ဗြဝတဳ၊ ဖေဖဝ်ဝါရဳ ၁၃
လ္ပာ်ကံၚ်ဇြဳပၞာန် ၜိုတ်ကၟာတ်လဒဵုလဝ် အခေါၚ်ဖ္ဍိုက်ဏာနၚ် ကၠေၚ်စက် ပ္ဍဲပွိုၚ်ဍုၚ်မြဝတဳဂှ်ကီုလေဝ် ပ္ဍဲဍုၚ်ယှိုဲကုက္ကိုဝ် သ္ဂောံဂွံကၠေၚ်စက်ဂှ် ဂကောံဒပ်မၚ်ပယျဵုကရေၚ် BGF တံ အာစိုပ်စဵုကဵုပွိုၚ်ဍုၚ်ဘာအၚ်ကဵု ပွိုၚ်ဍုၚ်လိုၚ်ဗၠဲတံတုဲ ဒးရာန်ကေတ်ဒၟံၚ်ကၠေၚ်စက်တံဂှ်ရောၚ် ညးဒေသယှိုဲကုက္ကိုဝ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဖေဖဝ်ဝါရဳ ၅ ဂှ်တုဲ အလဵုအသဳသေံ စွံကၠုၚ်ပွန် ကုကမၠောန်လီဠာန်သြန်လပှ်ကျာ ကျာဖျဂှ်တုဲ ထပိုတ်လဝ်ပၟတ်ဓာတ်လလဳကဵု ကၠေၚ်စၞပၟတ် မပါ်ပရအ် သွံတြးကဵုဒၟံၚ် လ္ပာ်ဍုၚ်ဗၟာတံဂှ်တုဲ လ္ပာ်ဍုၚ်မြဝတဳ၊ ဍုၚ်ယှိုဲကုက္ကိုဝ်တံဂှ် ရာန်ကၠုၚ်ကၠေၚ်စက်တံ ဝါတ်ကၠုၚ်ဒၟံၚ်တုဲ ၚုဟ်ဂှ်လေဝ် ဒးကဵုဒၟံၚ်ဂၠိုၚ်ကဵုဆရ။
သ္ဂောံရာန်ကၠေၚ်စက် လ္တူဍုၚ်ဗြဝတဳဂွံဂှ် ဒးအာစိုပ်ရေၚ်တာန်ဒၟံၚ် ပ္ဍဲဆေၚ်ကၠေၚ်တံ အခိၚ်ဗွဲမလအ်လတုဲ ဒးရပ်စပ်ဒၟံၚ် နကဵုသၞောတ်ဗ္ၜတ်ဂှ်ရ ညးဒေသဂမၠိုၚ်ဝွံ ကၠောံကၠုၚ်လ္ပာ်ဍုၚ်မာဲချံက် ဍုၚ်သေံတုဲ ဒးအာစိုပ်ရာန်ဒၟံၚ် ကၠေၚ်စက်ရ။
ဟိုတ်နူဍုၚ်သေံ ထပိုတ်ထောံလဝ်ကၠေၚ်ဂှ်တုဲ အပ္ဍဲဍုၚ်ယှိုဲကုက္ကိုဝ် ဒၞါဲကမၠောန်ကျာဖျတံနွံဂှ်လေဝ် အကြာတံဏံ ကၠေၚ်စက်ပိုတ်ကၠုၚ်ဒၟံၚ်တုဲ ဂွံဂွံကၠေၚ်စက်ဂှ် ဒပ်မၚ်ပယျဵုကရေၚ် BGF အာစိုပ် အပ္ဍဲပွိုၚ်ဍုၚ်လိုၚ်ဗၠဲ ဘာအၚ်တံဂှ်တုဲ ဗီုဂွံမာန်တံဂှ် ဒးရာန်ပကောံဒၟံၚ် ကၠေၚ်စက်တံဂှ်ရောၚ် ညးဒေသတံ သ္ဂးရ။
ပ္ဍဲကဵုဆေၚ်ကၠေၚ်စက် နွံပ္ဍဲပွိုၚ်ဍုၚ်ဘာအၚ်၊ လိုၚ်ဗၠဲတံဂှ် ဒပ် BGF အာစိုပ်ရာန်ကေတ်ဒၟံၚ် နကဵုကွဳစက်ဂမၠိုၚ်တုဲ ကေတ်ဖျဴနၚ် ပ္ဍဲဍုၚ်ယှိုဲကုက္ကိုဝ်တုဲ ကလေၚ်သွံတြးဒၟံၚ်ရောၚ် တမ်ရိုဟ်ပရိုၚ်ဒေသတံ သ္ဂးအိုတ်ရ။
ဟိုတ်နူပရေၚ်ပရူကၠေၚ်စက် ပ္ဍဲပယျဵုမြဝတဳဂှ်တုဲ လ္တူဍုၚ်ဘာအၚ်ဂှ်လေဝ် ဒးရာန်ကေတ်ဒၟံၚ် ကၠေၚ်စက်တံ နကဵုသၞောတ်ဗ္ၜတ်ဂှ် ညးဒေသတံ ဟီုရ။
ပ္ဍဲဍုၚ်မြဝတဳကဵု ဍုၚ်ယှိုဲကုက္ကိုဝ် အခိၚ်ဒးဂဗဒၟံၚ်ကဵုအခက်အခုဲ ပရေၚ်ကၠေၚ်စက်ဂှ် ပ္ဍဲကဵုသၞေဟ်ကၚ်စၟဳတ် လုပ်တိတ်ဍုၚ်ဘာအၚ်ဂှ်ကဵု ပ္ဍဲသၞေဟ်ကၚ်စၟဳတ် နွံပ္ဍဲဂၠံၚ် ဘာအၚ်−လိုၚ်ဗၠဲ−ကအ်ကြိက်၊ ဂၠံၚ်ဘာအၚ်−ကြုၚ်ဒဵု−ကအ်ကြိက်တံဂှ် ကံၚ်ဇြဳပၞာန် တာဒၞါစၟဳတ်ကၠုၚ် ယာန်ကောန်အရာပ် မဖ္ဍိုက်နၚ်ကၠေၚ်စက်တံဂှ်တုဲ သီဂိုၚ်ဒၟံၚ် စေဝ်ကၠေၚ်စက်တံဂှ်ရ။
လ္ပာ်ကံၚ်ဇြဳပၞာန် ၜိုန်ရရပ်သီကေတ်လဝ် စေဝ်ကၠေၚ်စက်ကောန်ရာပ်တံ မဖ္ဍိုက်ပ္တိုန်နၚ် နူကဵုယာန်ဖ္ဍိုက်ဗၞိက်၊ ကွဳစက်အာတရဴ၊ ကွဳစက်သ္ၚိတံဂှ်ကီုလေဝ် ဂကောံ BGF DKBA တံ ယဝ်ဖ္ဍိုက်နၚ်ကၠေၚ်စက်တံဂှ်မ္ဂး ရပ်သီကေတ်လဝ်တံဟွံမွဲတုဲ ကဵုလဝ်အခေါၚ်ဖ္ဍိုက်ကၠေၚ်စက်တံရ။
ပရိုၚ်−သြၚ်လောန်တိုၚ်(မ်)
ဗီု−CJ