မတ်မလီု၊ ဖေဖဝ်ဝါရဳ ၁၆
ပ္ဍဲဍုၚ်ဗၟာ ကြဴနူဒပ်ပၞာန်သီအဝဵုတုဲ ဟိုတ်နူပရေၚ်ပကီုပရာပ် မက္တဵုဒှ်ကၠုၚ်တံဂှ်တုဲ သ္ဇိုၚ်ဝန်ပရေၚ်ထတ်ယုက် ၁၃၆ တၠ ချိုတ်အာတုဲ ဗ္ဒါဲ ၈၄၀ တၠ ဒးဒုၚ်ရပ်ဒက်လဝ်ရောၚ် Relieweb မကေတ်ဒၟံၚ်တၚ်နၚ် အကာဲအရာစပ်ကဵုပရေၚ်ဗ္စာရဏာမၞိဟ် အလုံဂၠးမွဲဂှ် လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ ၁၄ တေံရ။
နူပၞာန်သီအဝဵု သၞာံ ၂၀၂၁ ဂိတုဖေဖဝ်ဝါရဳ စဵုကဵုသၞာံ ၂၀၂၄ ဂိတုဒဳဇြေမ်ဗာ ၂၂ ဂှ် ပ္ဍဲဍုၚ်ဗၟာ စပ်ကဵုကမၠောန်မၚ်မွဲပရေၚ်ထတ်ယုက်တံတုဲ ပရေၚ်ပကီုပရာပ် နွံလဝ် ဗ္ဒါဲ ၁၆၀၀ တုဲ စမြိုၚ်ပရေၚ်ထတ်ယုက် ဗ္ဒါဲ ၃၅၀ လီုလာ်အာလဝ်ရောၚ် သ္ဂးရ။
စနူသၞာံ ၂၀၂၃ တုဲ ပ္ဍဲရးသက်ကိုၚ်ဂှ် ပ္ဍဲကဵုပေါဲဗ္တိုက်ဂမၠိုၚ် မက္တဵုဒှ်လဝ် အကြာဒပ်ပၠန်ဂတးတံကဵု ဒပ်ကံၚ်ဇြဳပၞာန်တံဂှ် ရပ်စပ်ကၠုၚ် လွဟ်ဗ္တိုဟ်ထ္ကးလေပ် မဇီုကပိုက်ကဵု လ္တူပရေၚ်မၚ်မွဲရံၚ်စံၚ်ပရေၚ်ထတ်ယုက်တံ ဂၠိုၚ်တိုန်ကၠုၚ်ဂှ် ထ္မံက်ထ္ၜးလဝ်ရ။
သ္အာၚ်နူဂှ်ပၠန် စနူသၞာံ ၂၀၂၄ ဂိတုဂျာန္နဝါရဳတုဲ ဟိုတ်နူကံၚ်ဇြဳပၞာန် ဗ္တိုက်ထောံမခတိုဟ် နကဵုပၞာန်ကျာတုဲ ပ္ဍဲတွဵုရးရခေၚ် ခရိုၚ် (မြောက်ဦး၊ စစ်တွေ၊ သဲတွဲ) တံဂှ်လေဝ် စမြိုၚ်ပရေၚ်ထတ်ယုက် ၁၅ မ လီုလာ်အာလဝ်ရောၚ် သ္ဂးရ။
အတိုၚ်တၚ်နၚ် အလဵုအသဳညဳသၟဟ်ဂကူ NUG ဂှ်မ္ဂး ကြဴနူဒပ်ပၞာန်သီအဝဵုတုဲ ဟိုတ်နူပြဝကံၚ်ဇြဳပၞာန်တံကဵု ဂကောံသၟဝ်တဲဂမၠိုၚ်တုဲ ပ္ဍဲကဵုကဏ္ဍပရေၚ်ထတ်ယုက်ကဵု ပရေၚ်ပညာတံဂှ် အပံၚ်လၟိဟ်မၞိဟ် ဗ္ဒါဲ ၄၀၀ ဒးချိုတ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media