နံၚ်ချဵု၊ ဖေဖဝ်ဝါရဳ ၂၅
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲပွိုၚ်ဍုၚ်နံၚ်ချဵု ရးသေံသ္ကုတ်သၟဝ်ကျာဂှ် ဟိုတ်နူဒပ်ကံၚ်ဇြဳပၞာန် ဗ္တိုက်ဂြာတ်ထောံကၠုၚ်မခတိုဟ်ယက်ဂျိတုဲ ကောန်ဒပ် TNLA ၁၀ တၠ ဇီုကပိုက်ကလိဂွံလဝ်ဝပ်ရောၚ် ဒပ်ပၞာန်တအာၚ် လလောၚ်ပ္တိတ်လဝ်ပရိုၚ်ရ။
တုဲကၠုၚ်ပ္ဍဲဂိတုဖေဖဝ်ဝါရဳ ၂၃ တေံ ပ္ဍဲပွိုၚ်ဍုၚ်နံၚ်ချဵု အကြာကွာန်ဒံၚ်ယှေကဵု ကွာန်မာန်မဝ်ဂှ် ဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကောန်ဂကူတအာၚ် TNLA တံ က္တဵုဒှ်လဝ်ပေါဲဗ္တိုက်ၜါလ္ပာ် ဗွဲမသ္ကာတ်မြဟ်ရ။
အပ္ဍဲပေါဲဗ္တိုက်ၜါလ္ပာ်ဂှ် ဒပ်ကံၚ်ဇြဳပၞာန် ထောံမခတိုဟ်ဂြာတ်ဖျေံလဝ်မခတိုဟ်ယက်ဂျိ လ္ဒေါဝ်တ္ၚဲ ၜိုတ် ၁ နာဍဳဂှ်တုဲ ကောန်ဒပ် TNLA ၁၀ တၠ ဇီုကပိုက်ကလိဂွံလဝ်ဝပ်တုဲ ၄ တၠ ဂွံအာဝပ် ဗွဲမသ္ကာတ်မြဟ်ရောၚ် ထ္မံက်ထ္ၜးလဝ်ရ။
ကောန်ဒပ် TNLA ဂမၠိုၚ်ဝွံ ဟိုတ်နူဒးဒုၚ်ထောံလဝ်မခတိုဟ်ယက်ဂျိဂှ်တုဲ ယီုလုပ်ယီုတိတ်မြက်ကီု၊ ဗ္ၜူကီု၊ ဂြိုဟ်ယိုက်၊ ဍောၚ်ၜိုတ်၊ အံက်ဇြဳဂျေန်စှ်ေ မပ္တံကဵုဝေဒနာသာ်ဏံတံ ဒးဒုၚ်စသိုၚ်ဒၟံၚ်တုဲ ဒးလွဳလွတ်ဒၟံၚ်ရောၚ် သ္ဂးရ။
ဒပ်ကံၚ်ဇြဳပၞာန်ဝွံ အပ္ဍဲအခိၚ်ကာလပေါဲဗ္တိုက်ဂှ် ရပ်စပ်မခတိုဟ်ယက်ဂျိ နူကဵုဍုၚ်သ္အာၚ်တံ မတာဒၞါလဝ်ဂှ်တုဲ ကလိလောန်ဒၟံၚ် အမှုရာဇဝတ်ပၞာန်တံဂှ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး TNLA ရ။
အပ္ဍဲဂိတုဏံ ဒပ်ကံၚ်ဇြဳပၞာန်ဝွံ နကဵုတၚ်ရန်တၟံနွံနွံ ပ္တဝ်ကၠုၚ်က္ဍိုပ် ကုညးဍုၚ်ကွာန်ကောန်အရာပ် ပ္ဍဲဒေသတအာၚ်တံတုဲ ဟိုတ်နူပရေၚ်ဗ္တိုက်ကဵုလွဟ်ဇၞော် ကေုာံ ကဵုက္ၜၚ်ကျာတံဂှ်တုဲ ကောန်အရာပ် ၇ တၠ ပါလုပ်သီုကဵုကောန်ၚာ်သၟတ်တံ ဒးချိုတ်အာလဝ်တုဲ ၁၅ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်နၚ် TNLA ရ။
ပရိုၚ်−သြၚ်လောန်တိုၚ်(မ်)
ဗီု− TNLA