မတ်မလီု၊ ဂျာန္နဝါရဳ (၁၀)
ပ္ဍဲတွဵုရးဍုၚ်မန်ဂှ် ပေါဲဗ္တိုက်သီဍုၚ်တံ ဟွံက္တဵုဒှ်ကၠုၚ်မွဲသာ် ယဝ်ရဆက်ဒှ်ဒၟံၚ် အကာဲအရာဏံရမ္ဂး ကံၚ်ဇြဳပၞာန်တံ ကၠောန်ဗဒှ်ကၠုၚ်ပေါဲရုဲမာဲ ဗွဲမသၠဲတြးမာန်ရောၚ်ဂှ် လိက်ဒုၚ်စဳရေၚ် ဂကောံဇြဟတ်ဖေတ်ဒရာရာမညတၟိ NRFFဂှ် သ္ၚဳဂၠိပ်လဝ်ရ။
လ္တူလဟီုကံၚ်ဇြဳပၞာန် သုၚ်စောဲအာစရၚ်လၟိဟ်မၞိဟ် နဒဒှ်စရၚ်မာဲဂှ် ပ္ဍဲပွိုၚ်ဍုၚ်မတ်မလီု၊ ၜါသွာၚ်၊ ပံၚ် နူတွဵုရးဍုၚ်မန် ကံက်ကေတ်လဝ် စရၚ်လၟိဟ်မၞိဟ် ဍိုက်က်ပေၚ်ၚ်မာန်လဝ်တံဂှ် ကၠောန်ဗဒှ်အာပေါဲရုဲမာဲ ဍိုက်က်ပေၚ်ၚ်မာန်ရောၚ်ဂှ် NRFF သ္ဂးရ။
ပ္ဍဲတွဵုရးသှ်ေဒၟံၚ်လ္ၚဵုတံဂှ်တှ်ေ နကဵုအရီုဗၚ်ဂကောံဒပ်ဂီုကၠီုတံကဵုဒှ် နကဵုသၞောတ်ကဵုမာဲ အဳလက်ထရောန်နေတ်တံကဵုဒှ် ကၠောန်သ္ပအာ စဵုကဵုသၞောတ်ဗ္ၜတ်မွဲမွဲ မာန်ရောၚ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် NRFF လလောၚ်ပ္တိတ်လဝ် ပ္ဍဲဂိတုနဝ်ဝေန်ဗာ သၞာံတုဲကၠုၚ်တေံဂှ်ရ။
အတိုၚ်စရၚ်လၟိဟ်မၞိဟ် ကံၚ်ဇြဳပၞာန်ဂှ်မ္ဂး ပ္ဍဲပွိုၚ်ဍုၚ်မတ်မလီု၊ ၜါသွာၚ်၊ မုဟ်ဍုၚ် ကေုာံ ပံၚ် မၞုံပ္ဍဲတွဵုရးဍုၚ်မန်တံဂှ် ကံက်ကေတ်လဝ်စရၚ်လၟိဟ်မၞိဟ်ဍိုက်က်ပေၚ်ၚ်မာန်လဝ်ရောၚ်ဂှ် လလောၚ်ပ္တိတ်လဝ် ပ္ဍဲဂိတုဒဳဇြေန်ဗာ စၟတ်တ္ၚဲ(၃၁) သၞာံ ၂၀၂၄ ဂှ်ရ။
ဟိုတ်နူအကာဲအရာဏံတုဲ ပ္ဍဲတွဵုရးဍုၚ်မန်ဂှ် ယဝ်ခါရကၠောန်သ္ပကၠုၚ်ပေါဲရုဲမာဲမ္ဂး ညံၚ်ညးဍုၚ်ကွာန်ကောန်အရာပ်တံကဵု ဗော်ပရေၚ်ဍုၚ်ကွာန်တံ ဟွံဂွံပါလုပ်ဂှ် ဆဝ်မ္ၚုဟ်စန်ဒက်အာ လ္ဂောံကဵုပရေၚ်ပၞာန်ရောၚ်ဂှ် က္ဍိုပ်သ္ကိုပ်ကံၚ်ဇြဳဖေတ်ဒရာဍုၚ်မန် ကဝ်မတဳ ဗ္တိုက်သရိုဟ်ပေါဲရုဲမာဲပတောံ ဒံက်တာသဳရိမန်ဆာန်ဂှ် ဟီုရ။
