တယိတ်ချံၚ်၊ ဖေဖဝ်ဝါရဳ ၂၅
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲကွာန်(ဥတ္တူ) ပွိုၚ်ဍုၚ်တယိတ်ချံၚ် ရးတၞၚ်သဳဂှ် လ္ပာ်ဒပ်ပံၚ်ကောံ ဒပ်စဵုဒၞါညးဍုၚ်ကွာန်တံ ကောန်သ္ဂံၚ်ပၠန်ဂတး ပိတၠ ပြဟ်လလုဲအာလဝ်ရောၚ် ဂွံတီကေတ် ဇရေၚ်ကရောၚ်ပၞာန်ဒံၚ်ညဳနံၚ်ရ။
စနူတ္ၚဲအကြာတုဲကၠုၚ်ဏံတုဲ အကြာဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် လ္ပာ်ကွာန်(ဥတ္တူ) ပွိုၚ်ဍုၚ်တယိတ်ချံၚ် နကဵုဇြဟတ် ၈၀ ပြၚ်ဂှ်ကဵု ဒပ်ပံၚ်ကောံ ဒပ်စဵုဒၞါညးဍုၚ်ကွာန်တံ က္တဵုဒှ်လဝ်ပေါဲဗ္တိုက်ၜါလ္ပာ် ဗ္ဒါဲကွာန်မေဝ်နေဝ်အိုဝ် ကဵု ကွာန်(ဥတ္တူ)ရ။
အတိုၚ်ဂလာန် ဂကောံဇြဟတ်ပၠန်ဂတးတံဂှ်မ္ဂး ဒပ်ကံၚ်ဇြဳပၞာန်ဝွံ ကြဴနူဒးဒုၚ်ဗ္တိုက်သီ သၞေဟ်ကၚ်စၟဳတ် သၞေဟ်ကၚ်ဒဒန်ယှိုဲဂူဂှ်တုဲဂှ် ချဳဒရာၚ်ထ္ပက်ဒၟံၚ်ကရောၚ်ပၞာန် ပ္ဍဲပွိုၚ်ဍုၚ်တယိတ်ချံၚ် ကွာန်မၞုံသ္ကုတ်လ္တူတံဂှ်ရောၚ် သ္ဂးရ။
ဟိုတ်နူပရေၚ်ထ္ပက်ဒၟံၚ်ကရောၚ်ပၞာန်ဂှ်တုဲ ပ္ဍဲဂိတုဖေဖဝ်ဝါရဳ ၂၁ အခိၚ်ဇိုၚ်သဝ်တ္ၚဲ ၜိုတ် ၃ နာဍဳဂှ် အပ္ဍဲပေါဲဗ္တိုက် မက္တဵုဒှ်လဝ် ဗ္ဒါဲကွာန်(ဥတ္တူ)ဂှ် နူဒပ်ဒမၠုက်ဒပ်စဵုဒၞါညးဍုၚ်ကွာန် ပွိုၚ်ဍုၚ်တယိတ်ချံၚ်ဂှ် ကောန်သ္ဂံၚ်(ဥတ္တူ) ကဵု ကောန်သ္ဂံၚ်ဝက်ၚါ၊ နူဒပ်စြေက်နာ်ထဝါဲ လၟေၚ် ၁ ဂှ် ကောန်သ္ဂံၚ်(ဝတုတ်)၊ ညးတံပိတၠ ပြဟ်လလုဲအာလဝ်ရောၚ် ညးတာလျိုၚ်လလောၚ်ပရိုၚ် ကရောၚ်ပၞာန်ဒံၚ်ညဳနံၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
မွဲလ္ပာ်ဂှ်ပၠန်လေဝ် ပ္ဍဲကဵုပေါဲဗ္တိုက် မက္တဵုဒှ်လဝ် ပန်တ္ၚဲဆက်က်ဂှ် လ္ပာ်ဒပ်ပံၚ်ကောံ ဒပ်စဵုဒၞါညးဍုၚ်ကွာန်တံဂှ် ကောန်သ္ဂံၚ်ဂမၠိုၚ် ဇီုကပိုက်ပြဟ်လလုဲအာလဝ်နွံတုဲ အကာဲအရာဒပ်ကံၚ်ဇြဳပၞာန်တံ ဇီုကပိုက်ဒးချိုတ်တံဂှ် သ္ပဒတန်ဟွံမာန်ဏီရောၚ် သ္ဂးရ။
အခိၚ်လၟုဟ် ဒပ်ကံၚ်ဇြဳပၞာန်ဝွံ ဟိုတ်နူထ္ပက်ကရောၚ်ပၞာန် ချဳဒရာၚ်အာကၠုၚ်ဒၟံၚ် မွဲဒမြိပ်ဗ္ဒါဲကွာန်ဥတ္တူဂှ်တုဲ ညးဒေသ နူကဵုကွာန် (ဥတ္တူ၊ ပန်းပြင်၊ မဲနယ်အိုး)တံဂမၠိုၚ် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
တုဲကၠုၚ် ပ္ဍဲဂိတုဖေဖဝ်ဝါရဳ ၈ ကဵု ၉ တေံဂှ်လေဝ် ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ် ပ္ဍဲကွာန်ဥတ္တူ ပွိုၚ်ဍုၚ်တယိတ်ချံၚ်ဂှ်ဝွံ စံၚ်ပလီုဏာလဝ် သ္ၚိအပ္ဍဲကွာန် ၆ မဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု− ကရောၚ်ပၞာန်ဒံၚ်ညဳနံၚ်