ကျာ်ထဝ်၊ ဂျာန္နဝါရဳ (၅)
ဒုသ္ကိုပ်ဗၠာဲသၟိၚ် ဗ္ဒိုပ်ၝောံဍုၚ်ရေဝ် မၞုံဍုၚ်ရေဝ်၊ တွဵုရးဍုၚ်မန် အံၚ်ကျဝ်သဵုဂှ် ဂကောံဇြဟတ်ပံၚ်ကောံပၠန်ဂတးတံ ရပ်ဒက်ဂွံလဝ်ရဂှ် ပရိုၚ်တမ်ရိုဟ်ၜါလ္ပာ်တံ သ္ပဒတန်လဝ်ကဵု သြၚ်လောန်တိုၚ်မ်ရ။
ပ္ဍဲဂိတုဂျာန္နဝါရဳ စၟတ်တ္ၚဲ(၃) ၜိုတ်အခိၚ်(၂)နာဍဳလ္ဒေါဝ်တ္ၚဲဂှ် ဂကောံဇြဟတ်ပံၚ်ကောံပၠန်ဂတးတံ ရပ်ဒက်ဂွံလဝ် ပ္ဍဲသ္ကုတ်ဂၠံၚ် ဒုၚ်ဇြယေတ်-(မုပ္ပလၚ်) ဍုၚ်ဒုၚ်ဇြယေတ်ဂှ်ရ။
သ္ကိုပ်ဗ္ဒိုပ် ဒုသ္ကိုပ်ဗၠာဲသၟိၚ် အံၚ်ကျဝ်သဵု စဴကၠုၚ်နကဵုအခေါၚ်ဇူဂှ် အခိၚ်တိတ်ကၠုၚ်ဍုၚ်ကျာ်ထဝ် နူဇရေၚ်သ္ၚိသမ္ဘာညး မၞုံဍုၚ်ဒုၚ်ဇြယေတ် မွဲတၠဓဝ်ဂှ် ဒးဒုၚ်ရပ်ဒက်လဝ်ရ။
သ္ကိုပ်ဗ္ဒိုပ် ဒုသ္ကိုပ်ဗၠာဲသၟိၚ် အံၚ်ကျဝ်သဵု ရပ်ဂွံလဝ်ဂှ် လှဲပြံၚ်ကဵုလဝ် ဇရေၚ်ဗော်သွးကောန်ဂကူကရေၚ် (KNU)၊ ဒပ်မဟာ(၁)၊ ခရိုၚ်သဓီုရဂှ် ညးတာလျိုၚ် ဂကောံဒပ်ပၠန်ဂတး ဖျေံသဇိုၚ်ကျာ်ထဝ်မွဲတၠဂှ် ဟီုရ။
ဒုသ္ကိုပ်ဗၠာဲသၟိၚ် အံၚ်ကျဝ်သဵုဂှ် ကြဴနူယိုက်ဂၠေၚ်လဝ်တာလျိုၚ် နဒဒှ်သ္ကိုပ်ဗ္ဒိုပ် ပ္ဍဲၝောံဍုၚ်ကျာ်ထဝ်တုဲဂှ် ဆုဲပြံၚ်အာလဝ် ဇရေၚ်ဗ္ဒိုပ်ၝောံဍုၚ်ရေဝ်ရဂှ် ဂွံတီကေတ် နူညးစုက်လုက်ကဵု ဗ္ဒိုပ်ဗၠာဲသၟိၚ်တံရ။
စပ်ကဵုအကာဲအရာ သ္ကိုပ်ဗ္ဒိုပ်ၝောံဍုၚ်ရေဝ် ဒးဒုၚ်ရပ်ဒက်လဝ်ဂှ်တုဲ နူကဵုသြၚ်လောန်တိုၚ်မ် သၟာန်သၟုက်လဝ် ညးမၞုံအခေါၚ်ဟီုဂး ခရိုၚ်သဓီု KNU ဗဒိုသဝ်ဨ ရ။
တုဲကၠုၚ်ဂိတုအံက်တဝ်ဗာ စၟတ်တ္ၚဲ(၁၂)ဂှ်လေဝ် သမ္ဘာတၠသ္ၚိ သ္ကိုပ်ဗိုလ်(၂)တၠ လုပ်ဒးဂၠံၚ်ဗၠေတ် ဇရေၚ်သၞေဟ်ကၚ် PDF မၞုံဗ္ဒါဲကွာန်(သုံးခွ)၊ ပွိုၚ်ဍုၚ်ကျာ်ထဝ်ဂှ် ဒးဒုၚ်ရပ်ဒက်လဝ်တုဲ ပြဟ်ဟ်ဏံဂှ် ထိၚ်ဒဝ်လဝ် ဗွဲမကိတ်ညဳကဵုသၞောဝ်ဂၠုဲပၞာန်ရ။
ပရိုၚ်-သြၚ်လောန်တိုၚ်မ်
ဗီု − Social Media