မတ်မလီု၊ ဂျာန္နဝါရဳ ၄
အခိၚ်ဒပ်ပၞာန် ဒတူဟွံဓဝ်ဒၟံၚ်ဏံ နကဵုအလဵုအသဳညဳသၟဟ်ဂကူ NUG သီုကဵုညးဍိုက်ဍိုပ် ပ္ဍဲပၠန်ဂတးတံဂှ် ကၠောန်အာအပြံၚ်အလှာဲ ပ္ဍဲကဏ္ဍပရေၚ်အုပ်ဓုပ် ကေုာံ ပရေၚ်ပၞာန်တံဏောၚ်ဂှ် သၞာံတၟိမံက်ဏံ ဟီုပ္တိတ်ကၠုၚ်ရ။
သၞာံ ၂၀၂၅ ဏံ ညံၚ်ပၠန်ဂတးဂွံအံၚ်ဇၞးဂှ် အပြံၚ်အလှာဲမ္ဒးကၠောန်အာတံဂှ် ဟွံရောံဟွံဓည ကၠောန်အာဂံၚ်ၚ်ဏောၚ်ဂှ် သ္ကိုပ်ဝန်ဇၞော် NUG မာန်ဝေန်ခိုၚ်တာန် ဟီုလဝ်ဂလာန် တ္ၚဲသၞာံကၠောံသၞာံတၟိ ပ္ဍဲဂိတုဂျာန္နဝါရဳ ၁ တေံရ။
နကဵု NUG ပြုပြေၚ်ပြံၚ်လှာဲအာ ပရေၚ်ပံၚ်ကောံကၠောန် သွက်ပၠန်ဂတးတံ ဂွံစိုပ်တရဴဂှ်ဏောၚ်တုဲ ဒၟါနူတၚ်နွံပၟိက် ပ္ဍဲကဵုပရေၚ်အာက္ဍိုပ်တံဂှ်တုဲ တၚ်ဍိုန်လျစပ်ကဵုပရေၚ်ပၞာန်၊ ပရေၚ်အုပ်ဓုပ် မက္တဵုဒှ်ကၠုၚ်တံဂှ်လေဝ် ပ္တိတ်ဒြဟတ် သွက်ဂွံပလေဝ်ပလေတ်အာဂှ် ဒှ်ဒၟံၚ်ဒတုဲရောၚ် သ္ဂးရ။
အပ္ဍဲသၞာံ ၂၀၂၅ ဏံ စက်ယန်အုပ်ဓုပ်အဆံၚ်ၚ်တံဂှ် ညံၚ်ဂွံဒှ်ကၠုၚ်စက်ယန် သွက်ညးဍုၚ်ကွာန် ညံၚ်ဂွံနွံကဵုစေဝ်ပၞောန်တံဂှ် နကဵု NUG ရေၚ်တၠုၚ်အာဗွဲတၟေၚ်ဏောၚ်ဂှ် သ္ကိုပ်ဝန်ဇၞော် ကဵုလဝ်သမ္တီရ။
ဒံက်တာသဳရိမန်ဆာန် သ္ကိုပ်ဒပ် ဒပ်စဵုဒၞါဍုၚ်မန် MSDF ဂှ် ရံၚ်ကဵုဗ္ၜတ်အလုံဍုၚ်မွဲမ္ဂး ယဝ်ရ NUG ကၠောန်သ္ပအာအပြံၚ်အလှာဲ စပ်ကဵုပရေၚ်ပၞာန်တံမာန်မ္ဂး သွက်ပၠန်ဂတးဂှ် သွဟ်ခိုဟ်ကလိဂွံမာန်ဏောၚ် သ္ၚဳဂၠိပ်လဝ်ရ။
“နဗ္ၜတ်အလုံဍုၚ်မွဲ တၚ်နွံပၟိက် တၚ်ဍိုန်လျ စပ်ကဵုပရေၚ်ပၞာန် ပရေၚ်စဵုဒၞါတံ၊ ပရေၚ်သ္ၚဳဂၠိပ်ပရေၚ်ပၞာန်တံ ကၠောန်သ္ပတုဲ အပြံၚ်အလှာဲစပ်ကဵုပရေၚ်ပၞာန် ပရေၚ်စဵုဒၞါတံဂှ် စၞးဒးကၠောန်ချဳဒရာၚ်ဒၟံၚ် ဒေသပၞာန် ဒေသရးညးကဵုညးဂှ် ဆက်စၠောံကေတ်အဆက်ညးသ္ကအ်တုဲ ညံၚ်ဂွံကၠောန်သ္ပချဳဒရာၚ်အာပရေၚ်ပၞာန်တံမာန်ဂှ် နူကဵု NUG ယဝ်ရကၠောန်အာအပြံၚ်အလှာဲ ပ္ဍဲကဏ္ဍပရေၚ်စဵုဒၞါ ပရေၚ်ပၞာန်တံမာန်မ္ဂး သွက်ပၠန်ဂတး၊ သွက်အလုံညးဍုၚ်ကွာန်မွဲဂှ် သွဟ်ခိုဟ်မွဲ ကလိဂွံမာန်ဏောၚ်” သာ်ဝွံသ္ဂးရ။
သ္ကိုပ်ဝန်ဇၞော် NUG ဂှ်တှ်ေ အပ္ဍဲသၞာံ ၂၀၂၄ ဏံ ကိစ္စမ္ဒးပြုပြေၚ်ပြံၚ်လှာဲ မ္ဒးကေတ်ခန်လ္ၚတ် နွံဗွဲမဂၠိုၚ်တုဲ ပြဝညးတာလျိုၚ် ပ္ဍဲကဵုပရေၚ်ပၞာန်၊ ပရေၚ်အုပ်ဓုပ်တံ ဟွံရံၚ်မုက်ညးဍုၚ်ကွာန်တံ၊ ပြဝဒစေၚ်ဗၠေၚ်အာ နူကဵုသၞောဝ်အစာံပၠန်ဂတး၊ ပြဝမကၠောန်ဏာ အတိုၚ်ဒှ်ကၠုၚ်ပ္ဍဲစိုတ်တေံ ဓဝ်ညဳသၟဟ် ဓဝ်ကၠိုဟ်ခၠၚ် မ္ဒးလီုလာ်အာတံဂှ်လေဝ် ဒုၚ်ဏာလဝ်ဝန်ရ။
ညးခါတ်အကာဲတံဂှ်တှ်ေ နကဵု NUG မဒှ်အလဵုအသဳပၠန်ဂတးဂှ် ဌာနဝန်ဇၞော်ဂမၠိုၚ် ပ္ဍဲအရာအုပ်ဓုပ်ညးဍုၚ်ကွာန် ပ္ဍဲကဵုကဏ္ဍစပ်ကဵုပရေၚ်ပၞာန်တံဂှ် ညံၚ်ဂွံကောံကလောံဗိုန်ဇၟံဒၟံၚ်ဂှ် ထေက်ကဵုဒးကၠောန်အာအပြံၚ်အလှာဲလအ်ယျဂှ် ထံက်ထ္ၜးဒၟံၚ်တံလေဝ် နွံဒၟံၚ်ပၠန်ရ။
သမ္မတာယာယဳ NUG ဒူဝါလယှဳလဂှ်လေဝ် သီုဌာနဝန်ဇၞော်တံမပါလုပ် စက်ယန်ပရေၚ်စဵုဒၞါညးဍုၚ်ကွာန်၊ ပရေၚ်အုပ်ဓုပ်ညးဍုၚ်ကွာန် ကေုာံ ပရေၚ်ဂီုကၠီုညးဍုၚ်ကွာန် ပ္ဍဲကဵုစက်ယန်ပပိမဏံဂှ် သ္ပအာအပြံၚ်အလှာဲဏောၚ် ဟီုလဝ်ဂလာန် ပ္ဍဲတ္ၚဲကၠောံသၞာံတၟိဂှ်ရ။
ကုကောန်ဂကောံအလဵုအသဳ ပ္ဍဲဌာနဝန်ဇၞော်တံဂှ်လေဝ် ပလေဝ်ပလေတ်ဒၟံၚ် သ္ဂောံကၠောန်ၜိုတ်အပြံၚ်အလှာဲတုဲ ဟိုတ်နူနွံပၟိက်ဒၟံၚ်ကဵု ညးမအာက္ဍိုပ်လှဲလှဲလးလး နူကဵုအကာဲအရာလၟုဟ်ဂှ်တုဲ သွက်ဂွံလှဲပြံၚ်ကဵု မၞိဟ်ကေတ်တာလျိုၚ်မာန်တံဂှ်လေဝ် ကော်ဘိက်လဝ်ရ။
