မတ်မလီု၊ ဖေဖဝ်ဝါရဳ ၁၃
ပ္ဍဲကဵုပရေၚ်ဒက်ပ္တန်ကၟိန်ဍုၚ်ပံၚ်ကောံဖေဝ်ဒရာအနာဂတ်ဂှ် သၞောတ်ဖေဝ်ဒရာသ္ပသ္ဇိုၚ်ကဵုဗဟဵု ညံၚ်သၞောတ်ဗဟဵုထိၚ်ဒက် ဇြဟတ်ဂွံကလေၚ်ခိုဟ်ကၠုၚ်ဂှ်တှ်ေ ဒုၚ်တဲဒ္ဂေတ်ဗက်အာဟွံသေၚ်ပုဟ်ဂှ် ပ္ဍဲဂိတုဖေဖဝ်ဝါရဳ ၁၂ တေံ ဂကောံကောန်ဍုၚ်အရၚ်တံ လလောၚ်တြးလဝ်ရ။
တၞဟ်နသ္ဂောံကလေၚ်ဒက်ပ္တန်ကၟိန်ဍုၚ်ဂှ် ဂိုန်ဂ္စါန်ပ္တိတ်အာဇြဟတ် နကဵုဗီုပြၚ် စဒက်ပ္တန်ကၟိန်ဍုၚ် နူတွဵုရးဒေသတံဂှ်ဏောၚ်ဂှ် နူကဵုဂကောံ ၉ ဂကောံ ပ္ဍဲဏံဂကောံပၠန်ဂတးရပ်လွဟ်ဂမၠိုၚ် ကံၚ်ဇြဳဖေဝ်ဒရာ သ္ပစၞးတွဵုရး သ္ပစၞးဂကူတံ မပါလုပ်ဂှ် လလောၚ်ပ္တိတ်လဝ်ရ။
သၞောတ်ဗဟဵုထိၚ်ဒက်ဂှ်ဝွံ ပါဲနူသောၚ်ကလး ပြဒ္ဒညာပရေၚ်ဍုၚ်ကွာန် မတန်ကၠုၚ်ဒၟံၚ်ထပှ်စှော်သၞာံပြၚ်ဂှ် ဟွံမာန်ဂှ် သီုကဵုဖန်ဗဒှ်ဒၟံၚ် ညံၚ်ပြဒ္ဒညာတံဏံ ဂွံဇြိုဟ်နက်အာဂှ်ဝွံ ဒှ်ပကတိရောၚ် သ္ဂးရ။
သ္ဂောံထ္မံက်အာရုပ်ရဴ ပရေၚ်ဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြနတဲ ပပ္တံနူအခိၚ်ကာလပၠန်ဂတးဏံဂှ်တုဲ စချူခၞံဒၟံၚ် သၞောဝ်သ္ဇိုၚ်ကောပ်ကာဲသ္ဂောံပြံၚ်လွေဟ်ဖေဝ်ဒရေဝ် သွက်ဂွံရပ်စပ်အာ သွက်အခိၚ်ကာလအပြံၚ်အလှာဲ နဒဒှ်လိက်စံၚ်ပရေၚ်အုပ်ဓုပ် အဝဵုဍေံမၞုံ ညံၚ်ရဴသၞောဝ်သ္ဇိုၚ်ဂှ် ကဵုလဝ်သမ္တီရ။
သွက်ဂွံဒက်ပ္တန်အာကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ မဒက်ပ္တန်လဝ် နကဵုတွဵုရး မၞုံကဵုဒဳမဝ်ကရေဇြဳ မၞုံကဵုအခေါၚ်ဂကူတုပ်သၟဟ်၊ မၞုံကဵုအခေါၚ်စၞောန်ပျးအပိုၚ် မၞုံကဵုအခေါၚ်အရာပေၚ်ၚ်တံဂှ် ညးတံဝွံ ဒှ်ဂကောံပၠန်ဂတးဂမၠိုၚ် မဂိုန်ဂ္စါန်ကၠုၚ်ဒၟံၚ် ဟွံပိုတ်သ္ကုတ်ရောၚ် သ္ဂးရ။
ပံၚ်တောဲကဵု ညးဍုၚ်ကွာန်ဒစဵုဒစး ပရေၚ်ပၞာန်သီအဝဵုတံဂှ်တုဲ သွက်ဂွံဗ္တိုက်ထပိုတ်ရိုဟ်ကၞက် သၞောတ်တၠအဝဵုပၞာန်၊ သွက်ဂွံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳတံဂှ် လုပ်မံၚ်ပေါဲဗ္တိုက်အိုတ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပ္ဍဲကဵုဂကောံပၠန်ဂတးကောန်ဍုၚ်အရၚ် ပါလုပ်ပ္ဍဲတၚ်လလောၚ်တြးဂှ်တှ်ေ ဗော်တောတက်ကောန်ဂကူကရေၚ်ဍာဲ KNPP ၊ ဗော်သွးကောန်ဂကူကရေၚ် KNU ၊ ဒပ်ပၠတရဴကောန်ဂကူချေၚ် CNF ကေုာံ ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD တံ မဒှ်ရ။
သ္အာၚ်နူဂှ်ပၠန် ကံၚ်ဇြဳသ္ပစၞးတွဵုရး၊ ဂကူတံဂှ်တှ်ေ ကံၚ်ဇြဳကဵုကသပ်ရးကရေၚ်ဍာဲ KSCC ၊ ကံၚ်ဇြဳဖေဝ်ဒရာဍုၚ်မန် MSFC ၊ ကံၚ်ဇြဳဖေဝ်ဒရာကောန်ဂကူပအိုဝ် PNFC ၊ ကဝ်မတဳကဵုကသပ်ပရေၚ်ဍုၚ်ကွာန်တအာၚ် TPCC ကေုာံ ဂအုပ်ဂကောံညးဗြဴဂမၠိုၚ် (ဍုၚ်ဗၟာ) WLB တံလေဝ် ပါလုပ်ရ။
သွက်ဂွံဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳဂှ် ဒက်ပ္တန်အာနူသၟဝ်ဏံ နူတွဵုရးဒေသတံဂှ်တုဲ ထ္မံက်အာရုပ်ရဴနတဲသာ်ဏံဏောၚ်တုဲ ပံၚ်တောဲလုပ်အာပေါဲဗ္တိုက် ကုဂကောံဗော်သွး လညာတ်တုပ်စပ်ကဵုပရေၚ်ဏံတံဂှ်ဏောၚ် သၞာံတုဲကၠုၚ် ပ္ဍဲဂိတုသေပ်တေမ်ဗာ ၁၉ တေံ လလောၚ်တြးလဝ် လစွံစိုတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media