လံၚ်လုၚ်၊ ဂျာန္နဝါရဳ (၁၀)
ပ္ဍဲပေါဲဗ္တိုက်ၜါလ္ပာ် က္တဵုဒှ်လဝ် ပ္ဍဲကွာန်ကျံက်နဳမဝ်၊ ပွိုၚ်ဍုၚ်လံၚ်လုၚ်၊ ရးတၞၚ်သဳ လလအ်ပွိုၚ်(၄)တ္ၚဲဂှ် သ္ၚိဒၟံၚ် (၂၀၀)ပြၚ် ပၟတ်တူလီုလာ်လဝ်ရဂှ် ဂွံတီကေတ် နူညးဒေသတံကဵု ဂကောံဇြဟတ်ပၠန်ဂတးတံရ။
ဒပ်ပံၚ်ကောံထဝါဲ မဒှ်ဂကောံဇြဟတ်ပၠန်ဂတးဂှ် သ္ပတံနူ ဂိတုဒဳဇြေန်ဗာ စၟတ်တ္ၚဲ (၂၃) စဵုကဵုဂိတုဒဳဇြေန်ဗာ စၟတ်တ္ၚဲ(၂၆)တုဲကၠုၚ်တေံဂှ် လုပ်စိုပ်ဗ္တိုက်လဝ် ဒပ်ကံၚ်ဇြဳပၞာန် နူကွာန်ကျံက်နဳမဝ်တံကဵု ဗ္ဒပ်ဒပ်ဗျူသဝ်ထဳတံ (၄)တ္ၚဲအဆက်က်ရ။
ပ္ဍဲပေါဲဗ္တိုက်တံဂှ် ညံၚ်ဗ္ဒိုပ်ဟွံဂွံစှ်ေဂှ် ဒပ်ကံၚ်ဇြဳပၞာန်တံ ဒုၚ်ဗ္တိုက်ကၠုၚ်လဝ် နကဵုဂၠံၚ်တိ၊ ဂၠံၚ်ဍာ်၊ ဂၠံၚ်ကျာတံ ဗွဲမသ္ကာတ်မြဟ်ဂှ်ရ သ္ၚိဒၟံၚ်နူအပ္ဍဲကွာန် ကျံက်နဳမဝ်တံ ဗ္ဒါဲကဝက် ပၟတ်တူလီုလာ်အာလဝ်ရ။
ကြဴနူပေါဲဗ္တိုက်က္တဵုဒှ်တုဲ စနူဂိတုဂျာန္နဝါရဳ စၟတ်တ္ၚဲ(၇)ဂှ်တုဲ အခိၚ်ညးဒေသတံ စဴကျောဝ်သ္ၚိဒၟံၚ်တံဂှ် ဂွံဆဵုကေတ် သ္ၚိဒၟံၚ်ပၟတ်တူလီုလာ်တံ ဗွဲမဂၠိုၚ်တုဲ အတိုၚ်ညးဒေသတံချိၚ်ခယျလဝ်ဂှ်မ္ဂး သ္ၚိဒၟံၚ် ဗ္ဒါဲ ၂၅၀ ပၟတ်တူလီုလာ်အာလဝ်ရဂှ် သ္ဂးရ။
သ္ၚိဒၟံၚ်ဗွဲမဂၠိုၚ် ပၟတ်တူလီုလာ်အာတံဂှ်တှ်ေ ဟိုတ်နူဒပ်ကံၚ်ဇြဳပၞာန်တံ ဂြာတ်မခတိုဟ်ကဵုတရဴကျာတံ၊ နူကဵုက္ၜၚ်ပၞာန်ဒပ်ဍာ်တံ ပန်ပှော်လွဟ်ဇၞော်တံ၊ ဟိုတ်နူ ကရောၚ်ပၞာန်ပၞာန်ရီုကံၚ်ဇြဳပၞာန်တံ စံၚ်ပလီုပလာ်လဝ်တံရဂှ် ညးဒေသတံ ဟီုကဵုသြၚ်လောန်တိုၚ်မ်ရ။
အတိုၚ်လဟီုညးဒေသတံဂှ်မ္ဂး ကွာန်ကျံက်နဳမဝ်ဂှ် သ္ၚိဒၟံၚ်မၞုံဒၟံၚ် (၅၀၀)ပြၚ်တုဲ ပ္ဍဲပေါဲဗ္တိုက်ဂှ် ဟိုတ်နူသ္ၚိဒၟံၚ်တံ ပၟတ်တူလီုလာ်အာ ဗ္ဒါဲ ၂၅၀ ဂှ်ရ သ္ၚိပ္ဍဲကွာန် ဗ္ဒါဲကဝက် ဒးဂဗလဝ်ကဵုဘဲပၞာန်တံရ။
ပြဟ်ဟ်ဏံဂှ်တှ်ေ ညးဒေသပါဲဒၟံၚ်ဘဲပၞာန်တံဂှ် ဟိုတ်နူသ္ၚိတူလီုလာ်အာလဝ်ဂှ်ရ ဒှ်ဒၟံၚ်အခက်ခုဲကဵုဒၞါဲမံၚ်တုဲ ညးပါဲဓလေတ်ဘဲပၞာန်ဗွဲမဂၠိုၚ်တံလေဝ် ဟွံဂံၚ်စဴဌာန်ဒၟံၚ်တံဏီရ။
ကွာန်ကျံက်နဳမဝ်ဂှ် ဂယိုၚ်ဒၟံၚ်လမျီုကဵု ကမၠောန်တမ္ၚာတံတုဲ သီုကဵုဒှ်ကွာန် ပလံၚ်ပ္တိုန်ကပေါတ်တိတ်နူဍာ်အဓိက ဒေသထဝါဲမွဲရ။
ပ္ဍဲပေါဲဗ္တိုက် ကျံက်နဳမဝ်ဂှ် လ္ပာ်ကံၚ်ဇြဳပၞာန်တံဂှ် သ္ကိုပ်တမ်ဒပ်မပါလုပ် (၄၀)တၠပြၚ်ချိုတ်တုဲ လ္ပာ်ဂကောံဒပ်ပၠန်ဂတးတံဂှ် ကောန်သ္ဂံၚ်ၜါတၠ ပြဟ်လလုဲအာလဝ်ရဂှ် ဒပ်ပံၚ်ကောံထဝါဲတံ လလောၚ်ပ္တိတ်လဝ်ပရိုၚ်ရ။
ပရိုၚ်-သြၚ်လောန်တိုၚ်မ်
ဗီု − ဒပ်ပံၚ်ကောံခရိုၚ်ထဝါဲ