မတ်မလီု၊ ဖေဖဝ်ဝါရဳ ၂၃
အလုံဍုၚ်မွဲ အပ္ဍဲဂိတုဖေဖဝ်ဝါရဳ ပိသတ္တာဟကၠာဏံဂှ် ဟိုတ်နူကံၚ်ဇြဳပၞာန်တုဲ ညးဍုၚ်ကွာန် ဒးချိုတ်အာလဝ် ၆၇ တၠရောၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP လလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳ ၂၁ တေံရ။
တုဲကၠုၚ် နူဂိတုဖေဖဝ်ဝါရဳ ၁ စဵုကဵု ၂၁ အလုံဍုၚ်မွဲဂှ် ဟိုတ်နူဒပ်ကံၚ်ဇြဳပၞာန်တုဲ ညးဗြဴ ၃၀ တၠကဵု ညးတြုံ ၃၇ တၠ ဒးချိုတ်အာလဝ်ဂှ် သ္ပဒတန်ဂွံလဝ် သီုယၟုယၟာဂမၠိုၚ်ရောၚ် သ္ဂးရ။
ပ္ဍဲကဵုဏံ ကောန်ၚာ်သၟဝ်အာယုက် ၁၈ သၞာံဂှ် ပါလုပ် ၁၀ တၠတုဲ ပ္ဍဲကဵုညးမချိုတ်အာဂမၠိုၚ် ၅၀ တၠဂှ်ဝွံ ဟိုတ်နူပရေၚ်ဗ္တိုက်ပၞာန်ကျာ ကံၚ်ဇြဳပၞာန်တုဲ ဒးချိုတ်အာလဝ်တုဲ ပ္ဍဲရးသက်ကိုၚ်ဂှ် ၁၉ တၠနွံတုဲ မၞိဟ်ချိုတ်အာလဝ် ဒှ်လဝ်ဂၠိုၚ်အိုတ်ရ။
ပ္ဍဲဂိတုဖေဖဝ်ဝါရဳ ၁၉ တေံ ကံၚ်ဇြဳပၞာန် ထောံဂြာတ်ကၠုၚ်မခတိုဟ်ကဵုက္ၜၚ်ကျာ ပ္ဍဲကွာန်ဝက်ယျေန် ဍုၚ်ဒအ်ဖုၚ်ယာန် ပွိုၚ်ဍုၚ်မဝ်မံက် တွဵုရးကချေၚ်ဂှ်တုဲ ဒတုံဗ္တိုဟ်ထ္ကးအာလဝ် လ္တူသ္ၚိမွဲမ အပ္ဍဲကွာန်ဂှ်တုဲ သီုကောန်ၚာ်သၟတ်ပိတၠမပါလုပ်ဂှ် ကောန်ဂြောဝ်ဂတာထပှ်တၠ ဒးတုဲချိုတ်အာလဝ်ရောၚ် ထ္မံက်ထ္ၜးလဝ်ရ။
ပ္ဍဲဍုၚ်ဗၟာ အပ္ဍဲပရေၚ်သီအဝဵုပွိုၚ်ပန်သၞာံဏံ ဟိုတ်နူကံၚ်ဇြဳပၞာန် ကေုာံ ကောန်ရဲတဝ်ခွါညးတံ ရပ်ဒက်ပြိုက်ဂစိုတ်ကၠုၚ်ဒၟံၚ်တံဂှ်တုဲ ညးဍုၚ်ကွာန်ဟၟဲကဵုဒုဟ်ဒဏ် ၆၃၂၂ တၠ ချိုတ်အာလဝ်ရောၚ် ဂွံတီကေတ် အတိုၚ်တၚ်နၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP ရ။
ပရိုၚ်−သြၚ်လောန်တိုၚ်(မ်)
ဗီု−Social Media