ကိုဝ်ဇြေယျ မသ္ပလဝ်ဇြဳဒဳအာမ် နူကဵုဒပ်စဵုဒၞါဘဲပၞာန်ကျာဂှ် ပၠန်ဂတးဂွံတောတက်ပြံၚ်လှာဲဂှ် နကဵု NUG ထေက်ကဵုဒးကဵုဒၞါဲ ကုသၟတ်အစောံစရာဲနွံ မကၠောန်မာန် နွံပ္ဍဲသၟဝ်တိဏံဂှ်ရောၚ် ထံက်ထ္ၜးလဝ်ရ။
“အဓိကဂှ်တှ်ေ သၟတ်တံရဏောၚ်၊ ကဵုဒၞါဲ ကုသၟတ်ဍောတ်တ် မၞုံကဵုက္တိုၚ်ၚ်ကၟဟ်ဟ်တံဂှ်တှ်ေ ကလောန်တုဲပြဟ်ဏောၚ်။ သဘဴဓဝ်ပၠန်ဂတးဂှ်တှ်ေ ကဵုဒၞါဲကဵုညးသၟတ်တံတုဲ ကၠောန်မ္ဂး ခိုဟ်အိုတ်ရ။ ပၠန်ဂတးလဵုဒှ်ဒှ် မၞိဟ်ဇၞော်တံဂှ်တှ်ေ ၜိုတ်ထိၚ်ကဵုရဏောၚ်ခိုဟ်” သာ်ဝွံ သ္ဂးရ။
သမ္မတယာယဳဂှ်တှ်ေ အပ္ဍဲကာလပၠန်ဂတးဏံ နကဵုတၚ်နွံပၟိက် ပ္ဍဲပရေၚ်အာက္ဍိုပ်ဂှ်ကီု၊ ဟိုတ်နူကဵုဖဵုအဆက် သၞောတ်ပရေံ၊ ဒ္ဂေတ်လၟေတ်ပရေံတံဂှ်တုဲ အရာမဒးဇီုကပိုက်လ္တူညးဍုၚ်ကွာန်တံဂှ် ဒုၚ်လဝ်ဝန်တုဲ လၟေၚ်ကမၠောန်ပြုပြေၚ်ထိၚ်ဒဝ်အာ တၚ်ဍိုန်လျတံဂှ် ဆက်ကၠောန်ဒၟံၚ်ရောၚ် ကဵုလဝ်သမ္တီရ။
သၞာံ ၂၀၂၅ ဏံ ဂွံဖါဲပ္တိတ်ဂကောံပၞာန်တံ ဗွဲမအံၚ်ဇၞးမာန်ဂှ် နကဵုဂကောံရပ်လွဟ်ကောန်ဍုၚ်အရၚ်သီုဖအိုတ် ကေုာံ နကဵုဂကောံဇြဟတ်ပရေၚ်ဍုၚ်ကွာန်ဂမၠိုၚ် သွက်ဂွံထ္ၜးပျး ပရေၚ်ပံၚ်တောဲ ပ္ဍဲပရေၚ်ဍုၚ်ကွာန်၊ ပရေၚ်ပၞာန်တံ နတဲဂှ် စိုပ်အခိၚ်ယျဂှ် ညးဖ္တိုက်ဖ္အောဝ်လဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တံဂှ်တှ်ေ ပရေၚ်သ္ဂောံကၠောန်သ္ပအပြံၚ်အလှာဲ စက်ယန် NUG ဂှ်ဝွံ ဒှ်ကၠုၚ်အထံက်အရီု လ္တူပၠန်ဂတးက္ညၚ်ဏံ တၟာဂလိုၚ်မာန်ဏောၚ်တုဲ သွက်ဂကောံပၞာန်ဂွံပြဟ်စှ်ေအာဂှ် ဒှ်ကၠုၚ်ဇြဟတ်ဂရိုဟ်မာန်ဂှ် ထံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−NUG