မတ်မလီု၊ ဖေဖဝ်ဝါရဳ ၁၆
ဟိုတ်နူပေါဲဗ္တိုက် အပ္ဍဲတွဵုရးဍုၚ်မန်တုဲ ညးပါဲဒဴဘဲပၞာန် မ္ဒးထောံလသာဌာန်ဒၟံၚ်တံဂှ် သွက်ညးတံဂှ် ထံက်ပၚ်ကဵုလဝ်သြန် မွဲတၠ ၜါဠက်ဒ္ကေဝ်ရောၚ် လ္ပာ်ကံၚ်ဇြဳပၞာန် တြးကၠုၚ်ဝါဒရ။
ပ္ဍဲဂိတုဖေဖဝ်ဝါရဳ ၁၄ တေံ နူကဵုဂကောံသ္ကိုပ်ဝန်ဇၞော်တွဵုရး ဥူအံၚ်ကျဳတုၚ် အာက္ဍိုပ်တုဲ ထံက်ပၚ်လဝ်သြန် ကုညးပါဲဒဴဘဲပၞာန်ဂမၠိုၚ် ပ္ဍဲကဵုၝောံခန်တွဵုရး ဍုၚ်မတ်မလီု သီုအသေအဟာန်ရောၚ် သ္ဂးရ။
သွက်ညးပါဲဒဴဘဲပၞာန်တံဂှ် ကံၚ်ဇြဳပၞာန် ထံက်ပၚ်ကဵုလဝ် မွဲတၠ ၜါဠက်ဒ္ကေဝ်၊ အပံၚ်ဖအိုတ် ၃၇၀၀ ကိုဋ်ဒ္ကေဝ်ပြၚ် ထံက်ပၚ်ကဵုလဝ်တုဲ တၠဒါန်တၞဟ်ဟ်တံလေဝ် ထံက်ပၚ်ကဵုလဝ် ဇွောံမသ္ၚု၊ ကပေါတ်သိုၚ်သ္ၚိတံနွံဂှ် ထ္မံက်ထ္ၜးလဝ်ရ။
ညးပါဲဒဴဘဲပၞာန် ဒေသမန်မွဲတၠဂှ်တှ်ေ သြန်ထံက်ပၚ်ၜါဠက်ဒ္ကေဝ် လ္ပာ်ကံၚ်ဇြဳပၞာန် ထံက်ပၚ်ကဵုလဝ်ဂှ် ဟွံဂွံတုဲ ဟိုတ်နူပရေၚ်ပၞာန် မကြံၚ်မ္ၚိုဟ်ဂှ်တုဲ ဒးဂဗဒၟံၚ်ကဵု အကာဲအရာဒးကလေၚ်ဂြိပ်ပၠန်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဟွံဂွံဏီပုဟ်။ နူဏေံတေံ ဟွံပရအ်ဏာလှုဲပုဟ်။ မွဲလှ်ေမှ ဟွံပရအ်လဝ်ပုဟ်။ လၟုဟ်ဂှ်တှ်ေ ရဲနွံပ္ဍဲကွာန်တံရဂှ် ပလေဝ်ဒၟံၚ်သ္ဂောံကလေၚ်ပြံၚ်ပၠန်ယျ။ ပေါဲသှ်လိက်တုဲမ္ဂး ဒှ်ပေါဲဗ္တိုက်ဏောၚ် ဂွံမိၚ်ကေတ်ဒၟံၚ်။ လ္ၚဵုတံဂှ်တှ်ေ ဖေက်ဒၟံၚ်” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန် ပအပ်ကဵုအာသြန်ထံက်ပၚ်ဏောၚ် ဟီုဒၟံၚ်ကီုလေဝ် ဒဵုကဵုအခိၚ်လၟုဟ် ကဵုကၠုၚ်လဝ်ပရိုၚ် ကုညးပါဲဘဲပၞာန်တံဂှ် ဟွံမွဲတုဲ နကဵုညးပါဲဘဲပၞာန်ဂမၠိုၚ် ကလိဂွံဒၟံၚ်သြန် နူကဵုမဒါန်ညးတၠဒါန်မ္ၚးမ္ၚးဏံသၟးရဂှ် ညး ဆက်ဟီုရ။
