နေဗျဳဒဝ်၊ ဖေဖဝ်ဝါရဳ ၁၃
ဟိုတ်နူပဋိပက္ခရပ်လွဟ်တုဲ ညးပါဲဒဴဘဲပၞာန် မ္ဒးထောံလသာဌာန်ဒၟံၚ် ဗွဲယာယဳတံဂှ် နကဵုကံၚ်ဇြဳပၞာန် ထံက်ပၚ်ကဵုအာ မၞိဟ်မွဲ မွဲဂိတု သြန်ၜါဠက်ဒ္ကေဝ်ဏောၚ် စပ်ကဵုအစဳဇန်ဏံတုဲ ဓဝ်ပတှ်ေဟွံမွဲပုဟ်ဂှ် ညးပါဲဒဴဘဲပၞာန်ဂမၠိုၚ် ဟီုကၠုၚ်ရ။
က္ဍိုပ်သ္ကိုပ်ပၞာန်သီအဝဵု သ္ကိုပ်ပၞာန်ဇၞော် မေန်အံၚ်လှာၚ်ဂှ်တှ်ေ ထံက်ပၚ်ကဵုအာသြန်ဂိတု ကုညးဍုၚ်ကွာန်ပါဲဒဴဘဲပၞာန်တံဏောၚ် ပ္ဍဲဂိတုဖေဖဝ်ဝါရဳတေံ အခိၚ်ဆဵုဂဗကဵု သ္ကိုပ်ဝန်ဇၞော် ရးဒေသ ကေုာံ တွဵုရးဂမၠိုၚ် ပ္ဍဲနေဗျဳဒဝ်ဂှ် ဟီုလဝ်ရ။
သြန်ထံက်ပၚ်ဏံဂှ် ပ္ဍဲသၞာံ ၂၀၂၅ နူဂိတုဂျာန္နဝါရဳ စဵုဂိတုဒဳဇြေမ်ဗာ လၟေၚ်ဂိတု ထံက်ပၚ်ကဵုအာဏောၚ်တုဲ သြန်ဗွဝ်ဂှ်တှ်ေ သွက်ဂွံရပ်စပ်အာ နူကဵုသြန်ဗွဝ်ကောပ်ကာဲဘဲသဘာဝတံဂှ် လ္ပာ်ကံၚ်ဇြဳပၞာန် ဖန်ဇန်လဝ်ရ။
ညးပါဲဒဴဘဲပၞာန်မွဲတၠဂှ်တှ်ေ စပ်ကဵုအစဳဇန်ကံၚ်ဇြဳပၞာန် ကဵုသြန်ထံက်ပၚ်ဂှ်တုဲ ဓဝ်ပတှ်ေဟွံမွဲပုဟ်တုဲ ဂွံဒုၚ်တဲလေဝ် ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒှ်မာန်ညိဟာ။ ဒၞါဲရဲပါဲဒဴဘဲပၞာန်တံနွံဂှ် ဍေံတံ ကၠုၚ်ဂွံညိဟာ။ ဍေံတံကၠုၚ်ဗက် ပိုယ်ရဲပါဲဘဲပၞာန်တံ ဒးဂြိပ်ဟဂှ်ရဏောၚ်။ ဍေံတံဂှ် ၜိုတ်ညာတ်ဂှ် ဒှ်ရဲဗက်ဂစိုတ်ဒၟံၚ် ဒှ်ရဲစိုတ်ဓာတ်မၞိဟ်ဟွံမွဲတံဏောၚ်ဟီုတှ်ေ အရေဝ်မိက်ဂွံရီုဗၚ် ညးပါဲဘဲပၞာန်တံဏံဂှ် ၜိုတ်ညးလဴပုံရဏောၚ်။ ပတှ်ေလေဝ် ဟွံပတှ်ေပုဟ်။ ဒုၚ်တဲလေဝ် ဟွံမာန်ပုဟ်” သာ်ဝွံ ဟီုရ။
