ဘာအၚ်၊ ဖေဖဝ်ဝါရဳ ၁၈
ပ္ဍဲတွဵုရးကရေၚ် ပွိုၚ်ဍုၚ်ဘာအၚ် ကွာန်ကဝ်ဟေဝ်ဂှ် ပေါဲဗ္တိုက်ဟွံမွဲမွဲသာ် ဟိုတ်နူဒပ်ကံၚ်ဇြဳပၞာန် ဗ္တိုက်ကၠုၚ်ကဵုပၞာန်ကျာတုဲ ညးဍုၚ်ကွာန်ဒေသ မသုန်တၠ ဇီုကပိုက်ကလိဂွံလဝ်ဝပ်ရောၚ် KNU ဗဟဵု လလောၚ်ပ္တိတ်လဝ်ပရိုၚ်ရ။
ဒပ်ကံၚ်ဇြဳပၞာန်ဝွံ ပ္ဍဲဂိတုဖေဖဝ်ဝါရဳ ၁၅ အခိၚ်သ္ဂာဗ္တံဂှ် ပေါဲဗ္တိုက်ဟွံမွဲမွဲသာ် ထောံဖျေံလဝ်မခတိုဟ်ၜါမ ပ္ဍဲကဵုကွာန်ကဝ်ဟေဝ် နကဵုက္ၜၚ်ကျာရ။
ဟိုတ်နူပရေၚ်ထောံမခတိုဟ် ကဵုက္ၜၚ်ကျာဂှ်တုဲ သ္ၚိဒၟံၚ်နူကဵုကွာန်ကဝ်ဟေဝ် ဒ္စိတ်မ ဇီုကပိုက်လီုလာ်အာလဝ်တုဲ ညးဍုၚ်ကွာန်ဒေသ ကလိဂွံဝပ်တံဂှ်တှ်ေ ဒးတိုန်စိုပ်လွဳဒၟံၚ် ပ္ဍဲရုၚ်ဂဥုဲ ဒၞါဲမကြပ်တံဂှ်ရောၚ် သ္ဂးရ။
ကွာန်ကဝ်ဟေဝ် ဒပ်ကံၚ်ဇြဳပၞာန် ထောံဏာလဝ်မခတိုဟ်ဂှ်ဝွံ ဒှ်တိဍာ်အုပ်ဓုပ်ခရိုၚ်သဓီု ဒပ်မဟာ ဗော်သွးကောန်ဂကူကရေၚ် KNU ရ။
လအာတုပ်သာ်ဂှ်ကီု ပ္ဍဲဂိတုဖေဖဝ်ဝါရဳ ၁၃ ဂှ်လေဝ် ပ္ဍဲကဵုတွဵုရးဍုၚ်မန် ပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်ၜဳကလေၚ်ဂှ် မွဲတ္ၚဲဓဝ် ကွာန်ပိကွာန် ဒးဒုၚ်ထောံလဝ်မခတိုဟ်တုဲ မၞိဟ်ပိတၠ ချိုတ်တုဲ ၁၀ တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−KNU