ညးပါဲဘဲပၞာန် နူဒေသမန်မွဲတၠပၠန်ဂှ်လေဝ် ၜိုန်ဟီုဒၟံၚ် ထံက်ပၚ်ကဵုဒၟံၚ် ညးပါဲဘဲပၞာန်တံကီုလေဝ် မံၚ်ဒၟံၚ်ပ္ဍဲကွာန်ရဂှ် ဟွံဂွံတီကေတ်တုဲ တၠဒါန်တံ ကၠုၚ်ကဵုဒါန်တှ်ေ ရဲပါဲဒဴဘဲပၞာန်တံဟွံဂွံမွဲသာ် အုပ်ဓုပ်ကွာန်တံသၟးရ ပံၚ်ကေတ်ဒၟံၚ်ဂှ် ဟီုကၠုၚ်ရ။
“ပိုယ်တံ ဟွံဂွံပုဟ်။ မုဟွံဂွံပုဟ်။ မံၚ်ပ္ဍဲကွာန်တုဲ မုမှဟွံဂွံတီကေတ်ပုဟ်။ ပိုယ်တံ ဒှ်ဒဒိုက်ရ။ ကဵုတှ်ေ ခိုဟ်ကွေံရ။ ညးတၞဟ်တံ ကၠုၚ်ကဵုဒါန်ဂှ် ဟွံစိုပ်ပိုယ်ပုဟ်။ သြန်မဒါန်ကဝက်ဂှ်တှ်ေ အုပ်ဓုပ်ကွာန်တံ ပံၚ်ကေတ်ဒၟံၚ်ရ” သာ်ဝွံ သ္ဂးရ။
ကံၚ်ဇြဳပၞာန် ထံက်ပၚ်ကဵု ရဲပါဲဒဴဘဲပၞာန်တံဏောၚ် ဟီုကီုလေဝ် ညးပါဲဒဴဘဲပၞာန်လ္ၚဵုတံတှ်ေ မံၚ်ဒၟံၚ်ပ္ဍဲဒဵုဂြိုပ်တံတုဲ ဍေံတံ ထံက်ပၚ်ကဵုမာန်ဟွံသေၚ်ပုဟ်တုဲ သြန်ထံက်ပၚ်ဗွဲမဂၠိုၚ်ဂှ်တှ်ေ ကဵုဒၟံၚ် ညးမစုက်လုက်ကဵုကံၚ်ဇြဳပၞာန်တံ အဓိကဂှ် ညးဆက်ဟီုရ။
မွဲလ္ပာ်ဂှ်ပၠန် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဂှ်တှ်ေ ဟိုတ်နူလၟေၚ်ဒဒှ်ပရေၚ်ပကီုပရာပ်တံဂှ်တုဲ ညးပါဲဒဴဘဲပၞာန် ဒးထောံလသာသ္ၚိဌာန် ပါဲမံၚ်ဒၟံၚ်ဗွဲယာယဳတံဂှ် မွဲတၠမ္ဂး ထံက်ပၚ်ကဵုအာ သြန်ၜါဠက်ဒ္ကေဝ်ဏောၚ် ပ္ဍဲဂိတုဖေဖဝ်ဝါရဳ ၁၁ တေံ အခိၚ်ဆဵုဂဗကဵု သ္ကိုပ်ဝန်ဇၞော်ရးဒေသ ကေုာံ တွဵုရး ပ္ဍဲနေဗျဳဒဝ်ဂှ် ဟီုလဝ်ရ။
ပ္ဍဲတွဵုရးဍုၚ်မန်ဂှ်တှ်ေ အပ္ဍဲကာလသီအဝဵုဏံ မ္ၚးနူကဵုပေါဲဗ္တိုက်အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတံဂှ် ဟိုတ်နူပရေၚ်ဗ္တိုက်ပၞာန်ကျာ ကေုာံ လွဟ်ဇၞော် နူကဵုဒပ်ကံၚ်ဇြဳပၞာန်တံဂှ်တုဲ လၟိဟ်မၞိဟ် ၜါကိုဋ်ပြၚ် ဒးထောံလသာဌာန်ဒၟံၚ် ဒးဂြိပ်ဒဴဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ/MOI