နေဗျဳဒဝ်၊ ဂျာန္နဝါရဳ (၁၀)
နူကဵုဒပ်ပၞာန်သီအဝဵုဂှ် အလုံမွဲကၟိန်ဍုၚ်ဂှ် ပေါဲဗ္တိုက်တံ က္တဵုဒှ်ဒၟံၚ်တုဲ အခိၚ်ဒးဗလးဒၟံၚ်တဲ ဍုၚ်ဗွဲမဂၠိုၚ်ဂှ် လၟေၚ်တရဴအပ္ဍဲဍုၚ်တံဂှ် အာကၠုၚ်ဗွဲမဂီုကၠီုဗၠးဘဲ မာန်ဒၟံၚ်ရဂှ် ကံၚ်ဇြဳပၞာန်ဟီုဂးကၠုၚ်ရ။
ပ္ဍဲကောံဓရီု ပရေၚ်တဴတက် ကမၠောန်အာရဴကၟိန်ဍုၚ် ကၠောန်ဗဒှ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ(၈)ဂှ် ဝန်ဇၞော်ပရေၚ်ဆက်စၠောံကေုာံပရေၚ်ပလံၚ်ဗစိုပ် ကံၚ်ဇြဳပၞာန် သ္ကိုပ်ဗိုလ်ဇၞော် မျထောန်ဥူ ဟီုဂးလဝ်ရ။
သ္အာၚ်နူဂှ်ပၠန် လၟေၚ်တရဴပ္ဍဲဍုၚ်တံဂှ် ဖျေံစိုတ်ဂွံတုဲ ညံၚ်ဂွံအာကၠုၚ် ဗွဲမဗၠးဘဲမာန်ဂှ် ပ္ဍဲအခိၚ်ဍန်န်ဂၠေံဂၠေံဂှ် သွက်ဂွံရေၚ်တၠုၚ်ကဵု ညံၚ်ညးအာတရဴတံ သ္ဂောံတီအကာဲအရာပကတိဍာံဍာံတံ ချိုတ်တ်ပၠိုတ်တ်မာန်ဂှ် ကဵုလဝ်တၚ်စၞောန် ကုဌာနဆေၚ်စပ်တံဏီရ။
သ္ကိုပ်ဗိုလ်ဇၞော် မျထောန်ဥူဂှ် နူကဵုပလက်ဝှမ်ဒဳဂျေတ်ဒါတံမွဲကဆံၚ် ညံၚ်ပွဳဗွိုၚ်ညးအာတရဴဂၠးတိတံ သ္ဂောံတီ ကပေါတ်ပ္တိတ်အာတရဴတၟေၚ်တံကဵု ပွရေၚ်တၠုၚ်ကၟန်ဍုၚ်ဗၟာတံမာန် သွက်ဂွံဆက်ကၠောန်သ္ပအာဂှ် ဟီုဂးလဝ်ရ။
ညံၚ်ညးအာတရဴ နူဍုၚ်သ္အာၚ်တံ သာတုဲဂွံလုပ်စိုပ်ကၠုၚ်မာန်ဂှ် ဓလိုၚ်ပ္တိုန် ပရေၚ်ဓလိုက်တမ်ရိုဟ် ပ္ဍဲကိုန်စဳမာန် ကမၠောန်ပရေၚ်အာတရဴတံ၊ ယှအ်ဖျေံကဵု ဗဳဇြာလုပ်ဍုၚ်တံ၊ ဓလိုၚ်ပ္တိုန် လၟေၚ်တရဴကျာတံ၊ မ္ၚးနူသၠုၚ်ပ္တိုန်ကဆံၚ်ဗွဝ်ဖျာ ပရေၚ်အာတရဴဂှ် ဟိုတ်နူကၠောန်သ္ပဒၟံၚ် ကမၠောန်ဆက်စပ်ကဵုပရေၚ်အာတရဴတံဂှ်ရ နကဵုကၟိန်ဍုၚ်ဗၟာဂှ်လေဝ် ညံၚ်သ္ဂောံဒှ်အထံက်အပၚ် ပရေၚ်ပိုန်ဒြပ်ကၟိန်ဍုၚ်မာန်ဂှ် သွက်ဂွံကၠောန်အာ ညံၚ်ဍုၚ်တၞဟ်ဟ်တံဂှ် ကဵုလဝ်တၚ်စၞောန်ရ။