က္ဍိုပ်သ္ကိုပ်ပၞာန်ဂှ်တှ်ေ ပ္ဍဲအရာကဵုသြန်ထံက်ပၚ်တံဂှ် ဗက်ကဵုဒေသတုဲ ညံၚ်ညးပါဲဒဴဘဲပၞာန်တံသီုဖအိုတ် ဂွံပါလုပ်၊ ညံၚ်ညးသှ်ေသၟေဟ်အာတံ ဟွံဂွံမွဲ၊ သွက်ဂွံထံက်ပၚ်ကဵု ဗွဲမစှ်ေကဵုသၞောတ် ဗွဲမစိုပ်တရဴမာန်ဂှ် သွက်ဂွံဘိုၚ်ရေၚ်တၠုၚ်ကဵုဂှ် စၞောန်ပ္ညုၚ်လဝ်ရ။
ညးမရီုဗၚ်ဒၟံၚ် ပရေၚ်ပါဲဒဴဘဲပၞာန်မွဲတၠဂှ်လေဝ် လ္ပာ်ကံၚ်ဇြဳပၞာန် ၜိုန်ရကၠုၚ်ကီုလေဝ် ညးဍုၚ်ကွာန်ဒေသတံ ဒးဂြိပ်ဒၟံၚ်ဂှ်ရ ကဵုသြန်ထံက်ပၚ်ဟီုဂှ် ဒှ်ဟွံမာန်တုဲ ပြဝဏံဝွံ ထ္ၜးစကဵုဍုၚ်သ္အာၚ်တံတုဲ သွက်ဂွံကေတ်ယၟုဏောၚ်ဂှ် ပါ်ပါဲလဝ်ရ။
“ထံက်ပၚ်ကဵုသြန်ဏောၚ်ဟီုဂှ် ဒှ်ဟွံမာန်လးလးရ။ ဍေံတံကၠုၚ်ညိကီုဂှ် ဒးဂြိပ်ဒၟံၚ်ယျ။ သီုစံၚ် သီုဂစိုတ်ဂှ် ဍေံတံကၠုၚ်ဗက် ဒးဂြိပ်ရဏောၚ်။ နကဵုဍေံတံဂှ် ဒှ်ဟွံမာန်ပုဟ်။ ဍေံတံဂှ်တှ်ေ ထံက်ပၚ်ကဵုဒၟံၚ်သာ်ဏံဂးတုဲ မိက်ဂွံထ္ၜးပျး ကုဍုၚ်သ္အာၚ်တံတုဲ မိက်ဂွံကေတ်ယၟုရဏောၚ်။ ဍာံဍာံဂှ်တှ်ေ သြန်ၜါဠက်ဒ္ကေဝ်ဏံဟီုဂှ်လေဝ် ယဝ်ကဵုဍာံဍာံတှ်ေလေဝ် ဟွံပြေပြံၚ်ပုဟ်။ ကဵုၚုဟ်ဗၞိက်အခိၚ်အခါဏံဂှ် မုပဟွံဂွံပုဟ်” သာ်ဝွံ သ္ဂးရ။
ဂကောံ ISP-Myanmar ဂှ်တှ်ေ အလုံဍုၚ်ဗၟာမွဲ လၟိဟ်ညးပါဲဒဴဘဲပၞာန် နွံကၠုၚ်ဒၟံၚ် ၆ ဒဿမ ၆ ပြကောဋိကိုဋ်ယျ ပ္ဍဲကၞောတ်သၞာံတုဲကၠုၚ်တေံ လလောၚ်ပ္တိတ်လဝ် လိက်ဒုၚ်စဳရေၚ်ရ။
အတိုၚ်လိက်ဒုၚ်စဳရေၚ်ဏံဂှ်မ္ဂး ရးသက်ကိုၚ်ဝွံ ညးပါဲဒဴဘဲပၞာန် နွံဒၟံၚ် ၂ ဒဿမ ၈ ပြကောဋိကိုဋ် ဒှ်ဂၠိုၚ်အိုတ်တုဲ တွဵုရးကရေၚ်ဍာဲဂှ်တှ်ေ ဍံၚ်ဗက်ဒၟံၚ်ဒၞါဲဒုတိယဂၠိုၚ်အိုတ် ညးပါဲဒဴဘဲပၞာန် နွံဒၟံၚ် ၈ ကိုဋ်ပြၚ်ဂှ် ထ္မံက်ထ္ၜးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI