ်ဒၟံၚ် နကဵုပၞာန်ကျာ ဗွဲမသ္ကာတ်မြဟ်ရောၚ် ဂွံတီကေတ် နူကဵုတမ်ရိုဟ်ပရိုၚ်ပရေၚ်ပၞာန်ဒေသတံရ။
တုဲကၠုၚ်ဂိတုဒဳဇြေမ်ဗာ ၂၉ တေံတုဲ ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA ကေုာံ ဒပ်ပံၚ်ကောံပၠန်ဂတးမဟာမိတ်ဂမၠိုၚ် လုပ်စိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲကွာန်ကတိုၚ်တိ လ္တူဂၠံၚ်ကွဳစက် ကမမံၚ်−ဘာပန် နူကဵုဍုၚ်ကမမံၚ်သ္ကုတ်လ္ပာ်လ္တူ ခရိုၚ်ဘာပန် တွဵုရးကရေၚ်ဂှ် ခြာဒၟံၚ် ၁၀ မိုၚ်ပြၚ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်ၜါလ္ပာ် က္တဵုဒှ်ဒၟံၚ်ဗွဲမသ္ကာတ်မြဟ်တုဲ လ္ပာ်ကံၚ်ဇြဳပၞာန် ကၠုၚ်စိုပ်ဘိုၚ်ပန်ကဵုလဝ် ကွာန်ကတိုၚ်တိကဵု ကွာန်မၞုံပွဳပွူဗ္ဒါဲဗ္ဒါဲတံဂှ်တုဲ ပေါဲဗ္တိုက်ၜါလ္ပာ်ဝွံ စဵုကဵုလအ်ကၠုၚ်ပွိုၚ်မွဲသတ္တာဟဂှ် ဆက်က္တဵုဒှ်ဒၟံၚ်ရောၚ် တမ်ရိုဟ်ပရိုၚ်ဒေသတံ သ္ဂးရ။
ဗ္ဒိုပ်ဒပ်ကံၚ်ဇြဳပၞာန် ဖျေံလဝ်သ္ဇိုၚ် လ္တူဂၠံၚ်ကွဳစက် ကမမံၚ်−ဘာပန် မပ္တံကဵုဗ္ဒိုပ်ကူသုက်၊ ဗဒိုပ်မထဝ်၊ ဗဒိုပ်ဒဵုပိမ၊ ဗဒိုပ်(ဆၚ်စွယ်) တံဂှ် အပ္ဍဲဂိတုနဝ်ဝေမ်ဗာ၊ အပ္ဍဲဂိတုဒဳဇြေမ်ဗာတုဲကၠုၚ်တေံ ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ကြဴနူဗ္တိုက်သီဂွံလဝ်ဖအိုတ်တုဲဂှ် ဆက်ဗ္တိုက်ဒၟံၚ် ကုဗ္ဒိုပ်ဒပ်ကတိုၚ်တိ မသှ်ေဒၟံၚ်ဂှ်ရ။
ဟိုတ်နူပရေၚ်ပၞာန်ၜါလ္ပာ်သ္ကာတ်မြဟ်လဝ် အပ္ဍဲဒေသကတိုၚ်တိဂှ်တုဲ ညးဍုၚ်ကွာန်ဒေသ နူကဵုကွာန် (ကတိုၚ်တိ ဘောကြိုလယ်၊ ဘောကြိုထ၊ နိုဖောထီး၊ ထီးသဲလေ) တံဂှ်ဝွံ ဒးဂြိပ်ဒဴပါဲဒလေတ်အာလဝ် လ္ပာ်ကမမံၚ်၊ ဒေသမျာၚ်ကျဳၚူ ကေုာံ လ္ပာ်ကွာန် မၞုံပ္ဍဲပွိုၚ်ဍုၚ်ၜဳကလေၚ် တိဍာ်ထိၚ်ဒက် ဒပ်မဟာ ၁ တံဂှ်ရ။
လ္ပာ်ကံၚ်ဇြဳပၞာန်ဂှ်တှ်ေ ညံၚ်ဗ္ဒိုပ်ဒပ်ကတိုၚ်တိ ဟွံဂွံစှ်ေအာဂှ် ပါဲနူကဵုပန်ပှော်ကဵုပၞာန်ကျာဂှ် နူကဵုဒေသမျာၚ်ကျဳၚူ ကေုာံ နူဍုၚ်ကမမံၚ်တံဂှ်မွဲကဆံၚ် ပလံၚ်ဗစိုပ်ကဵုဒၟံၚ် ပၞာန်အရီုတံဂှ်တုဲ ကရောၚ်ပၞာန်အရီုဂမၠိုၚ်ဝွံ ဟိုတ်နူဒပ်ပံၚ်ကောံပၠန်ဂတး ဒပ်မဟာ ၅ KNLA တံ ကၟာတ်လဒဵုလဝ်ဂှ်တုဲ ဟွံဂွံစိုပ်ကၠုၚ် လ္ပာ်ကွာန်ကတိုၚ်တိဂှ်ဏီတုဲ စိုပ်ဒၟံၚ်ၜိုတ်လ္တူဍုၚ်ကမမံၚ်ဂှ်ညိကီုဂှ် တမ်ရိုဟ်ပရိုၚ်ပရေၚ်ပၞာန်ဂမၠိုၚ် ဟီုရ။
ဒပ်ပံၚ်ကောံပၠန်ဂတး ဒပ်မဟာ ၅ KNLA တံဝွံ အခိၚ်လၟုဟ်ဂှ်လေဝ် ဆက်ကၟာတ်လဒဵုလဝ် တမ်ဒပ်ဂမၠိုၚ် ကေုာံ ဗျူဟာပၞာန်ကံၚ်ဇြဳပၞာန် မဖျေံသ္ဇိုၚ် လ္ပာ်သၠုၚ်ကျာဍုၚ်ဘာပန်တံဂှ်တုဲ သွက်ဗ္ဒိုပ်ဗျူဟာ ကေုာံ သွက်ဇွောံမလွဟ်လက်နက်တံဂှ် ဒပ်ကံၚ်ဇြဳပၞာန် ကၠုၚ်စိုပ်ပလံၚ်ဗစိုပ်ကဵုဒၟံၚ် နူကဵုတရဴကျာတံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