ရေဝ်၊ ဖေဖဝ်ဝါရဳ ၁၆
တွဵုရးဍုၚ်မန် ပွိုၚ်ဍုၚ်ရေဝ်ဂှ် သ္ကိုပ်အုပ်ဓုပ်ကွာန် (ကွင်းရှည်) ဥူတပိုၚ်သဵု ဒးဒုၚ်ပန်ဂစိုတ်ကဵုသေနာတ်တုဲ ချိုတ်အာလဝ်ရောၚ် ဂွံတီကေတ် ဇရေၚ်ညးဒေသတံကဵု ညးမစုက်လုက်ကဵုဂကောံရီုဗၚ်ဟံၚ်ပြာ်တံရ။
ဥူတပိုၚ်သဵု သ္ကိုပ်အုပ်ဓုပ်ကွာန် အာယုက် ၄၀ သၞာံဝွံ နူကွာန်(ကွၚ်းရှည်) ပ္ဍဲကဵုဂၠံၚ်အာကွာန် (ငါးကလေးချောင်း) ဂှ် ဒးဒုၚ်ပန်ဂစိုတ်လဝ်ကဵု သေနာတ်ရ။
ဟိုတ်နူဒးဒုၚ်ပန်ဂစိုတ်လဝ်ကဵုသေနာတ်တုဲ ဇွဥူတပိုၚ်သဵု သ္ကိုပ်အုပ်ဓုပ်ကွာန် မချိုတ်ဒၟံၚ်ဂှ် ညးဒေသတံ ဂွံကလေၚ်ဆဵုလဝ် အပ္ဍဲကၠအ်ထၜိုတ်မွဲ ဗ္ဒါဲကွာန် (ငါးကလေးချောင်း) ဂှ်ရ။
အခိၚ်ကလေၚ်ဆဵုလဝ်ဇွဂှ် သ္ကိုပ်အုပ်ဓုပ်ကွာန် ဥူတပိုၚ်သဵုဝွံ ပ္ဍဲကဵုကအ်ဂှ် ဒးလဝ်ဝပ်မကမ်ၜါတဲ၊ ပ္ဍဲကဵုဗုၚ်ဂှ် ကလိဂွံလဝ်ဝပ် မကမ်ပန်တဲ၊ နကဵုဘဲဝပ်သာ်ဏံဂှ် ဒးချိုတ်အာလဝ် ပ္ဍဲဒၞါဲဒှ်ပရူဂှ်ရ။
ဇွသ္ကိုပ်အုပ်ဓုပ် ဥူတပိုၚ်သဵုဂှ် ဂွံကလေၚ်ဆဵုလဝ်ကီုလေဝ် အခိၚ်ညးတိတ်အာနူသ္ၚိ ဖုၚ်၊ လစိန်၊ လှုဲ၊ ကွဳလိုန်ဓာတ် ပါကၠုၚ်လဝ်ကရောံညးဂှ် ကၠေံဒၟံၚ်ရောၚ် သ္ဂးရ။
ဥူတပိုၚ်သဵု သ္ကိုပ်အုပ်ဓုပ် မချိုတ်အာဂှ်ဝွံ ဒှ်ညးဒှ်ကၠုၚ်သ္ကိုပ်အုပ်ဓုပ်ကွာန် ကြဴနူပၞာန်သီအဝဵုတုဲ ၜိုတ်သၞာံ ၂၀၂၄ ဂှ် ပ္တိုန်လဝ်လိက်နုက်တိတ်ကီုလေဝ် အခေါၚ်ဟွံစှ်ေကၠုၚ်ဏီပုဟ်ဂှ် ဂွံတီကေတ် အတိုၚ်ဂလာန်ညးဒေသတံရ။
စပ်ကဵုလၟေၚ်ဒဒှ်ဏံတုဲ ဂကောံပၠန်ဂတးတံကီု လ္ပာ်ကံၚ်ဇြဳပၞာန်တံကီုဂှ် လလောၚ်ပ္တိတ်လဝ်ပရိုၚ်ဂှ် ဟွံဂွံဆဵုကေတ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