နေဗျဳဒဝ်၊ ဂျာန္နဝါရဳ (၉)
ဟိုတ်နူတၚ်နွံပၟိက် ဇြဟတ်ဓာတ်လလဳပ္ဍဲဍုၚ်တုဲ ယဝ်ခါရသိုၚ်ခၞံ စမြိုၚ်တၟိမ္ဂး သွက်ဂွံဗ္ဂပ်စုတ်သၞောတ်သဵုလာတံကဵု ဇြဟတ်ဓာတ်မပဵုဒၟံၚ်တံဂှ် သွက်ဂွံစုတ်ပ္ဍဲ National Grid မာန်ဂှ်လေဝ် လလောၚ်ပ္တိတ်အာ လိက်လလောၚ်တြးအမိၚ်၊ ဥပဒေတံရောၚ်ဂှ် လ္ပာ်ကံၚ်ဇြဳပၞာန်တံ ဟီုရ။
ပ္ဍဲပေါဲကောံဓရီု ကဝ်မယှေန် ပရေၚ်ဖောအ်ဗြေဝ် ဇြဟတ်ဓာတ်ကေုာံဓာတ်လလဳ ကံၚ်ဇြဳပၞာန် ကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုဂျာန္နဝါရဳ စၟတ်တ္ၚဲ(၇)ဂှ် သ္ကိုပ်ဗိုလ်ဇၞော် တေန်အံၚ်သာန် မဒှ်ဥက္ကဌကဝ်မယှေန်ဂှ် ဟီုဂးကၠုၚ်လဝ်ရ။
ဟိုတ်နူတၚ်နွံပၟိက် ဇြဟတ်ဓာတ်လလဳတုဲ နကဵုကၟိန်ဍုၚ်ဇကုတံဂှ် သွက်ဂွံသုၚ်စောဲ ဇြဟတ် Renewable Energy ဗွဲမစိုပ်တရဴ ညံၚ်သုၚ်စောဲဒၟံၚ် ပ္ဍဲဍုၚ်တၞဟ်ဟ်တံမာန်ဂှ် သိုၚ်ခၞံစမြိုၚ်တၟိမ္ဂး သွက်ဂွံဗ္ဂပ်စုတ်သဵုလာတံတုဲ ဇြဟတ်ဓာတ်လလဳမပဵုဒၟံၚ်တံဂှ် ဒးစုတ်ပ္ဍဲ National Grid တံရောၚ်ဂှ် ဟီုလဝ်ရ။
သ္အာၚ်နူဂှ်ပၠန် သွက်ဇြဟတ်ဓာတ်လလဳဂှ် သိုၚ်ခၞံတိုန် တၟိုန်သဝ်ဝ်တံတုဲ ဒၞါဲပ္တိတ်ဇြဟတ်ဓာတ်လလဳမာန် နွံဒၟံၚ်(၁၆)ဒၞါဲတုဲ ပၞောဝ်ကဵုဒၞါဲကဵုဖျုန်(၄)ဒၞါဲဂှ် ဒးထ္မံက်အာရုပ်ရဴ ပ္ဍဲဒၞါဲထေက်ကြိုက်အိုတ်မွဲဒၞါဲရောၚ်ဂှ် သ္ကိုပ်ဗိုလ်ဇၞော်တေန်အံၚ်သာန်ဂှ် ဟီုရ။
ပြဟ်ဟ်ဏံဂှ်တှ်ေ ဟိုတ်နူပ္တိတ်ကဵုဒၟံၚ်ဇြဟတ်ဓာတ် ၂၂၀၀ မဂ္ဂါဝတ် ၅၀ တၟံကၠံဓရ်ရမာန်တုဲ အလုံမွဲကၟိန်ဍုၚ်ဂှ် တြးအာကဵုဇြဟတ်ဓာတ်လလဳ နကဵုသၞောတ်ဒးအလန်ရောၚ်ဂှ် ကံၚ်ဇြဳပၞာန်တံ ဟီုရ။
ပ္ဍဲအရာတြးဇြဟတ်ဓာတ်လလဳတံဂှ်လေဝ် ပ္ဍဲဂိတုဂျာန္နဝါရဳဂှ် ရးလ္ဂုၚ်ဂှ် ၄၈ တၟံကၠံ၊ ရးမာန္တလေဝ်ဂှ် ၁၇ တၟံကၠံကဵု ရးကေုာံတွဵုရးသှ်ေဒၟံၚ်တံဂှ် ၃၅ တၟံကၠံဓဝ်ဟေၚ် ပါ်ပရအ်အာကဵုအရၚ်ရောၚ်ဂှ် လလောၚ်ပ္တိတ်လဝ်ရ။
ကံၚ်ဇြဳပၞာန်ဂှ်တှ်ေ ဇြဟတ်ပ္တိတ်ဓာတ်လလဳ သ္ဂောံယအ်စှ်ေကၠုၚ်ဂှ် ဟိုတ်နူလာၚ်ဇြဟတ်ဓာတ်တံ ဒးဒုၚ်ဖံက်ဗ္တိုဟ်မာၚ်ကီု၊ ဟိုတ်နူကလိဂွံသၟုဟ်ဓာတ်သဘာဝတံ အောန်ကၠုၚ်ကီု၊ ဟိုတ်နူဘဲအန္တရာယ်သဘာဝတုဲ ပဠေဝ်ရုၚ်စက်ပ္တိတ်ဇြဟတ်ဓာတ်တံ ဟွံမာန်တံကီုရဂှ် ဟီုဂးလဝ်ရ။
ပရိုၚ်-သြၚ်လောန်တိုၚ်မ်
Photo – CJ