ညးထ္ၜးဂၠံၚ် ညးအာတရဴဗွဲမဂၠိုၚ်ဂှ်တှ်ေ ၜိုန်ရကံၚ်ဇြဳပၞာန် ဟီုဒၟံၚ် အာကၠုၚ်ဗွဲမဗၠးဘဲမာန်ဒၟံၚ်ရကီုလေဝ် ဟိုတ်နူပေါဲဗ္တိုက်က္တဵုဒှ်ဒၟံၚ် အလုံမွဲကၟိန်ဍုၚ်ဂှ်ရ မ္ၚးနူလၟေၚ်တရဴ ဟွံဂီုကၠီုတံဂှ် ဟိုတ်နူပွကံၚ်ဇြဳပၞာန်တံ ရပ်ဒက်ကော်ဏာဒၟံၚ်ဟွံမွဲကဵုသၞောဝ်တံဂှ်ရ ပွလဟီုဗီုလၟုဟ်ဂှ် ဟွံစှ်ေနတဲရဂှ် ပါ်ပါဲလဝ်ရ။
သ္အာၚ်နူဂှ်ပၠန် ပ္ဍဲအရာအာတရဴအခိၚ်လၟုဟ်ဏံဂှ်လေဝ် ဟိုတ်နူကဵုအခက်ခုဲ ပရေၚ်တာဒၞါ စၟဳတ်ကံၚ်ဇြဳပၞာန်တံဂၠိုၚ်ကီု၊ ပ္ဍဲသၞေဟ်ကၚ်တံဂှ် အာတ်သြန်မွဲဆမွဲတန်တံ၊ မ္ၚးနူအမိၚ်ဒေသန္တရ တိတ်ဗ္တံဟွံဂွံတံဂှ် ဟိုတ်နူဒးတေၚ်စရၚ်ကၟုဲတံဂှ်ရ လၟေၚ်တရဴတံ ဟွံသၠဲလးရဂှ် သ္ဂးရ။
မွဲလ္ပာ်ဂှ် ကံၚ်ဇြဳပၞာန်တံ ဟီုဒၟံၚ် သွက်ရဲအာတရဴတံ သ္ဂောံလုပ်စိုပ်ကီုလေဝ် ဌာနဝန်ဇၞော်ကာဍုၚ်သ္အာၚ်အမေရိကာန်ဂှ် ကၟိန်ဍုၚ်ဗၟာမပါလုပ် ဍုၚ်အပံၚ် (၂၀)ဍုၚ်တံဂှ် ဒှ်ဍုၚ်အရံၚ်ဍာဲ အာတရဴဟွံထေက် ကဆံၚ်(၄)ရဂှ် ပ္ဍဲဂိတုဂျာန္နဝါရဳ စၟတ်တ္ၚဲ(၉)ဂှ် ထပ်ကဵုလဝ်သတိရ။
ကၟိန်ဍုၚ်အမေရိကာန်ဂှ် ပ္ဍဲအရာစၟတ်ဍုၚ်တိတ်တရဴဟွံထေက်တံဂှ် လေပ်စၟတ် နူကဵုကဆံၚ်(၁) စဵုစိုပ် ကဆံၚ်(၄)တုဲ ယဝ်ခါရ တၚ်ဘပဠ ကုအန္တရာယ်လမျီုတံနွံမ္ဂး ထ္မံက်ထ္ၜးနကဵု ကဆံၚ်(၄) နဒဒှ်ကဆံၚ်သၠုၚ်အိုတ်ရ။
ပရိုၚ်-သြၚ်လောန်တိုၚ်မ်
ဗီု− Social Media