မတ်မလီု၊ ဖေဖဝ်ဝါရဳ ၁၄
ကောန်ညးဍုၚ်ကွာန် ဌာန်ဒေသရးတံ ဂွံတန်တဴဂယိုၚ်အာလမျီု အကြာပ္ၚံက်ပေါဲဗ္တိုက် ပရေၚ်ဍုၚ်ကွာန် ပရေၚ်ပၞာန်အပ္ဍဲဍုၚ် တ္ၚဲဏံမာန်ဂှ် ဂွံမၚ်မွဲစဵုဒၞါ ပရေၚ်ဂီုကၠီုညးဒေသတံဂှ် ကိစ္စဇၞော်မံၚ်ရောၚ် ဗော်ဍုၚ်မန်တၟိ ဟီုရ။
ကမ္မတဳကေၚ်ကာဗဟဵု ဗော်ဍုၚ်မန်တၟိ NMSP လလောၚ်ပ္တိတ်ကၠုၚ်လဝ် တၚ်လလောၚ်တြး နကဵုဘာသာမန် ပ္ဍဲကဵုတ္ၚဲကောန်ဂကူမန် မရနုက်နကဵု ၇၈ ဝါ ပ္ဍဲဂိတုဖေဖဝ်ဝါရဳ ၁၃ ဏံရ။
ပရေၚ်ညဳသၟဟ် ပ္ဍဲဂကူမန်လေဝ် ပၟိက်ဇၞော်တုဲ ဂွံဇိၚ်တပ်ပကောံပကေဝ် လညာတ်လစွံစိုတ် ပရေၚ်ဍုၚ်ကွာန်၊ ပရေၚ်ဂကူတုဲ ဒးပညဳပညပ် ပ္ဍဲကောံဓရီုဇၞော်ပရေၚ်ဂကူမန်ထေက်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
နကဵုဗော်ဍုၚ်မန်တၟိ သ္ၚဳဂၠိပ်စၚ်ခြၚ်မံၚ် ပရေၚ်ပြံၚ်လှာဲလၟိုန်တုဲ ပ္တဝ်က္ဍိုပ်ကဵုအခေါၚ်အရာကံကုသဵုဇကု ဇကုညံၚ်ဂွံဖန်ဖက်ကေတ်မာန်တုဲ ဆက်လုပ်အာမံၚ်ပေါဲဗ္တိုက် နဲကဲဇဳဒိုဟ်ရောၚ် သ္ဂးရ။
တိုၚ်ပ္ကဴပၟိက်ဆန္ဒဂကူမန် ဒက်ပ္တန်ဍုၚ်မန် မဍိုက်ပေၚ်တဴကဵု အခေါၚ်အရာတမ်မူလ၊ မပါလုပ်ပ္ဍဲကၟိန်ဍုၚ်ပံၚ်ကောံဇေတ်တ်မာန်ဂှ် ပံၚ်တောဲကဵု ဂကောံရပ်လွဟ်ပၠန်ဂတးဂမၠိုၚ်၊ ဗော်ပရေၚ်ဍုၚ်ကွာန်ဂမၠိုၚ်၊ ဂကောံဒဳမဝ်ကရေဇြဳဂမၠိုၚ်တုဲ သ္ဂောံပ္တိတ်လွဳရုန်ဂစာန်အာဂှ် ဆဝ်မ္ၚုဟ်လဝ်ရ။
အပ္ဍဲပ္ၚံက်ပြံၚ်လှာဲပရေၚ်ဍုၚ်ကွာန် မကတဵုဒှ်ဒၟံၚ်ပ္ဍဲဍုၚ်ကီု၊ လစွံစိုတ် ဍုၚ်ဇိုၚ်ဝုတ်ဒိုဟ်ကီုတအ်ဂှ် လ္ၚတ်သ္ၚဳဂၠိပ်ခါတ်အကာဲတုဲ ပြဒ္ဒညာပရေၚ်ဍုၚ်ကွာန် ဂွံသောၚ်ကလးအာ နနဲပရေၚ်ဍုၚ်ကွာန်မာန် ဗော်ဍုၚ်မန်တၟိ ဒေါအ်လဝ်ပန်ပှော်ကု အလဵုအသဳပၞာန်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပၞာန်သီအဝဵု သၞာံ ၂၀၂၁ တုဲဂှ် ပေါဲသဳကၠဳပရေၚ်ဍုၚ်ကွာန်လေဝ် ဒေါအ်ဒေၚ်အာတုဲ ပေါဲဗ္တိုက်ကံၚ်ဇြဳပၞာန်ကဵု ဂကောံဒစဵုဒစးကံၚ်ဇြဳပၞာန်ဂမၠိုၚ် အသိၚ်သ္ကာတ်မြဟ်တိုန်မံၚ်တုဲ စက်ယန်ပရေၚ်အုပ်ဓုပ်၊ အုပ်လဒံသၞောဝ် ဆုတ်ယောၚ်လီုလာ်တုဲ ညးဍုၚ်ကွာန်တအ် ပရေၚ်ဂီုကၠီုအောန်စှ်ေ ဒးဂြိပ်ဒဴဒဒိုက်ဘဲပၞာန် ဇၞော်ကဵုဇြဟတ်ဂှ် သ္ဂးရ။
ဒပ်ကံၚ်ဇြဳပၞာန် လလောၚ်ပ္တိတ်လဝ် သွက်ဂွံကၠောန်ပေါဲရုဲမာဲ သၞာံ ၂၀၂၅ ဏံကီု၊ သီုလလောၚ်ပ္တိတ် သၞောဝ်ဥပဒေ (မၞိဟ်တြုံ/မၞိဟ်ဗြဴ) ဒးလုပ်ယိုက်လျိုၚ်ပၞာန်ကီုတုဲ မိမညးဍုၚ်ကွာန်တအ် ဒှ်ဓဝိၚ် ဂွိၚ်ကုပေါဲပၞာန်ပ္ဍဲဍုၚ် ဆက်တုဲဂၠိၚ်သ္ၚောဲအာမံၚ်ဏီဂှ်လေဝ် နွံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဥက္ကဌဗော်ဍုၚ်မန်တၟိ နာဲဟံသာဂှ်တှ်ေ ကောန်ဂကူမန်ပိုယ် စိုတ်ဓာတ်ဆာန်ဂကူနွံ၊ တီတာလျိုၚ်ဂကူမ္ဂး ညးညးအဲအဲ ဒးလုပ်ကၠောန် ဒးထံက်ပၚ်ဗပေၚ်ဇြဟတ် ကုအပ္ဍဲပရေၚ်ကမၠောန် ဗၠးၜးဂကူပိုယ်ရောၚ်ဂှ် ဟီုကၠုၚ်လဝ် ပ္ဍဲကဵုလိက်သဝဏ် တ္ၚဲကောန်ဂကူမန် မပလံၚ်ဗစိုပ်လဝ်ဂှ်ရ။
ဟိုတ်ဂှ်ရ ဂကူမန်တံ ညံၚ်ဂွံညဳသာကၠောံဍ၊ ညးဍုၚ်ကွာန်ဂကူမန်တအ် ထံက်ပၚ်ရီုဗၚ် ပရေၚ်ဂကူဇကုတုဲ ညံၚ်သ္ဂောံစိုပ်တိုၚ်ပ္ကဴမာန် သီုပံၚ်တောဲ ကုမဟာမိတ်တအ်တုဲ ဂစာန်ကၠောန်အိုတ်ညိဂှ် ဗွဲမရှ်ေသှ်ေရဴဂဴ ဖ္တိုက်ဖ္အောဝ်ဏာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