“သွက်ဂွံကၠောန်သ္ပအာ ပရေၚ်ကဵုလညာတ် စပ်ကဵုပေါဲရုဲမာဲပတောံတံ၊ ညံၚ်ညးဍုၚ်ကွာန်တံကဵု ဗော်ပရေၚ်ဍုၚ်ကွာန်တံ ဟွံဂွံပါလုပ် ပ္ဍဲပေါဲရုဲမာဲဂှ် သွက်ဂွံဆဝ်မ္ၚုဟ်စန်ဒက်ကဵုအာဇြဟတ်ဂရိုဟ် လ္ဂောံကဵုပရေၚ်ဍုၚ်ကွာန်တံဂှ် ဖျေံလဝ်အစဳဇန် လၟေၚ်ကမၠောန်တံ နွံဒၟံၚ်ရ။ မွဲအခိၚ်ဓဝ် ညံၚ်ဍုၚ်သ္အာၚ်တံ ဟွံဂွံသ္ပစၟတ်သမ္တီကဵု ညံၚ်ဟွံဂွံဒုၚ်တဲ ပေါဲရုဲမာဲပတောံ စကစတံဂှ် ချဳဒရာၚ်အာ သီုကဵုနဲကဲကလုတ်တမာန်တံရောၚ်” သာ်ဝွံ သ္ဂးရ။
အခိၚ်သ္ပမတ်ဇျှဟ် ဟွံဗက်စ ပွစန်ဒက်ဆဝ်မ္ၚုဟ်တံမှ ညံၚ်ဂွံဗ္တိုက်သရိုဟ်ကၠေံ ပေါဲရုဲမာဲပတောံကံၚ်ဇြဳပၞာန်မာန်ဂှ် သွက်ဂွံကေတ်အာအရေဝ် လ္ဂောံကဵုပရေၚ်ပၞာန် ဗွဲမစိုပ်တရဴမာန်ဂှ် ဖျေံလဝ်အစဳဇန်ရဂှ် ညးဆက်ဟီုရ။
NRFFဂှ်တှ်ေ ညံၚ်ဗော်ပရေၚ်ဍုၚ်ကွာန်မန်တံ ဟွံဂွံပါလုပ်ပ္ဍဲပေါဲရုဲမာဲဂှ်ကဵု လ္ဂောံကဵုပရေၚ်ပၞာန် ယဝ်ရဆီခန်ကၠုၚ်မ္ဂး ပ္ဍဲပွဳဗွိုၚ်မန်တံ ဟိုတ်နူပရေၚ်ညဳသၟဟ်တံ သာတုဲလီုကၠုၚ်မာန်ဂှ်ရ ညံၚ်ဂွံပါကၠုၚ်လ္ပာ်ဇကုဂှ် ဒးစန်ဒက်ထေက်ရဂှ် ထံက်ထ္ၜးလဝ်ရ။
သ္အာၚ်နူဂှ်ပၠန် ညံၚ်စက်ယန္တယာကံၚ်ဇြဳပၞာန်တံ ဟွံဂွံဂေတ်ဂြိပ်မာန်ဂှ် ကၠောန်သ္ပ ပရေၚ်သၞောတ်ဗ္ၜတ်တာဒၞါတံ၊ သီတိဍာ်တံ၊ ပွသိုၚ်ခၞံယန္တယာအုပ်ဓုပ်ညးဍုၚ်ကွာန် ထ္ပက်အဇာတံထေက်ရောၚ် ကဵုလဝ်ကသပ်ဂှ် ဂွံဆဵုကေတ်ရ။
ကၠောန်သ္ပဗီုဏံဂှ်တှ်ေ ထ္မံက်အာပရောၚ်ပၞာန်သၟးတုဲ ညံၚ်ညးဍုၚ်ကွာန်ကောန်အရာပ်တံ သ္ဂောံဒးဇီုကပိုက်အောန်ဂှ် ဒးပ္တိတ်ဇြဟတ်ရောၚ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ် က္ဍကျောဝ်ပေါဲရုဲမာဲ ၂၀၂၅ ဂှ်ရ။
ကံၚ်ဇြဳပၞာန် ဟိုတ်နူအကြေပ်ဂြတ်လၟုဟ်ဏံတုဲ ဒးသရိုဟ်စှ်ေဒၟံၚ်ဂှ် ဇြဟတ်ဍိုန်လျစှ်ေဒၟံၚ်ကီုလေဝ် ပ္ဍဲတွဵုရးဍုၚ်မန်ဂှ် ပရေၚ်အုပ်လဒမ်တိဍာ်တံကဵု စက်ယန္တယာတံ ဇြဟတ်ခိုဟ်ဒၟံၚ်ဖိုဟ်ရ။
ပ္ဍဲသၞာံဏံဂှ် သၠုၚ်ပ္တိန်အာအသိၚ်ပေါဲဗ္တိုက် ပ္ဍဲတွဵုရးဍုၚ်မန်တံရောၚ်ဂှ် ဂကောံဒပ်ပၠန်ဂတး ပ္ဍဲဒေသလ္ၚဵုတံ ဟီုလဝ်ကဵုသြၚ်လောန်တိုၚ်မ်ကီုလေဝ် စဵုကဵုအခိၚ်လၟုဟ်ဂှ် ပေါဲဗ္တိုက်ဇီုမုက်ဇၞော်ဇၞော် ညံၚ်ရဴကောန်ဍုၚ်အရၚ်တၞဟ်ဟ်တံ ဟွံမွဲဏီရ။
ကဝ်မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန်ဂှ်တှ်ေ သွက်ပေါဲရုဲမာဲဂှ် ညံၚ်သ္ဂောံဒှ်ဒၟံၚ်ဒတုဲဇဳဒိုဟ်ဂှ် ကၠောန်သ္ပဒၟံၚ်ရဂှ် ဥက္ကဌကဝ်မယှေန်ဂှ် ဟီုလဝ် ပ္ဍဲကောံဓရီု သဳကၠဳပ္ညဳပ္ညပ် ကၠောန်ဗဒှ်လဝ် ပ္ဍဲဂိတုဂျာန္နဝါရဳ စၟတ်တ္ၚဲ(၈)ဂှ်ရ။
သွက်စရၚ်မာဲ သ္ဂောံဍာံစၟတ်၊ သွက်ညးတၠဆန္ဒမာဲတံ သ္ဂောံကဵုမာဲမာန် ကေုာံ သွက်ဂွံစၟဳတ်သ္ပဒတန် စရၚ်လၟိဟ်မၞဟ်ဗလးတိမာန်ဂှ် အာတ်မိက်အာအရီုဗၚ် ဇရေၚ်အလဵုသဳတွဵုရးတံရောၚ်ဂှ် သ္ဂးရ။
ပေါဲရုဲမာဲဂှ်တှ်ေ ရန်လဝ် သွက်ဂွံကၠောန်ဗဒှ်အာ ပ္ဍဲတိဍာ်ဆန္ဒမာဲ (၁၆၁)ပွိုၚ်ဍုၚ်ဂှ်ရဂှ် ပ္ဍဲဂိတုဒဳဇြေန်ဗာ သတ္တာဟပထမ သၞာံတုဲကၠုၚ်တေံဂှ် လ္ပာ်ကဝ်မယှေန်တံ ဟီုသ္ဂးလဝ်ကဵု ဗော်ပရေၚ်ဍုၚ်ကွာန်တံရ။
ဣဏံဂှ် ပ္ဍဲကၟိန်ဍုၚ်ဗၟာ ပွိုၚ်ဍုၚ်အပံၚ်မၞုံဒၟံၚ် (၃၃၀)ဂှ် ဒှ်အကာဲအရာကၠောန်သ္ပမာန် ၜိုတ်(၄၉)တၟံကၠံဓဝ်ရတုဲ လ္ဂောံကဵုပရေၚ်ဂီုကၠီုတုဲ သွက်ဂွံကၠောန်သ္ပအာ နကဵုသ္ကုတ်နွံဒၟံၚ်ရဂှ် ညးသ္ၚဳဂၠိပ်ပရေၚ်ဍုၚ်ကွာန်တံဟီုရ။
ပရိုၚ်- သြၚ်လောန်တိုၚ်မ်
ဗီု− Social Media