မုဟ်ဍုၚ်၊ ဂျာန္နဝါရဳ(၈)
တွဵုရးဍုၚ်မန်၊ ပွိုၚ်ဍုၚ်မုဟ်ဍုၚ် ဗ္ဒါဲကွာန်ယာန်ဒံၚ် ပ္ဍဲဂၠံၚ် မုဟ်ဍုၚ်-ဇြပ်ဗုဂှ် ညးဒဳယာန်ကွဳစက်ကဵု ညးဗက်လက်ကရဴကွဳစက် “မာန္တလာမေန်”တံညးၜါတၠဂှ် ဂကောံရပ်လွဟ်မွဲဂကောံတံ ရပ်ဒက်ကော်ဏာလဝ်ရဂှ် ဂွံတီကေတ် နူညးစုက်လုက်ကဵု လာၚ်ကွဳစက်တံရ။
တုဲကၠုၚ် ဂိတုဂျာန္နဝါရဳ စၟတ်တ္ၚဲ(၅)ဂှ် ကွဳစက်”မာန္တလာမေန်” ဖ္ဍိုက်ညးအာတရဴ နူမုဟ်ဍုၚ် ဒဳကၠုၚ်လ္ပာ်ဇြပ်ဗုမွဲဖ္ဍိုက်ဂှ် ဂကောံရပ်လွဟ်မွဲဂကောံတံ တာဒၞါဗ္ဒေါံထောံလဝ်ရ။
လက်ကရဴဂှ် ညးအာတရဴ ပါကၠုၚ်လ္တူကွဳစက် (၁၀)တၠတံဂှ် ကဵုစှ်ေထောံနူလ္တူကွဳစက်တုဲ ညးဒဳကွဳစက် ကိုဝ်ဇြဳဒူ ကဵု ညးဗက်လက်ကရဴကွဳစက်တံဂှ် ရပ်ကော်ဏာ လ္ပာ်ကွာန်လှာတေံ မွဲကရောံကဵုကွဳစက်ဖ္ဍိုက်ညးအာတရဴဂှ်ရ။
ပ္ဍဲကွဳစက်ဖ္ဍိုက်ညးအာတရဴဂှ် ဟိုတ်နူ GPS ပါဒၟံၚ်တုဲ ပ္ဍဲဂိတုဂျာန္နဝါရဳ စၟတ်တ္ၚဲ(၆) အခိၚ်နူဂယး ၜိုတ်(၁)နာဍဳဂှ် ညးတာလျိုၚ်လာၚ်ကွဳစက်တံကဵု ဂကောံပံၚ်ကောံကံၚ်ဇြဳပၞာန်တံ အခိၚ်အာဂၠါဲဂှ် ဂွံဆဵုကေတ်လဝ် ကွဳစက်ဖ္ဍိုက်ညးအာတရဴဂှ်သၟးရ။
ကွဳစက်ဖ္ဍိုက်ညးအာတရဴဂှ် ကလေၚ်ဒဳနၚ်လဝ် ဇရေၚ်ဗ္ဒိုပ်ဗၠာဲသၟိၚ်ၝောံဍုၚ်မုဟ်ဍုၚ်တုဲ ကပေါတ်ညးအာတရဴပါကၠုၚ်ပ္ဍဲကွဳစက်တံဂှ် ကလေၚ်ပလံၚ်ဗစိုပ်ဏာလဝ် ဇရေၚ်ဂုက်ကွဳစက်မာန္တလာမေန် မၞုံဍုၚ်ဇြပ်ဗုရဂှ် သ္ဂးရ။
ညးဒဳကွဳစက် ကေုာံ ညးဗက်လက်ကရဴကွဳစက်ဖ္ဍိုက်ညးအာတရဴ “မာန္တလာမေန်” ၜါတၠတံဂှ် စဵုကဵု ဂိတုဂျာန္္နဝါရဳ စၟတ်တ္ၚဲ(၇) အခိၚ်သဝ်တ္ၚဲဂှ် ဟွံဂွံအဆက်ဏီရဂှ် ညးစုက်လုက်ကဵု လာၚ်ကွဳစက်တံ ဟီုကဵုသြၚ်လောန်တိုၚ်မ်ရ။
အတိုၚ်လဟီု ညးပါကၠုၚ်လ္တူကွဳစက်တံဂှ်မ္ဂး ဂကောံရပ်လွဟ်တံဂှ် ကပေါတ်ကညောတ်ညးအာတရဴတံ မပ္တံနူ ဖုၚ်၊ ထိုၚ်လှုဲတံ မုကပေါတ်မှဟွံကေတ်ဏာမွဲသာ် ရပ်ဒက်ကော်ဏာ ညးဒဳကွဳစက်ကဵု ညးဗက်လက်ကရဴကွဳစက်တံ ညးၜါတၠဂှ်ဓရ်ရ။
ကွာန်ယာန်ဒံၚ်၊ ပွိုၚ်ဍုၚ်မုဟ်ဍုၚ် ဒၞါဲညးဒဳကွဳစက်ကဵု ညးဗက်လက်ကရဴကွဳစက်တံ ဒးဒုၚ်ရပ်လဝ်ဂှ် ဒှ်ဒေသ ဂကောံဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD တံချဳဒရာၚ်အဓိကမွဲတုဲ စပ်ကဵုလၟေၚ်ဒဒှ်ဏံတုဲ နူကဵုသြၚ်လောန်တိုၚ်မ် ဆက်စၠောံသၟာန်သၟုက်လဝ် ညးမၞုံအခေါၚ်ဟီုဂး NMSP AD ရ။
NMSP AD ဂှ် တုဲကၠုၚ် ပ္ဍဲဂိတုနိုဝေန်ဗာ စၟတ်တ္ၚဲ (၆)ဂှ် သွက်ဂွံသဳကၠဳစပ်ကဵုပရေၚ်ပိုန်ဒြပ်ဂှ် ကြဴနူကၠုၚ်စိုပ်ရပ်ကော်ဏာလဝ် မာန်နေဂျာမပါလုပ် ကောန်ကမၠောန် ရုပ်စက်ဆုဟောန်ဒါ မၞုံကွာန်ကျာ်ရဲ၊ ပွိုၚ်ဍုၚ်မုဟ်ဍုၚ်တံတုဲ လအ်ဂွံပွိုၚ်ပိတ္ၚဲဂှ် ကလေၚ်ဗလးကဵုလဝ်ရ။
ပရိုၚ်-သြၚ်လောန်တိုၚ်မ်
photo – CJ