ကမမံၚ်၊ ဖေဖဝ်ဝါရဳ ၁၈
ပ္ဍဲတွဵုရးကရေၚ် ဍုၚ်ကမမံၚ်ဂှ် အကြာပရေၚ်ပၞာန်ၜါလ္ပာ် မကြံၚ်မ္ၚိုဟ်ဒၟံၚ်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်ကၠုၚ်ကဵုလွဟ်ဇၞော်၊ ပန်ကၠုၚ်ကဵုပၞာန်ကျာတံ အဆက်က်တုဲ ညးဒေသ ဂၠိုၚ်ကဵုလ္ၚီ ဒးထောံလသာလဝ်ဌာန်ဒၟံၚ်ဂှ် တမ်ရိုဟ်ပရိုၚ်အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဖေဖဝ်ဝါရဳ ၁၄ တုဲ နူတမ်ဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ဍုၚ်ဘာအၚ် ပန်ဗလးနၚ်လွဟ်ဇၞော် လ္ပာ်ဂကောံကွာန်ဝတ်ကျဳ တိဍာ်ဒပ်မဟာ ၁ KNU သြၚ်ၜဳသၚ်လောန်လ္ပာ်ဏံဂှ်ကဵု ပ္ဍဲကဵုကွာန်ဂမၠိုၚ် မၞုံဗ္ဒါဲဍုၚ်ကမမံၚ်ဂှ်တုဲ နူကဵုဗျူဟာကမမံၚ်ဂှ်လေဝ် ပန်ပှော်ဏာလဝ် လွဟ်ဇၞော် အပ္ဍဲကဵုကွာန်နွံဗ္ဒါဲဍုၚ်ဂှ်ရ။
သ္အာၚ်နူဂှ်ပၠန် ဒပ်ကံၚ်ဇြဳပၞာန် ကၠုၚ်စိုပ်ထောံဏာလဝ်မခတိုဟ် ပ္ဍဲကွာန်ဖာဗဝ် ဗ္ဒါဲဍုၚ်ကမမံၚ်ဂှ်ကဵု မွဲဒမြိပ်ဒဵု(မိဇိုၚ်း) ဂှ်တုဲ ဟိုတ်နူဒပ်ကံၚ်ဇြဳပၞာန် ပန်ပှော်ထောံကၠုၚ်မခတိုဟ် နကဵုပၞာန်ကျာ ကေုာံ လွဟ်ဇၞော်တံဂှ်တုဲ ပ္ဍဲကဵုကွာန်ဖာဗဝ်ဂှ် သ္ၚိဒၟံၚ်ဗွဲမဂၠိုၚ်ဂၠေၚ် ဇီုကပိုက်လီုလာ်အာလဝ်တုဲ ကောန်ကွာန်ဒေသဂမၠိုၚ်လေဝ် ဒးပါဲဒလေတ်လဝ် ဒၞါဲဗၠးဘဲတံရ။
ဟိုတ်နူဒပ်ကံၚ်ဇြဳပၞာန် ပန်ပှော်ဗ္တိုက်ကၠုၚ်သာ်ဏံဂှ်တုဲ ကောန်ကွာန်ဒေသ နူကဵုကွာန်ဂမၠိုၚ် မပ္တံကဵုကွာန် (ဖားဘောၚ်၊ ကပ်ကျော်) တံဂှ်ကဵု ညးဒေသ နူလ္တူဍုၚ်ကမမံၚ်တံဝွံ လုပ်စိုပ်ပါဲဒလေတ်ကၠုၚ်ဒၟံၚ် အပ္ဍဲဒေသမျာၚ်ကျဳၚူ သြၚ်ၜဳသၚ်လောန်မွဲလ္ပာ်ဂှ်တုဲ ညးပါဲဘဲပၞာန်လ္ၚဵုတံဂှ်တှ်ေ ဒးပါဲဒလေတ်ကၠုၚ်ဒၟံၚ် ဒဵုကဵုလ္တူဍုၚ်ဘာအၚ်ရ။
ညးဍုၚ်ကွာန်ဒေသဂမၠိုၚ် ပါလုပ်သီုကဵုကွာန်(ဖားဘောၚ်) မ္ဒးပါဲဒလေတ်ဒၟံၚ်ဘဲပၞာန်တံဂှ်ဝွံ အခိၚ်လၟုဟ် ဒးဂဗဒၟံၚ်ကဵုအခက်အခုဲစၞစသုၚ်တံရောၚ် ညးဒေသတံ ဟီုအိုတ်ရ။
ဒပ်ပၠန်ဂတးတံ စိုပ်ကၠုၚ်ဒၟံၚ် ဗ္ဒါဲဍုၚ်ကမမံၚ်တုဲ ဟိုတ်နူပရိုၚ် လုပ်စိုပ်ဗ္တိုက် ဗ္ဒိုပ်ဗျူဟာကံၚ်ဇြဳပၞာန် နွံလ္တူဍုၚ်တံဂှ်တုဲ ကံၚ်ဇြဳပၞာန် ကၠောန်ကၠုၚ်ဒၟံၚ်ပရေၚ်ပန်ပှော်ကဵုလွဟ်ဇၞော် ကေုာံ ကဵုပၞာန်ကျာ မွဲဒမြိပ်ပွဳပွူဍုၚ်ကမမံၚ်ဂှ်ရောၚ် တမ်ရိုဟ်ပရိုၚ်အပ္ဍဲဒေသတံ သ္ဂးရ။
တမ်ရိုဟ်ပရိုၚ်ကမမံၚ်လ္ၚဵုတံဂှ်လေဝ် ကောန်ဒပ် KNLA ဒပ်မဟာ ၅ တံဝွံ သွက်ဂွံဗ္တိုက်သီ ဗျူဟာကံၚ်ဇြဳပၞာန် ကမမံၚ်ဂှ် စိုပ်ကၠုၚ်ဒၟံၚ် ဗ္ဒါဲဍုၚ်ကမမံၚ်တုဲ နကဵုညးဍုၚ်ကွာန်ဒေသ နူကဵုကွာန်မၞုံပွဳပွူဗ္ဒါဲဍုၚ်ကမမံၚ်တံဂမၠိုၚ် သွက်ဂွံတိတ်နူဒေသတံဏံ အပ္ဍဲပွိုၚ်ပိတ္ၚဲဂှ် ဟီုဂးဒၟံၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