ကျာ်ထဝ်၊ ဖေဖဝ်ဝါရဳ ၁၄
တွဵုရးဍုၚ်မန် ပွိုၚ်ဍုၚ်ကျာ်ထဝ် ပ္ဍဲဗ္ဒါဲကွာန်ပုၚ်နေဝ်ကုန် ကြပ်ဒၞါဲဂကောံပၠန်ဂတးဒေသတံနွံဂှ် တ္ၚဲဏံ ဂိတုဖေဖဝ်ဝါရဳ ၁၃ အခိၚ်နူဂယးဂှ် ဒးဒုၚ်ဗ္တိုက်ကဵုပၞာန်ကျာတုဲ မၞိဟ်ဇီုကပိုက်ကလိဂွံအာဝပ်တံ နွံဂှ် ကောန်သ္ဂံၚ်ဗလးတိတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တ္ၚဲဏံ အခိၚ်နူဂယး ၁၀ နာဍဳ ၜိုတ် ၃၀ မိနေတ်ဂှ် လ္ပာ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုက္ၜၚ်ကျာ ဂျက်ဖိုက်တာ မွဲဖ္ဍိုက်ဂှ် သ္ဂးရ။
မခတိုဟ် ဒတုံဗ္တိုဟ်ထ္ကးအာလဝ် မ္ၚးကွာန်ဂှ်တုဲ ကောန်သ္ဂံၚ်နွံဒၟံၚ်ဒၞါဲဂှ် လ္ၚဵုတံ ဒးအာကဝေက်မခတိုဟ်တုဲ ဇီုကပိုက်ချိုတ် ကလိဂွံဝပ်တံဂှ် ကောန်သ္ဂံၚ်ဗၠာဲသၟိၚ်မွဲတၠ ဟီုရ။
အပ္ဍဲကဵုပရေၚ်ဒပ်ပၞာန်ဗၟာ ပန်ပှော်ကၠုၚ်ကဵုပၞာန်ကျာဂှ် ကောန်ဒပ်ပၠန်ဂတး ၂ တၠ ပြဟ်လလုဲအာတုဲ ၅ တၠ ကလိဂွံလဝ်ဝပ်ရောၚ် သ္ဂးရ။
ဒၞါဲဂကောံပၠန်ဂတး ချဳဒရာၚ်အာကၠုၚ်ဒၟံၚ်ဂှ် ပရိုၚ်မံက်အာတုဲ လ္ပာ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် နကဵုပၞာန်ကျာ ဒှ်မာန်ရောၚ် ဂွံတီကေတ်ရ။
ဟိုတ်နူပရေၚ်ထောံမခတိုဟ်ဗ္တိုက်ကၠုၚ်သာ်ဏံဂှ်တုဲ နူအပ္ဍဲကွာန်ပုၚ်နေဝ်ကုန်ဂှ် ညးဒေသ ၂၀၀ ပြၚ် ဒးပါဲဒလေတ်ဂြိပ်ဒဴဒၟံၚ် အလုံကွာန်မွဲရ။
အပ္ဍဲပွိုၚ်ဍုၚ်ကျာ်ထဝ်ဂှ် လ္ပာ်ကံၚ်ဇြဳပၞာန် ထောံမခတိုဟ် ဗ္တိုက်ကၠုၚ်ဒၟံၚ် နကဵုပၞာန်ကျာဂှ် အလန်ဏံ ဒှ်အလန်ကၠာအိုတ်ရဂှ် သ္ဂးရ။
တုဲကၠုၚ် ပ္ဍဲဂိတုဖေဖဝ်ဝါရဳ ၇ တေံဂှ်လေဝ် နကဵုက္ၜၚ်ကျာ Y12 ဂှ် ဒပ်ပၞာန်ထောံလဝ်မခတိုဟ် ပ္ဍဲပွိုၚ်ဍုၚ်ၜဳကလေၚ် ကွာန်နာတ်ကျဳကဵု ကွာန်အသူချံၚ်ဂှ်တုဲ သီုဘာဗ္တောန်လိက် သီုသ္ၚိဌာန်တံ လီုလာ်အာလဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media