လံၚ်လုၚ်၊ ဂျာန္နဝါရဳ စၟတ်တ္ၚဲ(၉)
ပ္ဍဲပေါဲဗ္တိုက် က္တဵုဒှ်လဝ် အကြာကွာန်(နောက်ပြၚ်) ကဵု ကွာန်(စမ်းလှမ်း) ပွိုၚ်ဍုၚ်လံၚ်လုၚ်၊ ရးတၞၚ်သဳဂှ် ဂွံဆဵုကေတ်လဝ် ပရေၚ်ဇီုကပိုက်ချိုတ်ဂျိုၚ် ၜါလ္ပာ်တံရဂှ် ကောန်ဂကောံဒပ်ပၠန်ဂတးတံ ဟီုကဵုသြၚ်လောန်တိုၚ်မ်။
တုဲကၠုၚ်ဂိတုဂျာန္နဝါရဳ စၟတ်တ္ၚဲ(၇) အခိၚ်နူဂယးဂှ် နူကဵုကြတ်ဗ္တိုက်လဝ် ကရောၚ်ပၞာန်ကံၚ်ဇြဳပၞာန် ဇြဟတ်(၄၀)ပြၚ်ပါတံ ကလေၚ်စှ်ေကၠုၚ် နူကဵုလ္ပာ်ဒဵု(လက်ခတ်)တံဂှ် ပေါဲဗ္တိုက်ၜါလ္ပာ်က္တဵုဒှ်လဝ် လလအ်ပွိုၚ် ဗ္ဒါဲ (၄)နာဍဳရ။
အတိုၚ်လဟီုကောန်ဂကောံဒပ်ပၠန်ဂတးတံမ္ဂး ကရောၚ်ပၞာန်ကံၚ်ဇြဳပၞာန် ဒးဒုၚ်ကြတ်ဗ္တိုက်လဝ်ဂှ် ကေတ်ပွစဵုဒၞါကဵုရုၚ်စက်တံတုဲ ကလေၚ်ဆုတ်အာတုဲ နူဂှ်မွဲကဆံၚ် ကလေၚ်တိုန်အာ လ္တူဍုၚ်လံၚ်လုံပၠန်ရ။
ပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန်တံ ဇီုကပိုက်ချိုတ်လဝ် ဗ္ဒါဲ(၁၀)တၠတုဲ လ္ပာ်ဒပ်ပၠန်ဂတးတံဂှ် ကောန်သ္ဂံၚ်မွဲတၠ စှ်ေအာလဝ်ရဂှ် ဟီုရ။
ကရောၚ်ပၞာန်ကံၚ်ဇြဳပၞာန် ဒးဒုၚ်ကြတ်ဗ္တိုက်လဝ်ဂှ် တုဲကၠုၚ်နူကဵုဂိတုဂျာန္နဝါရဳ စၟတ်တ္ၚဲ(၅)ဂှ်ရ နူကဵုဍုၚ်လံၚ်လုၚ်ဂှ် ဒဵု(လက်ခတ်)၊ နူဂှ်မွဲကဆံၚ် လုပ်စိုပ်အာ ပ္ဍဲကွာန်(စမ်းလှမ်း)တုဲ ဒှ်ကရောၚ်ပၞာန် ဖံက်ပလီုကေတ်ဏာလဝ် ကပေါတ်မၞုံကဵုၚုဟ်မး မၞုံပ္ဍဲသ္ၚိဒၟံၚ် ညးဒေသတံရဂှ် ကောန်ဂကောံဒပ်ပၠန်ဂတးတံ ဟီုရ။
တုဲကၠုၚ်ပ္ဍဲဂိတုဒဳဇြေန်ဗာ သတ္တာဟလက်ကရဴအိုတ်ဂှ် ပ္ဍဲကွာန်(ကျောက်နီမော်) ပွိုၚ်ဍုၚ်လံၚ်လုၚ်ဂှ် ပေါဲဗ္တိုက်ၜါလ္ပာ် က္တဵုဒှ်လဝ်လလအ်ပွိုၚ်(၅)တ္ၚဲတုဲ အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန်တံ ချိုတ်အာလဝ် (၄၀)တၠပြၚ်တုဲ လ္ပာ်ဒပ်ပၠန်ဂတးတံလေဝ် ကောန်သ္ဂံၚ်ၜါတၠ ပြဟ်လလုဲအာလဝ်ရ။
ပရိုၚ်- သြၚ်လောန်တိုၚ်မ်
Photo – CJ